ພາບປະກອບ:internet
|
(vovword)- ສາສະຫນາ ຫວຽດນາມ ໃນການເຊື່ອມໂຍງ -ບັນດາບົດຮຽນສາກົນໄດ້ຮັບການແບ່ງປັນ ນັ້ນແມ່ນຫົວຂໍ້ຂອງກອງປະຊຸມສຳມະນາສາກົນ ໂດຍຄະນະສາສະຫນາຂອງລັດຖະບານ ສົມທົບກັບສະຫະພາບເອີລົບຈັດຕັ້ງຂຶ້ນໃນວັນທີ 14/6 ຢູ່ ຮ່າໂນ້ຍ. ການສຳມະນາໄດ້ແລກປ່ຽນບັນດາບັນຫາກ່ຽວຂ້ອງເຖິງສາສະຫນາເວົ້າລວມ, ຊີ້ແຈງບັນດາການຫັນປ່ຽນ ແລະ ຜົນງານກ່ຽວກັບສາສະຫນາ ຢູ່ ຫວຽດນາມ ໃນໄລຍະຜ່ານມາ ພ້ອມທັງສ້າງກາລະໂອກາດແບ່ງປັນບົດຮຽນໃນການຮັບປະກັນສິດເສລີໃນການເຫລື້ອມໃສສາສະຫນາຂອງປະຊາຊົນ,ປະກອບສ່ວນສ້າງນະໂຍບາຍ, ກົດໝາຍຂອງ ຫວຽດນາມ ກ່ຽວກັບການເຫລື້ອມໃສສາສະຫນາໃນໄລຍະຈະມາເຖິງໃຫ້ສົມບູນແບບ. ທ່ານ Nguyen Thanh Xuan ຮອງຫົວຫນ້າຄະນະປະຈຳ ຄະນະສາສະຫນາຂອງລັດຖະບານ ຫວຽດນາມ ໄດ້ຢືນຢັນວ່າ: ການປ່ຽນໃຫມ່ສາສະຫນາຢູ່ ຫວຽດນາມ ແມ່ນທັດທຽມກັບການປ່ຽນໃຫມ່ດ້ານການເມືອງ, ເສດຖະກິດ, ວັດທະນະທຳ ສັງຄົມພາຍໃນປະເທດ. ການປ່ຽນໃຫມ່ນີ້ ແມ່ນຖືກຕ້ອງ ແລະ ນຳມາຊຶ່ງໝາກຜົນອັນຕັ້ງຫນ້າ, ສະແດງໃຫ້ໂລກເຫັນໄດ້ບັນດາການຫັນປ່ຽນໃນການດຳເນີນຊີວິດທາງສາສະຫນາ ຫວຽດນາມ ກໍຄືບັນດາການຫັນປ່ຽນໃນນະໂຍບາຍສາສະຫນາ ຢູ່ ຫວຽດນາມ.