ເມື່ອມີໂອກາດມາຢ້ຽມຢາມນະຄອນດາຫຼາດ, ແຂກທ່ອງທ່ຽວທັງຫຼາຍຈະມີໂອກາດແວ່ຢາມສະຖານທີ່ທ່ອງທ່ຽວທີ່ລືຊື່ຫຼາຍຢ່າງ, ໃນນັ້ນ ຕ້ອງເວົ້າເຖິງໂບດກອນກາ ( ໝາຍເຖິງໂຕໄກ່ ) ຊຶ່ງແມ່ນໜຶ່ງໃນບັນດາກິດຈະກຳທີ່ເປັນຂີດໝາຍແຫ່ງສະຖາປັດຕະຍະກຳຝ່າຍຕາເວັນຕົກປະສານສົມທົບກັບສະຖາປັດຕະຍະກຳຂອງພໍ່ແມ່ປະຊາຊົນບັນດາເຜົ່າຢູ່ເຂດໄຕງວຽນ. ໂບດກອນກາພ້ອມກັບໂບດສາສະໜາຕ່າງໆອີກບາງແຫ່ງໃນ ນະຄອນດາຫຼາດ ຍາມໃດກໍສ້າງຄວາມປະທັບໃຈໃຫ້ແກ່ແຂກທ່ອງທ່ຽວ ບໍ່ພຽງແຕ່ຍ້ອນຄວາມງາມດ້ານສະຖາປັດຕະຍະກຳທີ່ເປັນເອກະລັກສະເພາະເທົ່ານັ້ນ, ຫາກຍັງເປັນສະຖານທີ່ເພື່ອໃຫ້ແຂກທ່ອງທ່ຽວເຂົ້າມາທັດສະນະສຶກສາ, ຊອກຮູ້ດ້ານວັດທະນະທຳອີກດ້ວຍ.
ໂບດກອນກາຫຼືຍັງເອີ້ນວ່າ ໂບດດາຫຼາດ, ໂບດ ນີໂກລາ ບາຣີ |
ໂບດກອນກາຫຼືຍັງເອີ້ນວ່າ ໂບດດາຫຼາດ, ໂບດ ນີໂກລາ ບາຣີ. ຊາວທ້ອງຖິ່ນເຄີຍເອີ້ນໂບດແຫ່ງນີ້ແມ່ນໂບດກອນກາ ໝາຍເຖິງໂຕໄກ່ ຍ້ອນວ່າ ຢູ່ເທິງຍອດທາດລະຄັງ ມີຮູບໄກ່ໂຕໃຫຍ່. ນີ້ກໍແມ່ນໂບດໃຫຍ່ທີ່ມີຊື່ສຽງຢູ່ນະຄອນດາຫຼາດ, ທັງແມ່ນໜຶ່ງໃນບັນດາກິດຈະກຳສະຖາປັດຕະຍະກຳທີ່ເກົ່າແກ່ທີ່ສຸດຂອງນະຄອນນີ້ໂດຍຊາວຝະລັ່ງປະໄວ້ໃຫ້. ໂບດກອນກາ ຕັ້ງຢູ່ຖະໜົນເຈີນຟູ້ ໃນນະຄອນດາຫຼາດ. ໂບດກອນກາຖືກອອກແບບຕາມ “ຕົວແບບ”ຂອງໂບດຕ່າງໆຂອງສາສະໜາກາໂຕລິກ ໂຣມ ທີ່ເອີລົບ. ພື້ນທີ່ຂອງໂບດມີຮູບໄມ້ກາງເຂນ, ມີລວງຍາວ 65 ແມັດ, ກ້ວາງ 14 ແມັດ, ທາດລະຄັງສູງ 47 ແມັດ. ດ້ວຍຄວາມສູງເຊັ່ນນັ້ນ, ຈາກທາດລະຄັງຂອງໂບດກອນກາ ກໍສາມາດເຫັນທຸກບ່ອນຂອງນະຄອນດາຫຼາດ. ປະຕູໃຫຍ່ຂອງໂບດແມ່ນມຸ່ງໄປສູ່ພູລາງບຽງ. ຢູ່ໃນໂບດ, ມີ 