(vovworld)- ນັກທ່ອງທ່ຽວມາຢ້ຽມຢາມ ນະຄອນ ເຫ້ວ ຍາມໃດກໍມັກຄວາມງາມ ຂອງເຂດດິນນີ້ ດ້ວຍຮູບພາບສຸສານທີ່ເກົ່າແກ່ຫລາຍແຫ່ງ, ຄວາມສະຫງົບງຽບ ແລະ ສັກກະລະບູຊາຂອງບັນດາວັດວາອາຮາມ ກໍຄື ຄວາມງາມຂອງເຮືອນສວນຫລາຍຫລັງຢູ່ ນະຄອນເຫ້ວ. ຄຽງຄູ່ກັນນັ້ນ ທິວທັດທຳມະຊາດທີ່ສວຍງາມຂອງ ບຶງແຄມທະເລ ຢູ່ເຫ້ວ ຍາມໃດກໍແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ໃນລາຍການຄົ້ນຫາຫວຽດນາມ ພາກນີ້ ພວກເຮົາຂໍແນະນຳບົດທີ່ພາດຫົວຂໍວ່າ: ຄວາມງາມຂອງບຶງແຄມຝັ່ງທະເລ ຢູ່ ນະຄອນເຫ້ວ
ຊາວທ້ອງຖິ່ນຫາປາຢູ່ບຶງຕາມຢາງ
ພາບ:dulich.vn
|
ມາຢ້ຽມຢາມ ເຫ້ວ ເທື່ອຫນຶ່ງເພື່ອຮັບຊົມຄວາມງາມຂອງທິວທັດທຳມະຊາດ ແລະ ຄົ້ນຫາຊີວິດການເປັນຢູ່ຂອງປະຊາຊົນຢູ່ອາໄສຢູ່ລຽບຕາມ ບຶງແຄມຝັ່ງທະເລ. ຜູ້ໃດຢາກຄົ້ນຫາ ບຶງແຄມຝັ່ງທະເລ ຢູ່ ເຫ້ວ ຄວນຂີ່ລົດຈັກ ເພື່ອຊົມຄວາມງາມບົນຫນ້ານ້ຳທີ່ກວ້າງໃຫຍ່ນີ້. ເລີ່ມຕົ້ນຈາກໃຈກາງນະຄອນ ຂີ່ລົດຈັກຕາມທາງຫລວງ 49, ເບື້ອງຫນຶ່ງແມ່ນທະເລ, ສ່ວນເບື້ອງຫນຶ່ງແມ່ນ ບຶງແຄມຝັ່ງທະເລຫລາຍແຫ່ງ ຄື: ບຶງແທງລາມ, ບຶງ ຊາມ, ບຶງ ຮ່າຈູງ, ບຶງ ຖູຍຕູ, ບຶງ ເກົ່າຮາຍ ຕິດຕໍ່ກັນ ຄືດັ່ງພວມໄປໃນເສັ້ນທາງລະຫວ່າງສອງລຳແມ່ນ້ຳ. ອ້າຍ ຫງວຽນແທ່ງກົງ, ຊ່າງພາບຜູ້ທີ່ເຄີຍມາຖ່າຍຮູບຢູ່ ບຶງແຄມຝັ່ງທະເລ ເປັນຫລາຍຄັ້ງໃຫ້ຮູ້ວ່າ:
“ຢູ່ ເຫ້ວ ມີ ບຶງແຄມຝັ່ງທະເລ ຫລາຍແຫ່ງ, ໃນນັ້ນ ກວ້າງກວ່າໝູ່ ແມ່ນ ບຶງແຄມຝັ່ງທະເລ ຕາມຢາງ, ບຶງ ເກົ່າຮາຍ, ບຶງຖືຍຕູ, ບຶງຈ່ວນ. ບັນດາ ບຶງແຄມຝັ່ງທະເລ ນີ້ ລ້ວນແຕ່ມີການປະສົມປະສານຢ່າງແຫນ້ນແຟ້ນນຳກັນ. ຖ້າຂີ່ເຮືອໃນ ບຶງແຄມຝັ່ງທະເລ ທ່ານສາມາດເດີນເຮືອຈາກບຶງນີ້ຫາບຶງອື່ນໄດ້. ທິວທັດຢູ່ ບຶງແຄມຝັ່ງທະເລ ແມ່ນສວຍງາມທີ່ສຸດ, ພິເສດ ໃນຍາມສາຍັນ ຖ່າຍຮູບໃນຊ່ວງເວລານີ້ ທ່ານຈະສາມາດຖ່າຍເອົາໄດ້ຫລາຍຮູບທີ່ສ້າງຄວາມປະທັບໃຈທີ່ສຸດ.”
