(vovworld) – ທັດສະນີຍະພາບອ່າວຫ້າລອງ, ແຂວງກວາງນິງ, ແຫ່ງທີ່ UNESCO ໄດ້ຮັບຮອງເປັນມໍລະດົກທຳມະຊາດໂລກເຖິງ 2 ເທື່ອນັ້ນ ເຄີຍປ່ຽນແປງຕາມການເວລາ. ມາຢ້ຽມຢາມອ່າວຫ້າລອງ ໃນບໍ່ວ່າເວລາໃດ ນັກທ່ອງທ່ຽວກໍ່ເຫັນໄດ້ຄວາມງາມຂອງເຂດມໍລະດົກທີ່ໄດ້ຮັບການສ້າງຂຶ້ນດ້ວຍຫີນ ແລະ ນ້ຳ. ໃນລາຍການຄົ້ນຫາຫວຽດນາມມື້ນີ້, ເຊີນເພື່ອໄປທ່ຽວຊົມສິ່ງມະຫັດສະຈັນທຳມະຊາດຂອງໂລກດ້ວຍເຮືອ Golden Lotus ຂອງບໍລິສັດຫຸ້ນສ່ວນທ່ອງທ່ຽວສາກົນ ແຄ໋ງຊິງ ຜ່ານບົດຂຽນຂອງນັກຂ່າວ ລານແອງ ດ້ວຍຫົວຂໍ້ວ່າ “ການທ່ຽວຊົມຫ້າລອງ ດ້ວຍເຮືອ“
ເຮືອ Golden Lotus
ເຮືອ Golden Lotus ຂົນສົ່ງນັກທ່ອງທ່ຽວທີ່ມາຈາກຫຼາຍປະເທດຢູ່ໃນໂລກຄືອາເມລິກາ, ອົດສະຕາລີ, ແອດສະປາຍ, ສຸແອດ, ນັບທັງຫວຽດນາມອີກ ໄດ້ອອກຈາກທ່າເຮືອບ້າຍໃຈ໋ ເລີ່ມຕົ້ນລາຍການທ່ຽວຊົມທັດສະນີຍະພາບອ່າວຫ້າລອງ. ຄວາມງາມຢູ່ທີ່ນີ້ພ້ອມກັບສາຍລົມເຢັນສະບາຍທີ່ພັດມາຈາກທະເລໄດ້ເຮັດໃຫ້ຄວາມຮ້ອນເອົ້າຂອງລະດູຮ້ອນທະລາຍໄປ. ອ້າຍ ຫງວຽນເທ໋ຫື້ວ, ຜູ້ນຳທ່ຽວຂອງບໍລິສັດຫຸ້ນສ່ວນທ່ອງທ່ຽວສາກົນ ແຄ໋ງຊິງ, ແນະນຳວ່າ.
“ໃນລາຍການທ່ອງທ່ຽວ 1 ວັນ, ນັກທ່ອງທ່ຽວຈະໄດ້ໄປຢາມຖ້ຳທຽນກຸງ, ເດົ່າໂກ, ຫຼັງຈາກນັ້ນຈະໄປໝູ່ບ້ານປະມົງບາຮາງ ເພື່ອພາຍເຮືອ kayak, ຕໍ່ມານັກທ່ອງທ່ຽວຈະໄປຜ່ານເກາະໝາຫີນ, ເກາະດິງເຮືອງ, ເກາະໄກ່ຕີ ແລະ ທ່າຫ້າລອງ. ສ່ວນລາຍການທ່ອງທ່ຽວ 2 ມື້, ນັກທ່ອງທ່ຽວຈະມີເວລາຊົມທີວທັດທຳມະຊາດ ແລະ ພັກຜ່ອນເທິງເຮືອຫຼາຍກວ່າ. ພວກຂ້າພະເຈົ້າມີຫຼາຍລາຍການທ່ອງທ່ຽວເພື່ອໃຫ້ນັກທ່ອງທ່ຽວເລືອກເຟັ້ນ. ນອກນັ້ນພວກຂ້າພະເຈົ້າກໍ່ປ່ຽນໃໝ່ລາຍການເປັນປະຈຳ ແລະ ມີການບໍລິການຫຼາຍຢ່າງເພື່ອຮັບໃຊ້ໃຫ້ນັກທ່ອງທ່ຽວ“.