3 ຫ້ອງເຊັ່ນ: ຫ້ອງໃຫຍ່ຢູ່ເຄິ່ງກາງ ແລະ 2 ຫ້ອງນ້ອຍຢູ່ຕາມ 2 ເບື້ອງ. ແຕ່ສິ່ງທີ່ເປັນເອກະລັກສະເພາະນັ້ນ, ແມ່ນຢູ່ດ້ານໜ້າຂອງໂບດ ມີທາດລະຄັງສູງ, ບັນດາລວດລາຍເທິງຝາດ້ານໜ້າຂອງໂບດຖືກເຮັດຕາມແບບເອີລົບດັ້ງເດີມ. ສຳລັບປ່ອງຢ້ຽມຂອງໂບດ ມີຮູບກົມ, ສ່ວນຫຼັງຄາຖືກມຸງດ້ວຍຫີນ. ສິ່ງທີ່ພິເສດກວ່າໝູ່ແມ່ນຍອດຂອງໄມ້ກາງເຂນຖືກຕິດກັບເສົາກັນຟ້າຜ່າທີ່ມີຮູບໄກ່ໂຕໜຶ່ງຖືກເຮັດດ້ວຍໂລຫະປະເພດເບົາ. ຕາມຊາວທ້ອງຖິ່ນແລ້ວ, ໄກ່ແມ່ນສັນຍາລັກຂອງປະເທດຝະລັ່ງ ແລະ ຍັງເປັນສັນຍາລັກຂອງຄວາມກິນແໜງໃຈ. ສະຖາປັດຕະຍະກຳທີ່ເກົ່າແກ່ ແລະ ເປັນເອກະລັກສະເພາະຂອງໂບດກອນກາ ຍາມໃດກໍສ້າງຄວາມປະທັບໃຈໃຫ້ແກ່ແຂກທ່ອງທ່ຽວ. ນາງຫງວຽນທິຮົ່ງ ແຂກທ່ອງທ່ຽວທີ່ມາຈາກແຂວງດົງນາຍ ເປີດເຜີຍວ່າ :
“ ເມື່ອມາຢ້ຽມຢາມໂບດແຫ່ງນີ້, ຂ້າພະເຈົ້າຮູ້ສຶກວ່າ ນີ້ແມ່ນກິດຈະກຳທີ່ເກົ່າແກ່, ເມື່ອເຂົ້າໃນໂບດ ກໍຮູ້ສຶກສະບາຍໃຈ. ດ້ວຍສະຖາປັດຕະຍະກຳທີ່ເປັນເອກະລັກສະເພາະ, ມັນໄດ້ຊ່ວຍໃຫ້ເຮົາສາມາດເຂົ້າໃຈກ່ຽວກັບວັດທະນະທຳຂອງດາຫຼາດຕື່ມອີກ ”
ຢູ່ດາຫຼາດຍັງມີໂບດອີກແຫ່ງໜຶ່ງທີ່ມີຊື່ສຽງ, ນັ້ນແມ່ນໂບດ Domaine de marie, ແຕ່ຊາວຍັງເຄີຍເອີ້ນໂບດນີ້ວ່າ ໂບດມາຍແອງ, ເພາະໂບດແຫ່ງນີ້ຖືກຕັ້ງບົນໂນນໜ່ວຍໜຶ່ງທີ່ເຕັມໄປດ້ວຍດອກສະກຸຣະ. ດ້ວຍເນື້ອທີ່ທັງໝົດ 12 ແຮັກຕາ, ຕັ້ງຢູ່ຫ່າງຈາກໃຈກາງ ດາຫຼາດ ປະມານ 1 ກິໂລແມັດໄປທາງທິດຕາເວັນຕົກສ່ຽງໃຕ້, ກຸ່ມໂບດນີ້ໄດ້ຮັບການກໍ່ສ້າງຕາມແບບເອີລົບໃນສະຕະວັດທີ 17 