ແຕ່ລະເທື່ອເມື່ອລະດູບານໃໝ່ວຽນມາ, ເມື່ອດອກຈອງບານຂາວກະຈະປົກຄຸມໄປທົ່ວເຂດປ່າ, ນັກທ່ອງທ່ຽວນັບໝື່ນຄົນທີ່ມາຈາກທຸກແຖບຖີ່ນ ຂອງປະເທດກໍ່ພາກັນໄປນະມັດສະການ ວັດອຽນຕື, ເຊິ່ງແມ່ນເຂດພູທີ່ສັກສິດເພື່ອໄດ້ສຳພັດກັບກ້ອນເມກ, ສາຍລົມພັດວອຍວອຍ ແລະ ສຽງລະຄັງທີ່ດັງກ້ອງກັງວານໄປທົ່ວ. ເຊີນທ່ານໄປນະມັດສະການ ວັດອຽນຕື ຜ່ານບົດຂຽນຂອງນັກຂ່າວ ລານແອງ, ເພື່ອໄດ້ເຊື່ອມຕົວເຂົ້າກັບໂລກແຫ່ງຈິດວິນຍານ ແລະ ສຳພັດກັບກ້ອນເມກທີ່ເລ່ືອນລອຍເທິງຈອມ ຟູ່ເວິນ.
ສະຖານທີ່ທ່ອງທ່ຽວອຽນຕື
(ພາບ:dulichanz.)
ໂດຍຕັ້ງຢູ່ບໍລິເວນນະຄອນ ອວງບີ໋, ແຂວງ ກວາງນິງ, ເຂດປູສະນີຍະສະຖານ ປະຫວັດສາດ ແລະ ທັດສະນີຍະພາບ ອຽນຕື ປະກອບມີບັນດາປູສະນີຍະສະຖານ, ວັດວາອາຮາມ, ພະທາດເຈດີ, ສານເຈົ້າ ທີ່ມີມາກ່ອນນີ້ນັບຮ້ອຍປີ. ພູອຽນຕືຫຼືເອີ້ນວ່າ ແບກເວິນເຊີນ ຫຼື ຟູ່ເວິນເຊີນ ມີຄວາມສູງ 1.068 ມ ເມື່ອທຽບໃສ່ລະດັບໜ້ານ້ຳທະເລ. ຢູ່ເຂດພູຜາປ່າດົງ ອຽນຕື ທີ່ງາມປຽບເໝືອນແດນສະຫວັນນີ້, ເຈົ້າຊີວິດ ເຈິ່ນເຍິນຕົງ (1258 - 1308) ພາຍຫຼັງຊີ້ນຳນຳພາປະຊາຊົນຕີເອົາຊະນະເສິກຕ່າງດ້າວ ແຢວນ ເໝີງ 2 ຄັ້ງນັ້ນ, ໄດ້ ສະລະ ລາຊະບັນລັງໃນປີ 1299 ເພື່ອໄປບວດຢູ່ ວັດອຽນຕື, ແລະ ຕັ້ງນາມບວດວ່າ ຈຸກເລິມດ້າຍເດົ່າດ່າ, ແລະກໍ່ຕັ້ງນິກາຍ ຈຸກເລິມ. ນັບແຕ່ນັ້ນເປັນຕົ້ນມາ, ອຽດຕືກາຍເປັນສູນກາງຂອງພຸດທະສາສະໜາ, ດ້ວຍນິກາຍ ທ່ຽນຈຸກເລິມອຽນຕື, ນີ້ກໍ່ແມ່ນສັນຍາລັກຂອງ ພຸດທະສາສະໜາ ຫວຽດນາມ.
ປ້າ ຫງວຽນທິລຽນ, ເຖິງວ່າປີນີ້ໄດ້ມີອາຍຸ 75 ປີແລ້ວກໍ່ຕາມ, ແຕ່ປ້າຍ່າງຂຶ້ນຂັ້ນໄດດ້ວຍຫີນຍັງສະບາຍຢູ່. ປ້າ ລຽນ ເວົ້າວ່າ ໄປນະມັດສະການ ອຽນຕື ແມ່ນກັບເມືອຫາໂລກພະພຸດ, ດັ່ງນັ້ນພະພຸດທະເຈົ້າຈຶ່ງບັນດານໃຫ້ຂ້າພະເຈົ້າມີສຸຂະພາບເຂັ້ມແຂງເພື່ອໄປນະມັດສະການໄດ້.
”ນັບແຕ່ປີ 1988 ມາຮອດປະຈຸບັນ, ປີໃດຂ້າພະເຈົ້າກໍ່ໄປ ອຽນຕື. ໃນຊຸມປີກ່ອນ, ທາງໄປ ອຽນຕື ຍັງລຳບາກ, ລະອິດລະອ້ຽວທີ່ສຸດ, ແຕ່ພະພຸດໄດ້ບັນດານໃຫ້ພວກຂ້າພະເຈົ້າມີສຸຂະພາບເຂັ້ມແຂງຈຶ່ງສາມາດໄປໄດ້”
ຈອມພູເຂົ້າອຽນຕື
(ພາບ: halongsail.)