ຍາມສາຍັນຢູ່ ບຶງຕາມຢາງ
|
ບຶງແຄມຝັ່ງທະເລ ຕາມຢາງ ແມ່ນບຶງນ້ຳຈາງ ກວ້າງກວ່າໝູ່ຢູ່ ອາຊີຕາເວັນອອກສຽງໃຕ້, ໂດຍຫ່າງຈາກນະຄອນ ເຫ້ວ ປະມານ 12 ກິໂລແມັດ. ເນື້ອທີ່ຂອງບຶງ ຕາມຢາງປະມານແມ່ນ 52 ຕາລາງກິໂລແມັດ ແລະ ມີຄວາມຍາວປະມານ 24 ກິໂລແມັດ ຈາກປາກແມ່ນ້ຳ ໂອເລົາ ຮອດປາກແມ່ນ້ຳເຮືອງ ຂຶ້ນກັບ ສາມເມືອງຄື: ຟອງດຽນ, ກວ໋າງດຽນ, ເຮືອງຈ່າ ຂອງແຂວງ ເທື່ອທຽນເຫ້ວ. ບຶງຕາມຢາງ ມີຄວາມເລິກແຕ່ 2 -4 ແມັດ, ບາງບ່ອນເລິກ 7 ແມັດ ແມ່ນບ່ອນເຕົ້າໂຮມແມ່ນ້ຳ 3 ລຳດັ່ງກ່າວ ກ່ອນທີ່ໄຫລອອກສູ່ທະເລທ້ວນອານ. ຄວາມງາມແບບຮົກເຮື້ອເປົ່າຫວ່າງ, ສະຫງົບງຽບຂອງ ບຶງຕາມຢາງຍາມໃດກໍ ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ.
ກ່ອນນີ້ ຢາກໄປຢ້ຽມຢາມ ບຶງຕາມຢາງ ແມ່ນຫຍຸ້ງຍາກຫລາຍ, ແຕ່ປະຈຸບັນ ການໄປມາແມ່ນສະດວກແລ້ວ. ນັກທ່ອງທ່ຽວ ເຄີຍມານີ້ເພື່ອຊົມທິວທັດໃນຍາມສາຍັນ ແລະ ສູບອາກາດທີ່ປອດໂປ່ງກໍຄືຄວາມສະຫງົບງຽບຢູ່ທີ່ນີ້. ເມື່ອນັ່ງເທິງເຮືອລ່ອງຕາມ ບຶງແຄມຝັ່ງທະເລ, ທ່ານຈະຮູ້ສຶກຈິດໃຈສະຫວາດສະເຫວີຍກວ່າ. ອ້າຍ ຫງວຽນແທ່ງກົງ ແບ່ງປັນວ່າ ເມື່ອຍາມສາຍັນລົງ ບຶງແຄມຝັ່ງທະເລ ຄືດັ່ງນຸ່ງເສື້ອຜືນຫນຶ່ງທີ່ມີສີສັນຫລາກຫລາຍ.
“ແສງຕາເວັນອອ່ນໃນຍາມສາຍັນປະສົມກັບສີຂຽວຂອງທ້ອງຟ້າ ແລະ ຫນ້ານ້ຳ ສ້າງເປັນສີສັນພິເສດທີ່ສຸດ. ແຕ່ສິ່ງທີ່ສ້າງຄວາມປະທັບໃຈເມື່ອຂ້າພະເຈົ້າລ່ອງເຮືອຕາມ ບຶງແຄມຝັ່ງທະເລ ຢູ່ ເຫ້ວແມ່ນຊີວິດການເປັນຢູ່ຂອງປະຊາຊົນຢູ່ທີ່ນີ້, ພິເສດ ແມ່ນຮູບພາບປະຊາຊົນຫາສິນທະເລ. ຖ້າສັງເກດຈາກທາງໄກ ທ່ານຈະເຫັນຮູບພາບບັນດາກຸບຂອງຊາວທ້ອງຖິ່ນເຄິຍໃຊ້ເມື່ອຫາສິນທະເລແຕ່ເມື່ອລະດັບນ້ຳທະເລຂຶ້ນສູງກຸບເຫລົ່ານັ້ນ ແມ່ນລັບໆລີ້ໆເທິງຫນ້ານ້ຳ ອັນໄດ້ສ້າງຄວາມປະທັບໃຈທີ່ສຸດ.”
ປະຊາຊົນຢູ່ ບຶງແຄມຝັ່ງທະເລ ສ່ວນຫລາຍທຳມາຫາກິນດ້ວຍອາຊີບຫາ ແລະ ລ້ຽງປູກສິນທະເລ. ເມື່ອຄ່ຳຄືນວຽນມາ, ເຂົາເຈົ້າເຄີຍຂີ່ເຮືອ ຫາສິນທະເລ ແລະ ຮອດຮຸ່ງເຊົ້າມື້ຕໍ່ມາ ແມ່ນນຳເອົາໄປຂາຍຢູ່ຕະຫລາດແຄມທະເລ.
ພາຍຫລັງລ່ອງເຮືອຊົມທິວທັດທີ່ສວຍງາມຂອງ ບຶງແຄມຝັ່ງທະເລ ແລ້ວ, ທ່ານສາມາດແວ່ຮ້ານອາຫານ ເພື່ອຮັບປະທານບັນດາເຍື່ອງອາຫານທີ່ແຊບນົວ ຊື່ງໄດ້ຮັບການປຸງແຕ່ງດ້ວຍສິນທະເລພິເສດຂອງເຂດດິນນີ້.