ຮ່ວມມືເສດຖະກິດ, ການຄ້າການລົງທຶນສືບຕໍ່ເປັນຈຸດສຸມ ແລະ ເປັນກຳລັງໜູນຂອງການພົວພັນ ຫວຽດນາມ - ອາເມລິກາ
ທ່ານ ຮ່າກິມງອກ ຮອງລັດຖະມົນຕີການຕ່າງປະເທດ ຫວຽດນາມ
(ພາບອິນເຕີແນັດ)
(vovworld) – “ການຮ່ວມມືເສດຖະກິດ, ການຄ້າການລົງທຶນສືບຕໍ່ເປັນຈຸດສຸມ ແລະ ເປັນກຳລັງໜູນຂອງການພົວພັນ ຫວຽດນາມ - ອາເມລິກາ” ນີ້ແມ່ນຄຳຢືນຢັນຂອງທ່ານ ຮ່າກິມງອກ ຮອງລັດຖະມົນຕີການຕ່າງປະເທດ ຫວຽດນາມ ເມື່ອຕອບສຳພາດຕໍ່ສື່ມວນຊົນກ່ຽວກັບການພົວພັນ ຫວຽດນາມ - ອາເມລິກາ ເນື່ອງໃນໂອກາດທ່ານ John Kerry ລັດຖະມົນຕີການຕ່າງປະເທດ ອາເມລິກາ ຢ້ຽມຢາມ ຫວຽດນາມ ຢ່າງເປັນທາງການ ແຕ່ວັນທີ 12 – 14/01/2017. ທ່ານຮອງລັດຖະມົນຕີການຕ່າງປະເທດ ຮ່າກິມງອກ ຊີ້ແຈ້ງວ່າ: ບົນພື້ນຖານນະໂຍບາຍຕ່າງປະເທດເອກະລາດ, ເປັນເຈົ້າຕົນເອງ, ຫັນການພົວພັນສາກົນຂອງ ຫວຽດນາມ ເປັນຫລາຍຮູບຫລາຍແບບ, ຫລາຍຝ່າຍ, ຫວຽດນາມ ຢືນຢັນນະໂຍບາຍສະເໝີຕົ້ນສະເໝີປາຍຖືເປັນສຳຄັນການພົວພັນກັບ ອາເມລິກາ; ພ້ອມແລ້ວກັບອຳນາດການປົກຄອງໃໝ່ມານະພະຍາຍາມ ເພື່ອເສີມຂະຫຍາຍຜົນງານທີ່ບັນລຸໄດ້ໃນ 8 ປີຜ່ານມາ ແລະ ນຳການພົວພັນພັດທະນາກ່ວາອີກ, ບົນພື້ນຖານເຄົາລົບລະບອບການເມືອງ, ເສັ້ນທາງພັດທະນາຂອງກັນ, ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ບໍ່ແຊກແຊງເຂົ້າວຽກງານພາຍໃນຂອງກັນ, ຮ່ວມມືຕ່າງຝ່າຍຕ່າງມີຜົນປະໂຫຍດ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ ອາຊີ - ປາຊີຟິກ…ທ່ານ ຮ່າກິມງອກ ກໍ່ໃຫ້ຮູ້ວ່າ ຫວຽດນາມ ພ້ອມກັບບັນດາຄູ່ຮ່ວມມື ໃນນັ້ນມີອາເມລິກາ ໄດ້ແບ່ງປັນຄວາມປາດຖະໜາຢາກຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ອາຊີ - ປາຊີຟິກ ບົນພື້ນຖານເຄົາລົບກົດໝາຍສາກົນ; ຮັກສາທ່າອ່ຽງໂລກຫລາຍຂົ້ວ ແລະ ຫັນເປັນປະຊາທິປະໄຕຢູ່ພາກພື້ນ, ກໍ່ຄືຮັກສາບົດບາດເປັນໃຈກາງຂອງ ອາຊຽນ ໃນບັນດາລະບອບບັນຍັດຢູ່ພາກພື້ນ, ຮັກສາ ອາຊຽນ ໃຫ້ເຂັ້ມແຂງ, ມີສາມັກຄີ, ມີການພົວພັນດຸ່ນດ່ຽງກັບບັນຫາປະເທດໃຫຍ່, ຄູ່ຮ່ວມມືພາຍນອກ…ໃນການພົວພັນ 2 ຝ່າຍ ຫວຽດນາມ ສືບຕໍ່ຜັນຂະຫຍາຍບັນດາກົນໄກຮ່ວມມືທີ່ມີຢູ່ແລ້ວລະຫວ່າງ 2 ປະເທດ, ແລກປ່ຽນຄະນະຜູ້ແທນທຸກຂັ້ນ, ໃນນັ້ນມີຂັ້ນສູງ. ຫວຽດນາມ ຄວນມານະພະຍາຍາມກ່ວາອີກ ເພື່ອສ້າງສະພາບແວດລ້ອມແຫ່ງການລົງທຶນດຳເນີນທຸລະກິດສະດວກ ເພື່ອດຶງດູດບັນດານັກລົງທຶນ ອາເມລິກາ ເພີ່ມທະວີການຄ້າ 2 ສົ້ນ.