ໄປນະມັດສະການ ອຽນຕື, ຜູ້ໃດກໍ່ປາຖະໜາຢາກໄດ້ສຳພັດກັບ ວັດດົ່ງ. ຂື້ນມາຮອດແຫ່ງນີ້ ແມ່ນຂື້ນສູ່ໂລກພະລານຫີນ, ໂງ່ນຫີນໃຫຍ່, ນ້ອຍກ່າຍກອງ, ສະຫຼັບກັນສ້າງເປັນຮູບຊົງທີ່ແປກປະຫຼາດຫຼາຍຮູບ. ກ້ອນເມກຂາວກະຈະປົກຄຸມໄປທົ່ວເຂດພູຜາປ່າໄມ້ທີ່ຂຽວອຸ່ມທູ່ມ. ດິນຟ້າອາກາດໜາວເຢັນ, ວັດດົ່ງຄືຫຍໍ້ເຂົ້າ ແລະ ເຕົ້າໂຮມສິ່ງສັກສິດທັງໝົດຂອງດິນຟ້າອາກາດເຂົ້າເປັນໜຶ່ງດຽວ.
ກ້ອນເມກສະຫຼັບ, ກ່າຍກອງກັນ, ປົກຄຸມທັງດິນແລະຟ້າ. ໄປເຖິງ ວັດດົ່ງ, ຜູ້ຄົນທັງຫຼາຍຕ່າງກໍ່ຮູ້ສຶກວ່າຕົນເອງໄດ້ໄປຮອດແດນສະຫວັນ, ປາສະຈາກໂລກມະນຸດ ແລະ ຈິດໃຈກໍ່ສະຫວາດສະເຫວີຍພ້ອມກັບທັດສະນີຍະພາຍທີ່ສວຍງາມຢູ່ທີ່ນີ້.
ສຳຫຼັບ ຮ່າເຟືອງມາຍ, ອາຍຸ 29 ປີ, ເຊິ່ງແມ່ນພະນັກງານຢູ່ມະຫາວິທະຍາໄລແຫ່ງຊາດ ຮ່າໂນ້ຍ ແລ້ວ, ແຕ່ລະເທື່ອ, ເມື່ອໄປຮອດ ອຽນຕື ປຽບເໝືອນໄດ້ສຳພັດກັບຄວາມສະຫງົບສຸກ. ເມື່ອຍ່າງຂຶ້ນຂັ້ນໄດດ້ວຍຫີນບົນເສັ້ນທາງໄປນະມັດສະການ, ລຽບຕາມປ່າໄມ້ຂຽວອຸມທຸ່ມ, ແລະ ໄດ້ຟັງສຽງລະຄັງທີ່ດັງກ້ອງກັງວານນັ້ນ, ໄດ້ເຮັດໃຫ້ນາງຮູ້ສຶກຕື້ນຕັນໃຈຫຼາຍ.
”ເທື່ອທຳອິດທີ່ໄປ ອຽນຕື ກ່ອນນີ້ 5 ປີ, ຂ້າພະເຈົ້າຮູ້ສຶກຕື້ນຕັນໃຈຫຼາຍ, ຈົນເວົ້າບໍ່ອອກ. ມື້ນີ້ແມ່ນເທື່ອທີ 2 ທີ່ຂ້າພະເຈົ້າໄປ ວັດດົ່ງ. ມື້ວານນີ້ໄດ້ໄປແລ້ວ, ແຕ່ມື້ນີ້ຍັງໄປອີກ. ຂ້າພະເຂົ້າໄປ ອຽນຕື ເພື່ອບູຊາພະພຸດ, ເຮັດຄືແນວນັ້ນຂ້າພະເຈົ້າຈຶ່ງຮູ້ສຶກສະຫວາດສະເຫວີຍ ແລະ ອຸ່ນອ່ຽນໃຈ”.
ວັດຕັ້ງຢູ່ຈອມພູອຽນຕື
(ພາບ: dulichhalong)
ໃນ 18 ປີ ຜ່ານມາ, ປີໃດປ້າ ຫງວຽນທິເຕິມ ຢູ່ນະຄອນ ໂຮ່ຈີມິນ ກໍ່ໄປນະມັດສະການ ອຽນຕື ກົງກັບໂອກາດງານບຸນ ອຽນຕືຖືກຈັດຂຶ້ນ.