ຖັນແຖວພາລະກອນຮັບໃຊ້ໃນເຮືອ
ການທ່ຽວຊົມທັດສະນີຍະພາບໃນອ່າວຫ້າລອງ ດ້ວຍເຮືອ ເຮັດໃຫ້ນັກທ່ອງທ່ຽວໄດ້ສຳພັດກັບທີວທັດທຳມະຊາດທີ່ງາມກວ່າໝູ່ຂອງໂລກ. ເຮືອທ່ອງທ່ຽວຈະໄປຜ່ານເກາະຫີນປູນຫຼາຍໜ່ວຍທີ່ຖືກຕັ້ງຊື່ຕາມຮູບຮ່າງທຳມະຊາດຂອງມັນຄືເກາະໄກ່ຕີ, ເກາະຫຼັງຄາ, ເກາະໂຖປັກທູບ… ຢູ່ອ່າວຫ້າລອງມີເກາະຫີນປູນໃຫຍ່ນ້ອຍນັບພັນໜ່ວຍ ດ້ວຍຮູບຮ່າງທີ່ແຕກຕ່າງກັນ. ທ່ານ John, ນັກທ່ອງທ່ຽວຊາວອົດສະຕາລີ, ຜູ້ມາຢາມອ່າວຫ້າລອງເປັນເທື່ອທຳອິດ, ເວົ້າວ່າ:
“ທັດສະນີຍະພາບຢູ່ທີ່ນີ້ງາມຫຼາຍ, ມັນໄດ້ສ້າງຄວາມດູດດື່ມໃຫ້ແກ່ພວກຂ້າພະເຈົ້າ, ນັ່ງເທິງເຮືອສາມາດເຫັນໄດ້ນົກບິນເທິງຟ້າ, ປາລອຍໃຕ້ນຳ້ ແລະ ຊົມທີວທັດທີ່ສວຍງາມໄດ້. ບັນດາຖຳ້ຢູ່ຫ້າລອງກໍ່ງາມອີຫຼີ ແລະ ມີຊີວິດຊີວາອີກ. ຫີນຍ້ອຍໃນຖ້ຳດ້ວຍຫຼາຍຮູບຫຼາຍສີຄືຮູບສັດ, ຮູບແມ່ຍິງ ຫຼືຮູບນົມແມ່ ໄດ້ສ້າງຄວາມຈັບອົກຈັບໃຈໃຫ້ແກ່ນັກທ່ອງທ່ຽວຫຼາຍ“.
ສິ່ງທີ່ສ້າງດູດດື່ມ ແລະ ຟົດຟື້ນທີ່ສຸດນັ້ນແມ່ນ ເມື່ອເຮືອທ່ອງທ່ຽວມາຮອດໝູ່ບ້ານປະມົງ, ນັກທ່ອງທ່ຽວຈະໄດ້ພາຍເຮືອ Kayak ເອງທາມກາງເຂດນ້ຳທະເລທີ່ຂຽວໃສສ່ອງຢ່າງສະບາຍ. ເມື່ອໄດ້ຮັບການແນະນຳຢ່າງລະອຽດຈາກຜູ້ນຳທ່ຽວ, ນັກທ່ອງທ່ຽວຈະຮູ້ສຶກວ່າການພາຍເຮືອບໍ່ຍາກປານໃດ ແລະ ດູດດື່ມທີ່ສຸດ.
ຫ້ອງຫາຫານເທິງເຮືອ
ທ່ານ John ແລະ ເພື່ອນຂອງຕົນແມ່ນນາງTania ນິຍົມທີ່ສຸດຕໍ່ລາຍການທ່ອງທ່ຽວນີ້:
“ພວກຂ້າພະເຈົ້າພາຍເຮືອໄປອ້ອມເຂດນີ້, ຂ້າພະເຈົ້າພາກພູມໃຈທີ່ສຸດເມື່ອໄດ້ເຫັນໝູ່ບ້ານປະມົງໃນທະເລ ກໍ່ຄືທີວທັດທຳມະຊາດ, ສິ່ງແວດລ້ອມແຫ່ງການດຳລົງຊີວິດຂອງປະຊາຊົນຢູ່ທີ່ນີ້. ເມື່ອພາຍເຮືອບົນທະເລ, Tania ແລະ ຂ້າພະເຈົ້າລ້ວນແຕ່ຢາກຢູ່ທີ່ນີ້ດົນກວ່າອີກ. ນີ້ແມ່ນການທ່ອງທ່ຽວທີ່ຈັບອົກຈັບໃຈ ເຊິ່ງກ່ອນນີ້ຂ້າພະເຈົ້າຍັງບໍ່ໄດ້ເຂົ້າຮ່ວມຈັກເທື່ອ. ທຳອິດຂ້າພະເຈົ້າກໍ່ຮູ້ສືກຢ້ານກົວ, ແຕ່ປະຈຸບັນເຫັນວ່າບໍ່ຍາກອີກ. ຂ້າພະເຈົ້າໄດ້ພາຍເຮືອໄປອ້ອມພູຫີນ ແລະ ໄດ້ເຫັນບັນດາໂພນຫີນຢູ່ເທິງ ອັນໄດ້ສ້າງຄວາມປະທັບໃຈທີ່ສຸດໃຫ້ແກ່ພວກຂ້າພະເຈົ້າ”.
