ເວທີປາໄສທະເລອາຊຽນ ເປີດກວ້າງ: ສ້າງຄວາມໄວ້ເນື້ອ ເຊື່ອໃຈແມ່ນພື້ນຖານສຳຄັນໃຫ້ການຊຸກຍູ້ການຮ່ວມມືທະເລ
(ພາບປະກອບ)
(vovworld) – ເວທີປາໄສທະເລອາຊຽນ ແລະ ເວທີປາໄສທະເລອາຊຽນເປີດກວ້າງ ຫາກໍ່ອັດລົງຢູ່ນະຄອນດ່ານັ້ງ ພາຍຫຼັງດຳເນີນມາເປັນເວລາ 2 ວັນ. ຄຽງຂ້າງການສືບທອດ ແລະ ເສີມຂະຫຍາຍບັນດາຄາດໝາຍທີ່ໄດ້ວາງອອກກ່ອນນັ້ນ, ເວທີປາໄສຄັ້ງນີ້ຍັງສືບຕໍ່ມີການປ່ຽນແປງໃໝ່, ເນັ້ນໜັກເຖິງບັນດາການເຄື່ອນໄຫວລະອຽດກວ່າ ເພື່ອແນໃສ່ຮັບປະກັນກົດໝາຍສາກົນ, ສົນທິສັນຍາກົດໝາຍວ່າດ້ວຍທະເລ ທີ່ຖືກນຳໃຊ້ໃນສະພາບຕົວຈິງ.
ຕາມທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງແລ້ວ, ໃນບັນດາວາລະປະຊຸມທີ່ເວທີປາໄສ, ບັນດາປະເທດໄດ້ແບ່ງປັນກ່ຽວກັບຄວາມຈຳເປັນຕ້ອງເພີ່ມທະວີການສ້າງຄວາມໄວ້ເນື້ອເຊື່ອໃຈ, ປະຕິບັດຄວາມລະງັບໃຈ, ແກ້ໄຂຄວາມຂັດແຍ້ງຕ່າງໆໂດຍສັນຕິວິທີ, ບໍ່ນາບຂູ່ ຫຼື ນາບຂູ່ນຳໃຊ້ອາວຸດ, ເຄົາລົບກົດໝາຍສາກົນ ແລະ ສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ສະກັດກັ້ນ ແລະ ຄວບຄຸມປະກົດການຕ່າງໆບົນທະເລ.
“ໃນການແລກປ່ຽນ, ບັນດາປະເທດໄດ້ເນັ້ນໜັກເຖິງເລື່ອງຕ້ອງປະຕິບັດກົດໝາຍສາກົນ ແລະ ສົນທິສັນຍາທະເລເພື່ອຮັບປະກັນສັນຕິພາບ, ຄວາມສະຫງົບປອດໄພຢູ່ພາກພື້ນນີ້. ບັນດາປະເທດກໍ່ສະໜັບສະໜູນຂໍ້ຕົກລົງຂອງອາຊຽນ ໃນໄລຍະຜ່ານມາ ແມ່ນປະຕິບັດ 5 ມາດຕາຂອງ DOC ແມ່ນລະງັບໃຈ ແລະ ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມພ້ອມທັງຮຽກຮ້ອງໃຫ້ທັງອາຊຽນ ແລະ ຈີນ ຍູ້ແຮງການທາບທາມຄວາມເຫັນກວ່າອີກ ເພື່ອມີປະມວນຂໍ້ກຳນົດການປະພຶດ COC ໂດຍໄວ. ບັນດາປະເທດກໍ່ແລກປ່ຽນຫຼາຍບັນຫາກ່ຽວກັບຂົງເຂດຮ່ວມມື, ຖືການສ້າງຄວາມໄວ້ເນື້ອເຊື່ອໃຈແມ່ນເງື່ອນໄຂສຳຄັນເພື່ອຊຸກຍູ້ການຮ່ວມມືຫຼາຍກວ່າອີກ.”
ເວທີປາໄສກໍ່ດຳເນີນການຕີລາຄາສະພາບປະຕິບັດສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ແບ່ງປັນບົດຮຽນໃນການປະຕິບັດ ກໍ່ຄືແລກປ່ຽນກ່ຽວກັບທິດທາງຮ່ວມມືເພື່ອຮັບປະກັນປະຕິບັດ UNCLOS ໃນສະພາບທີ່ບັນດາເຂດທະເລຢູ່ພາກພື້ນມີບັນດາການຜັນແປທີ່ສັບສົນຄືໃນປະຈຸບັນຢ່າງມີປະສິດທິຜົນ.