”ປີໃດຂ້າພະເຈົ້າກໍ່ໄປ ວັດດົ່ງ, ທັງໄປທັງພັກຜ່ອນຢູ່ຕາມໃຕ້ຮົ່ມໄມ້ໃຫຍ່ເພື່ອສູບເອົາອາກາດທີ່ປອດໂປ່ງ ສ້າງພະລັງຕື່ມອີກເພື່ອເດີນໄປຕໍ່. ໃນຊຸມປີມໍ່ໆມານີ້ໄດ້ມີ ກະເຊົ້າ ແລ້ວ, ການໄປມາກໍ່ສະດວກສະບາຍກວ່າ. ປີນີ້ຂ້າພະເຈົ້າມີອາຍຸ 70 ປີແລ້ວ. ພວກຂ້າພະເຈົ້າໄປ ອຽນຕື ດ້ວຍຄວາມເຊື່ອຖື, ຄວາມໄວ້ເນື້ອເຊື່ອໃຈ, ດັ່ງນັ້ນຈຶ່ງໄດ້ຮັບການບັນດານຈາກພະພຸດ”
ນອກຈາກຄວາມເຊື່ອໝັ້ນຢ່າງເດັດຂາດຕໍ່ໂລກຈິດວິນຍານແລ້ວ, ເມື່ອໄປ ອຽນຕື, ແຂກທີ່ມາຈາກທຸກສາລະທິດ ຍັງມີຄວາມປະທັບໃຈຕໍ່ທິວທັດທຳມະຊາດ ກໍ່ຄືສິ່ງແວດລ້ອມຢູ່ທີ່ນີ້. ປ້າ ຕື່ເຕິມດຶກ, ຢູ່ຕາແສງ ຮ່ວາງມາຍ, ນະຄອນ ຮ່າໂນ້ຍ, ໃຫ້ຮູ້ວ່າ:
”ຂ້າພະເຈົ້າເຫັນວ່າ, ທຸກສິ່ງທຸກຢ່າງຢູ່ທີ່ນີ້ລ້ວນແຕ່ໄດ້ຮັບການຮັກສາໄວ້ຢ່າງເປັນລະບຽບຮຽບຮ້ອຍ, ອັນໄດ້ສະແດງໃຫ້ເຫັນຄວາມສຸດຈິດສຸດໃຈຂອງພຸດທະສາສະນິກະຊົນທັງໝົດ ເມື່ອກໍ່ສ້າງເສັ້ນທາງໄປຍັງແດນພະພຸດ ເຈົ້າຊີວິດ ເຈິ່ນເຍິນຕົງ. ປີນີ້, ດິນຟ້າອາກາດເອື້ອອຳນວຍຄວາມສະດວກ, ທຸກສິ່ງທຸກຢ່າງລ້ວນແຕ່ຈົບງາມ. ເມື່ອໄປຍັງ ວັດດົ່ງ ມີນ້ຳໝອກປົກຄຸມຫຼາຍ, ແຕ່ພາຍຫຼັງທຳພິທີສຳເລັດ, ບັນດາພະອາຈານ ເລີ່ມ ທຳການຕີກາ, ນ້ຳໝອກກໍ່ລະລາຍໄປ, ແລະ ອາກາດກໍ່ຄ່ອຍໆໂປ່ງໃສຂຶ້ນ”
ຜ່ານການເວລາກວ່າ 700 ປີ, ມີວັດວາອາຮາມ, ເຈດີ ຫຼາຍແຫ່ງຢູ່ ອຽນຕື ໄດ້ຖືກເປ່ເພ, ມີບາງກິດຈະກຳໄດ້ຮັບການບູລະນະປະຕິສັງຂອນ, ແລະ ສ້ອມແປງຄືນໃໝ່, ແຕ່ບັນດາຄຸນຄ່າດ້ານປະຫວັດສາດ, ວັດທະນະທຳ, ແນວຄິດຂອງ ນິກາຍຈຸກເລິມ ຍັງຄົງໄດ້ຮັບການຮັກສາໄວ້ ແລະ ຍື່ນຍົງຄົງຕົວຢູ່ເທົ້າທຸກວັນນີ້. ໃນແຕ່ລະປີ, ເມື່ອງານບຸນ ອຽນຕື ຖືກຈັດຂຶ້ນນັບແຕ່ວັນທີ 10 ເດືອນຈຽງເຖິງທ້າຍເດືອນ 3 ໄລ່ຕາມຈັນທະປະຕິທິນ, ມີປະຊາຊົນນັບໝື່ນຄົນທີ່ມາຈາກທຸກແຖບຖີ່ນຂອງປະເທດກໍ່ພາກັນໄປນະມັດສະການ ອຽນຕື ເຊິ່ງແມ່ນເຂດພູທີ່ສັກສິດປຽບເໝືອນໄດ້ກັບຄືນສູ່ດິນແດນແຫ່ງກົກເຄົ້າເຫງົ້າກໍຂອງຕົນ.