(vovworld) - ເຂົ້າຮ່ວມພິທີໄຂກອງປະຊຸມສະໄໝສາມັນເທື່ອທີ 2, ສະພາແຫ່ງຊາດຊຸດທີ 14 ມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ, ທ່ານປະທານປະເທດ ເຈີນດ້າຍກວາງ, ທ່ານນາຍົກລັດຖະມົນຕີ ຫງວຽນຊວນຟຸກ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ບັນດານັກປະຕິວັດຜູ້ອາວຸໂສ, ຜູ້ຕາງໜ້າບັນດາຄະນະທູຕານະທູດ, ບັນດາອົງການຈັດຕັ້ງສາກົນ.
ກ່າວຄຳເຫັນໄຂກອງປະຊຸມໃນຕອນເຊົ້າວັນທີ 20/10, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ຮຽກຮ້ອງປະຊາຊົນຢູ່ພາຍໃນ ແລະ ຕ່າງປະເທດສືບຕໍ່ໜູນຊ່ວຍປະຊາຊົນພາກກາງ ຜ່ານຜ່າຄວາມຫຍຸ້ງຍາກພາຍຫຼັງພະຍຸນ້ຳແກ່ງ; ຕີລາຄາສູງຄວາມມານະພະຍາຍາມຂອງອຳນາດການປົກຄອງທຸກຂັ້ນ, ບັນດາໝູ່ຄະນະໃນການຫຼຸດຜ່ອນຜົນຮ້າຍຢ້ອນຫຼັງຈາກໄພທຳມະຊາດທີ່ເກີດຂຶ້ນຢູ່ພາກກາງ.
ທົບທວນຄືນບັນດາຄວາມສະດວກ, ຄວາມຫຍຸ້ງຍາກຂອງສະພາບການຢູ່ພາຍໃນ ແລະ ຕ່າງປະເທດໃນໄລຍະຜ່ານມາ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ເນັ້ນໜັກເຖິງຄວາມຕັດສິນໃຈສູງ, ດ້ວຍບັນດາມາດຕະການແກ້ໄຂຢ່າງຂ້ຽວຂາດ, ບຸກທະລຸ ເພື່ອປະຕິບັດການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບການເຕີບໂຕ, ຄວບຄຸມໜີ້ສາທາລະນະ, ໜີ້ເສຍເພື່ອແນໃສ່ຮັບປະກັນສະຖຽນລະພາບດ້ານເສດຖະກິດມະຫາພາກ, ຮັບປະກັນຊີວິດສັງຄົມ, ຮັກສາຄວາມໝັ້ນຄົງດ້ານການເມືອງ, ປັບປຸງການປ້ອງກັນຊາດ, ປ້ອງກັນຄວາມສະຫງົບ, ສ້າງທ່າພັດທະນາໃຫ້ຊຸມປີຕໍ່ໄປ.
ກ່ຽວກັບບັນດາເນື້ອໃນສຳຄັນຂອງກອງປະຊຸມ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໃຫ້ຮູ້ວ່າ, ສະພາແຫ່ງຊາດຈະພິຈາລະນາ, ຮັບຮອງເອົາຮ່າງກົດໝາຍບາງສະບັບ, ມະຕິ ແລະ ໃຫ້ຄຳເຫັນກ່ຽວກັບ 12 ຮ່າງກົດໝາຍ, ໃນນັ້ນມີກົດໝາຍ, ມະຕິສຳຄັນຫຼາຍສະບັບ, ປັບປຸງບັນດາຂົງເຂດເຊິ່ງຫາງສຽງມີຄວາມເອົາໃຈໃສ່ເປັນພິເສດຄື: ກົດໝາຍວ່າດ້ວຍສະມາຄົມ, ກົດໝາຍວ່າດ້ວຍການເຊື່ອຖື, ສາສະໜາ. ສະພາແຫ່ງຊາດກໍພິຈາລະນາບົດລາຍງານກ່ຽວກັບການຕີລາຄາໝາກຜົນແຫ່ງການປະຕິບັດແຜນການພັດທະນາເສດຖະກິດສັງຄົມ ແລະ ງົບປະມານແຫ່ງລັດປີ 2016; ຕົກລົງແຜນການພັດທະນາເສດຖະກິດສັງຄົມ, ຄາດຄະເນງົບປະມານແຫ່ງລັດ ແລະ ຈັດແບ່ງງົບປະມານສູນກາງປີ 2017… ໃນການເຄື່ອນໄຫວຕິດຕາມກວດກາ, ສະພາແຫ່ງຊາດໄດ້ພິຈາລະນາບົດລາຍງານວຽກງານຂອງປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ… ບົດລາຍງານຂອງລັດຖະບານກ່ຽວກັບວຽກງານປ້ອງກັນ, ຕ້ານອາດຊະຍາກຳ ແລະ ການລະເມີດກົດໝາຍ. ສະພາແຫ່ງຊາດຈະຮັບຟັງບົດລາຍງານລວບລວມຄຳເຫັນ, ຂໍ້ສະເໜີຂອງຜູ້ມີສິດເລືອກຕັ້ງ ແລະ ປະຊາຊົນ; ດຳເນີນການຊັກຖາມບັນດາສະມາຊິກລັດຖະບານ. ທ່ານນາງປະທານສະພາແຫ່ງຊາດ ຫງວຽນທິກິມເງິນ ເນັ້ນໜັກວ່າ.
“ກອງປະຊຸມເທື່ອທີ 2 ມີວຽກງານຫຼາຍຢ່າງຕ້ອງເຮັດ, ມີເນື້ອໃນສຳຄັນຫຼາຍຢ່າງ. ຂ້າພະເຈົ້າຂໍສະເໜີໃຫ້ບັນດາສະມາຊິກສະພາແຫ່ງຊາດ ຍົກສູງຄວາມຮັບຜິດຊອບ, ເສີມຂະຫຍາຍຈິດໃຈສາມັກຄີ, ພູມປັນຍາ, ສຸມໃສ່ຄົ້ນຄວ້າ, ປຶກສາຫາລືຢ່າງປະຊາທິປະໄຕ, ມີຫຼາຍຄຳເຫັນທີ່ມີຄຸນນະພາບ, ປະກອບສ່ວນໃຫ້ກອງປະຊຸມບັນລຸຜົນງານຢ່າງຈົບງາມ, ຕອບສະໜອງຄວາມມຸ່ງມາດປາດຖະໜາຂອງປະຊາຊົນ”.
ແລະກໍໃນຕອນເຊົ້າວັນດຽວກັນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ກ່າວບົດລາຍງານເສດຖະກິດສັງຄົມ ປີ 2016 ແລະ ແຜນການປີ 2017, ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍີນ ແນະນຳບົດລາຍງານລວບລວມຄຳເຫັນ, ຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ປະຊາຊົນ…
ຕອນບ່າຍວັນດຽວກັນ, ສະພາແຫ່ງຊາດຮັບຟັງບົດລາຍງານຄື: ແຜນການສ້າງໂຄງປະກອບພື້ນຖານເສດຖະກິດໄລຍະ 2016 – 2020; ແຜນການການເງິນໄລຍະ 5 ປີ; ຄາດໝາຍ, ກຳນົດທິດລະດົມ, ນຳໃຊ້ແຫຼ່ງທຶນກູ້ຢືມ ແລະ ຄຸ້ມຄອງໜີ້ສາທາລະນະໄລຍະ 2016 – 2020…