ຕອນແລງນັ່ງເທິງເຮືອ ແມ່ນຈຸດເວລາຈັບໃຈທີ່ສຸດສຳລັບນັກທ່ອງທ່ຽວ. ເພື່ອກະກຽມໃຫ້ແກ່ຄາບເຂົ້າແລງ, ພໍ່ຄົວໄດ້ແນະນຳໃຫ້ນັກທ່ອງທ່ຽວວິທີເຮັດແນມ, ເຊິ່ງແມ່ນອາຫານພື້ນເມືອງຂອງຫວຽດນາມ
ນັກທ່ອງທ່ຽວແອບຫໍ່ແນມ
ເມື່ອໄດ້ເຮັດແນມ, ເຊິ່ງແມ່ນເຍື່ອງອາຫານທີ່ຊາວຫວຽດນາມ ນິຍົມກິນນັ້ນ . ທ່ານ Efarault, ນັກທ່ອງທ່ຽວມາຈາກຝລັ່ງ, ແບ່ງປັນວ່າ:
“ທຸກຄົນພ້ອມກັນຮຽນວິທີປຸງແຕ່ງອາຫານດ້ວຍຄວາມພາກພູມໃຈ. ຂ້າພະເຈົ້າກໍ່ດີໃຈຫຼາຍ ເມື່ອໄດ້ຢືນຢູ່ອ້ອມໂຕະພ້ອມກັບທຸກຄົນຮຽນວິທີແຕ່ງກິນ ເພື່ອກະກຽມໃຫ້ຄາບເຂົ້າ. ໄດ້ເຂົ້າຮ່ວມລາຍການທ່ອງທ່ຽວນີ້ ແມ່ນສິ່ງທີ່ຈັບອົກຈັບໃຈຫຼາຍ, ທັງໄດ້ຊົມທັດສະນີຍະພາບ, ທັງໄດ້ພົບປະ ແລະ ແບ່ງປັນກັບບັນດານັກທ່ອງທ່ຽວອື່ນໆ ແລະ ໄດ້ກິນເຂົ້າແລງກັບທຸກຄົນ. ບາງເທື່ອຂ້າພະເຈົ້າຈະກັບຄືນຫວຽດນາມ ອີກເພື່ອຮຽນວິທີປຸງແຕ່ງເຍື່ອງອາຫານຂອງຫວຽດນາມ”.
ເມື່ອຮອດຍາມຄ່ຳຄືນ, ທະເລໄດ້ຮັບການປະດັບປະດາດ້ວຍແສງດອກໄຟນາໆສີຈາກບັນດາເຮືອທ່ອງທ່ຽວ, ອັນໄດ້ເຮັດໃຫ້ອ່າວຫ້າລອງຍິ່ງມີຄວາມງາມແບບເລິກລັບກວ່າອີກ.
ເຮືອໃນຍາມຄ່ຳຄືນ ເມື່ອແສງອະລຸນປະກົດຢູ່ຂອບຟ້າກໍ່ແມ່ນສັນຍານທີ່ບົ່ງບອກວ່າລາຍການທ່ອງທ່ຽວຫ້າລອງ ດ້ວຍເຮືອໄດ້ສິ້ນສຸດລົງ, ຄືດັ່ງຄຳໝັ້ນໝາຍຂອງນັກທ່ອງທ່ຽວແຕ່ລະຄົນຈະກັບມາຢ້ຽມຢາມອ່າວຫ້າລອງ, ມໍລະດົກທີ່ເປັນເອກະລັກສະເພາະຂອງຫວຽດນາມ.