(vovworld)- ກີ່ວ ຟາດີນ ຫລືຄ້ອຍ ຟາດີນ ມີຄວາມຍາວ 32 ກີໂລແມັດ ທີ່ຂຶ້ນກັບທາງຫລວງເລກ 6 ແມ່ນປະຕູເຂົ້າແຂວງ ດ້ຽນບຽນ. ຈຸດສູງສຸດຂອງກີ່ວແຫ່ງນີ້ແມ່ນ 1.648 ແມັດ ເມື່ອທຽບໃສ່ຫນ້ານ້ຳທະເລ, ດ້ວຍເບື້ອງຫນຶ່ງແມ່ນຝາພູ, ເບື້ອງຫນຶ່ງແມ່ນເຫວຊັນ. ກີ່ວ ຟາດີນ ທຸລະກັນດານຄືແນວນັ້ນ, ແຕ່ໃນບັ້ນຮົບດ້ຽນບຽນຝູຕ້ານພວກລ່າເມືອງຂຶ້ນຝລັ່ງກ່ອນນີ້, ທະຫານຫວຽດນາມ ໄດ້ຜ່ານຜ່າຄວາມລຳບາກກາກກຳເພື່ອແກ່ປືນໃຫຍ່ຫລາຍກະບອກເຂົ້າສະຫນາມຮົບ, ພາໄປເຖິງໄຊຊະນະດ້ຽນບຽນຝູໃນວັນທີ 7/5/1954.
ກີ່ວ ຟາດີນ ປະຈຸບັນ ບໍ່ທຸລະກັນດານຄືຫລາຍປີກ່ອນນີ້. ບ່ອນສູງສຸດກໍ່ບໍ່ສູງຄືເກົ່າ ແລະ ທາງຄັບແຄບບາງຕອນກໍບໍ່ແຄບຄືກ່ອນນີ້ອີກ. ທິວທັດທຳມະຊາດຢູ່ທີ່ນີ້ສວຍງາມທີ່ສຸດດ້ວຍເມັກເຝື້ອຂາວກະຈະເຈີດບິນເທິງພູ, ດອກບານເບັ່ງບານອວດອົ່ງສີສັນ, ພ້ອມກັບເລື່ອງລາວກ່ຽວກັບການແຂ່ງມ້າເພື່ອຂີດຂັ້ນຊາຍແດນລະຫວ່າງແຂວງລາຍເຈົາ ແລະ ເຊີນລາ ໄດ້ເຮັດໃຫ້ດິນແດນແຫ່ງນີ້ຍິ່ງມີຄວາມເລິກລັບ ແລະ ສວຍງາມກວ່າ.
ກີ່ວ ຟາດີນ
photo:internet
|
ແຕ່ກ່ອນນີ້ 60 ປີ, ກີ່ວ ຟາດີນ ນອນໃນເສັ້ນທາງຕົ້ນຕໍເພື່ອລຳລຽງຂົນສົ່ງອາວຸດ,ລູກປືນ ແລະ ສະບຽງອາຫານເພື່ອຮັບໃຊ້ບັ້ນຮົບ ດ້ຽນບຽນຝູຂອງທະຫານຫວຽດນາມ. ແຕ່ລະມື້ ມີຊາວຫນຸ່ມຕະລຸມບອນ, ຄົນງານເກນແນວຮົບ 8000 ຄົນ ໄດ້ແບກຫາບ, ລຳລຽງຂົນສົ່ງລູກປືນ, ເຂົ້າສານນັບຮ້ອຍໆຖ້ຽວຜ່ານ ກີ່ວ ຟາດີນ . ນີ້ກໍແມ່ນເສັ້ນທາງເຄື່ອນທັບຂອງກຳລັງທະຫານບົກ, ທະຫານປືນໃຫຍ່ ໄປເຖິງ ເຈີນດີງ, ຊື່ງແມ່ນຊື່ລັບຂອງບັ້ນຮົບ ດ້ຽນບຽນຝູໃນເມື່ອກ່ອນ. ໄລຍະທາງຜ່ານກີ່ວ ຟາດີນ ຍັງຝັງເລິກໃນຄວາມຊົງຈຳຂອງນັກດົນຕີ ຮົ່ງເວີນ, ຊື່ງແມ່ນຜູ້ປະດິດແຕ່ງບົດເພງທີ່ມີຊື່ວ່າ: ຮ້ອງໂຮແກ່ປືນໃຫຍ່ເຂົ້າສະໜາມຮົບດ້ຽນບຽນ, ໃຫ້ຮູ້ວ່າ:
“ກ່ອນທີ່ເຂົ້າທົ່ງນາເມື່ອງແທງ ຂຶ້ນກັບເມືອງ ດ້ຽນບຽນ ພວກຂ້າພະເຈົ້າຕ້ອງຜ່ານກີ່ວມີຄວາມຍາວກວ່າ 30 ກີໂລແມັດ, ຢູ່ເທິງກີ່ວ ມີບັນດາກຳລັງຄື: ລົດໂອໂຕ, ຄົນງານເກນແບກຫາບ, ລຳລຽງຂົນສົ່ງອາວຸດແລະ ອາຫານຮັບໃຊ້ບັ້ນຮົບນັບແຕ່ທ້າຍປີ 1953. ກີ່ວແຫ່ງນີ້ທັງຍາວ, ທັງທຸລະດັນດານທີ່ສຸດ ແລະ ຖືກເຮືອບິນຂອງຝລັ່ງ ຖີ້ມລະເບີດທຳລາຍຕະຫລອດວັນແລະຄືນ, ເຮັດໃຫ້ລົດໂອໂຕ, ລົດເກງຂົນສົ່ງເຂົ້າສານຫລາຍຄັນຖືກໄຟໄຫມ້. ສະນັ້ນຢາກໄປຜ່ານກີ່ວຢ່າງປອດໄພແມ່ນສິ່ງຫຍຸ້ງຍາກທີ່ສຸດ.”
