(vovworld) – ຕອນເຊົ້າວັນທີ 27/6, ກອງປະຊຸມ SOM ອາຊຽນ ພິເສດກ່ຽວກັບບົດບາດໃຈກາງຂອງ ອາຊຽນ ແລະ ກຳນົດທິດຍຸດທະສາດກ່ຽວກັບໂຄງປະກອບພາກພື້ນໃນອະນາຄົດຖືກຈັດຂຶ້ນຢູ່ຮ່າໂນ້ຍ ດ້ວຍການເຂົ້າຮ່ວມຂອງບັນດາເຈົ້າໜ້າທີ່ຂັ້ນສູງໃນກຸ່ມ ອາຊຽນ. ນີ້ແມ່ນກອງປະຊຸມມີລັກສະນະປຶກສາຫາລືເລິກເຊິ່ງ ແລະ ກ້ວາງຂວາງ, ຮັບເອົາຄຳເຫັນຂອງບັນດາຜູ້ແທນ, ຍົກອອກແນວຄວາມຄິດໃຫ້ແກ່ກອງປະຊຸມລັດຖະມົນຕີ ອາຊຽນ ຢູ່ Nay Pyi Taw( ຢູ່ມຽນມາ) ໃນເດືອນ 8/2014. ຈຸດສຸມຂອງກອງປະຊຸມນີ້ແມ່ນປຶກສາຫາລືກ່ຽວກັບບົດບາດໃຈກາງຂອງ ອາຊຽນ, ປຶກສາຫາລືສັງລວມກ່ຽວກັບບົດບາດ ແລະ ສາຍພົວພັນລະຫວ່າງ ອາຊຽນ ແລະ ບັນດາປະເທດມະຫາອຳນາດ.
ທີ່ກອງປະຊຸມ, ອາຊຽນກໍ່ຢືນຢັນທັດສະນະຂອງ ອາຊຽນ ກ່ຽວກັບບັນຫາທະເລຕາເວັນອອກແມ່ນຈະແຈ້ງທີ່ສຸດ, ໂດຍອີງໃສ່ຫຼັກການ 6 ຂໍ້ ແລະ ຖະແຫຼງການກ່ຽວກັບການປະພຶດຂອງບັນດາຝ່າຍກ່ຽວຂ້ອງຢູ່ທະເລຕາເວັນອອກ (DOC) ທີ່ລົງນາມລະຫວ່າງ ອາຊຽນ ແລະ ຈີນ. ອາຊຽນ ສະແດງຄວາມວິຕົກວັງວົນຢ່າງເລິກເຊິ່ງຕໍ່ໜ້າບັນດາການຜັນແປໄລຍະມໍ່ໆມານີ້ຢູ່ທະເລຕາເວັນອອກ ແລະ ຫວັງວ່າຈະບັນລຸປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ກັບຈີນ ໂດຍໄວ.