ໂດຍມີການປະສານສົມທົບກັບສະຖາປັດຕະຍະກຳຂອງຊົນເຜົ່າສ່ວນໜ້ອຍເຂດໄຕງວຽນ, ໂບດແຫ່ງນີ້ຖືກກໍ່ສ້າງບົນພື້ນທີ່ມີຮູບໄມ້ກາງເຂນ, ມີລວງກ້ວາງ 11 ແມັດ, ລວງຍາວ 33 ແມັດ. ໂບດແຫ່ງນີ້ຖືກໂອບອ້ອມໄປດ້ວຍສວນດອກໄມ້, ຕົ້ນໄມ້ໃບຫຍ້າຫຼາຍຊະນິດ ອັນໄດ້ສ້າງທັດສະນີຍະພາບທີ່ສວຍສົດງົດງາມ ແລະ ມີລັກສະນະເພີ່ນຈິດ. ທ້າວ ຫງວຽນກວ່າງຮ່ວາ ແຂກທ່ອງທ່ຽວທີ່ມາຈາກນະຄອນໂຮ່ຈິມິນ ໃຫ້ຂໍ້ສັງເກດວ່າ :
“ ສິ່ງທີ່ຈັບໃຈທຳອິດເມື່ອເຮົາເຂົ້າມາທ່ອງທ່ຽວຢູ່ ດາຫຼາດ, ນັ້ນແມ່ນອາກາດດີທີ່ສຸດ, ອັນທີ 2 ແມ່ນປະຊາຊົນຢູ່ແຫ່ງນີ້ມີຄວາມຊື່ສັດ, ຈິງໃຈ ແລະ ຮັກແພງແຂກຄົນ. ພິເສດແມ່ນໂບດ Domaine , ເຖິງວ່າໄດ້ໄປຫຼາຍເທື່ອແລ້ວກໍຕາມ, ແຕ່ເມື່ອມາແຫ່ງນີ້ກໍມີຄວາມຮູ້ສຶກທີ່ແຕກຕ່າງກັນ, ມັນມີລັກສະນະມິດງຽບ, ເກົ່າແກ່, ປະສົມປະສານລະຫວ່າງອະດີດຕະການ, ປະຈຸບັນ ແລະ ອະນາຄົດ ”
ນັບແຕ່ເມືອ່ກໍ່ສ້າງສຳເລັດມາຮອດປະຈຸບັນ, ໂບດແຫ່ງນີ້ພຽງແຕ່ໃຊ້ນ້ຳສີບົວເພື່ອທາຝາໂບດ, ອັນໄດ້ເຮັດໃຫ້ໂບດຍິ່ງແຈ້ງສະຫວ່າງເມື່ອມີແສງແດດສາດສ່ອງລົງມາ, ທັງສ້າງຈຸດພິເສດສະເພາະໃຫ້ແກ່ໂບດ Domaine.
ແຕ່ລະປີ ຮອດໂອກາດຈັດວັນບຸນຄິຼດສມາດ, ໂບດກອນກາ, ໂບດມາຍແອງ ແລະ ໂບດອື່ນໆໃນນະຄອນ ກໍລ້ວນແຕ່ມີແຂກມາຢ້ຽມຊົມທັດສະນະສຶກສາຢ່າງຫຼວງຫຼາຍ. ບໍ່ພຽງແຕ່ແມ່ນສະຖານທີ່ເຕົ້າໂຮມບັນດາສາສະນິກກະຊົນເຊື່ອຖືສາສະໜາກາໂຕລິກເທົ່ານັ້ນ, ຢູ່ສະຖານທີ່ແຫ່ງນີ້ ຍັງແມ່ນສະຖານທີ່ທ່ອງທ່ຽວທີ່ຈັບໃຈເພື່ອໃຫ້ແຂກທ່ອງທ່ຽວຕ້ອນຮັບບັນຍາກາດວັນບຸນຄຼິດສມາດທີ່ຟົດຟື້ນມ່ວນຊື່ນ ແລະ ຖ່າຍເອົາຮູບເປັນທີ່ລະນຶກທີ່ສວຍງາມໃນໂອກາດມາທ່ອງທ່ຽວ