ກີ່ວ ຟາດີນ ແມ່ນຈຸດເລີ່ມຕົ້ນທີ່ລຳບາກຫຍຸ້ງຍາກທີ່ສຸດໃນໄລຍະທາງແກ່ປືນໃຫຍ່ ດ້ວຍກຳລັງເຫື່ອແຮງຂອງບັນດານັກຮົບດ້ຽນບຽນ ໃນເມື່ອກ່ອນ. ຈາກ ກີ່ວ ຟາດີນ ຕ້ອງຜ່ານກີ່ວ, ຄ້ອຍ, ເຫວຊັນ, ພູສູງຫລາຍແຫ່ງຈຶ່ງໄປຮອດບ່ອນສຸດທ້າຍແມ່ນຖານທີ່ໝັ້ນ ຮີມລາມ, ພູ ດົກເລີບ, ພູ A1, ອຸມົງ De Castries.
ປະຈຸບັນ ຈາກກີ່ວ ຟາດີນ ໄປ ຕາມເສັ້ນທາງຫລວງເລກ 6 ປະມານ 20 ກວ່າກີໂລແມັດຈະໄປຮອດນະຄອນ ດ້ຽນບຽນຝູ. ແຕ່ເສັ້ນທາງແກ່ປືນໃຫຍ່ໃນເມ່ືອກ່ອນ ບໍ່ສາມາດຄິດໄລ່ເປັນຫລັກໄດ້. ມັນມີຈຸດເລີ່ມຕົ້ນ, ຕອນສຸດທ້າຍ ແຕ່ໄລຍະກາງເສັ້ນທາງພຽງແຕ່ວັດແທກໄດ້ດ້ວຍຄວາມລຳບາກກາກກຳຂອງນັກຮົບປືນໃຫຍ່ປ້ອງກັນອາກາດເທົ່ານັ້ນ.
ອະນຸສາວະລີໄຊຊະນະດ້ຽນບຽນຝູ
photo:internet
|
ເສັ້ນທາງແກ່ປືນໃຫຍ່ເຂົ້າຖານທີ່ໝັ້ນດ້ຽນບຽນ ບໍ່ພຽງແຕ່ມີເສັ້ນທາງຕອນດຽວເທົ່ານັ້ນ ຫາກມີຫລາຍຕອນ, ມີທາງໄປຫລາຍທິດ ແລະບ່ອນສຸດທ້າຍຫລາຍແຫ່ງ. ບາງເທື່ອແມ່ນເສັ້ນທາງຮັບໃຊ້ທັງບັ້ນຮົບ, ບາງເທື່ອແມ່ນເສັ້ນທາງແກ່ປືນໃຫຍ່ມີແຕ່ຄົງຕົວໃນເວລາພຽງສອງສາມຊົ່ວໂມງເທົ່ານັ້ນ, ຫລັງຈາກນັ້ນຖືກລີ້ຊ້ອນໃນປ່າເລິກຄືບໍ່ເຄີຍມີມາກ່ອນ. ໃນລະບົບເສັ້ນທາງແກ່ປືນໃຫຍ່ດ້ວຍກຳລັງເຫ່ືອແຮງຂອງຄົນທີ່ບໍ່ເຄີຍມີມາຢູ່ໃນໂລກນັ້ນ, ມີເສັ້ນທາງຕອນຫນຶ່ງໄດ້ຮັບການກໍ່ສ້າງໃນເວລາພຽງ 20 ຊົ່ວໂມງ ດ້ວຍຄວາມຍາວ 15 ກິໂລແມັດ ຈາກປາກປ່າ ນ່າຍາມ ຜ່ານຈອມພູ ພາຊົງ ມີຄວາມສູງ 1.150 ແມັດ. ບົນເສັ້ນທາງນີ້ ທະຫານຫວຽດນາມ ໄດ້ແກ່ປືນໃຫຍ່ທີ່ມີນຳ້ຫນັກ 2,4 ໂຕນຜ່ານພູສູງ, ກີ່ວຊັນ, ເຫວເລິກ ໃນຂະນະທີ່ເຮືອບິນຂອງສັດຕູພວມເວີ່ນບີນເທິງຫົວ. ດ້ວຍຄວາມຫຍຸ້ງຍາກນາໆປະການນັ້ນ ແຕ່ການຂົນສົ່ງປືນໃຫຍ່ ແລະ ປືນຄົກ 40 ກະບອກ ກໍ່ທັນກັບເວລາເພື່ອໃຫ້ທະຫານຍິງເຂົ້າທີ່ໝັ້ນ ຮີມລາມ, ເປີດສາກບັ້ນຮົບ ດ້ຽນບຽນຝູ ໃນເວລາ 17 ໂມງຂອງວັນທີ 13/3/1954. ທ່ານ ຟ້າມດືກກື, ອະດີດນັກຮົບປືນໃຫຍ່ໃນເມື່ອກ່ອນ ເລົ່າສູ່ຟັງໄລຍະທາງສຸດທ້າຍຂອງການແກ່ປືນໃຫຍ່ເຂົ້າສະໜາມຮົບດ້ຽນບຽນຝູ.
“ພວກຂ້າພະເຈົ້າເຄື່ອນທັບຢ່າງລຳບາກກາກກຳ. ເມ່ືອມາຮອດ ດ້ຽນບຽນ, ຫ່າງຈາກກຸ່ມທີ່ໝັ້ນໃຫຍ່ ດ້ຽນບຽນຝູ ປະມານ 15-18 ກິໂລແມັດ ຕ້ອງແກ່ປືນໃຫຍ່ດ້ວຍກຳລັງເຫື່ອແຮງຂອງຕົນຢ່າງລຳບາກທີ່ສຸດ. ສະນັ້ນ ຂ້າພະເຈົ້າຈຶ່ງເວົ້າວ່າບັນດານັກຮົບປືນໃຫຍ່ "ແມ່ນຜູ້ຖືກຫຼໍ່ດ້ວຍທອງກັບເຫຼັກ" ບໍ່ອາດຫລົງລືມເສັ້ນທາງທີ່ເຂົາເຈົ້າໄດ້ແກ່ປືນໃຫຍ່ໜັກເຖິງ 2,4 ໂຕນຜ່ານກີ່ວໃນຄາວນັ້ນໄດ້.”
ຮ່ອງຮອຍເສັ້ນທາງແກ່ປືນໃຫຍ່ເຂົ້າສະໜາມຮົບດ້ຽນບຽນໃນເມື່ອກ່ອນ ປະຈຸບັນຍັງຄົງຮັກສາຈຸດເລີ່ມຕົ້ນແມ່ນກີ່ວ ຟາດີນ, ແລະຕອນສຸດທ້າຍ ແມ່ນບອ່ນ ທີ່ວິລະຊົນ ໂຕຫວີງຢ້ຽນ ໄດ້ເສຍສະຫລະຊີວິດເມື່ອເອົາຕົນໂຕຄຳ້ປືນ. ເຊິ່ງຫ່າງຈາກນະຄອນ ດ້ຽນບຽນຝູ ໄປທາງທິດເຫນືອປະມານ 20 ກີໂລແມດ, ຢູ່ທີ່ນີ້ໄດ້ກໍ່ສ້າງອະນຸສາວະລີທີ່ຍາວ 24 ແມັດ, ກວ້າງ 8 ແມັດ, ສູງ 12,5 ແມັດ, ນຳ້ໜັກ 1200 ໂຕນ ເພື່ອເຊີດຊູໝວດທະຫານປືນໃຫຍ່ຂອງ ວິລະຊົນ ໂຕຫວີງຢ້ຽນ ຢູ່ ເນີນພູ ບໍຮົມ ໃນເມ່ືອກ່ອນ. ທັງໝົດເຫລ່ົານັ້ນ ເພື່ອເຮັດໃຫ້ຊາວຫວຽດນາມ ລຸ້ນຕ່າງໆ ສາມາດເຂົ້າໃຈໄດ້ກ່ຽວກັບປະຫວັດສາດອັນສະງ່າລາສີຂອງບັນດານັກຮົບ ດ້ຽນບຽນຝູ ໃນເມ່ືອກ່ອນ.