នៅក្នុងបរិបទនៃការផ្លាស់ប្តូរដ៏ស្មុគស្មាញជាបន្តបន្ទាប់នៅក្នុងតំបន់ និងលើពិភពលោក ការពូនជ្រុំចំណងមិត្តភាព ការបង្កើនកិច្ចសហប្រតិបត្តិការទ្វេភាគី និងការលើកកម្ពស់មជ្ឈភាពរបស់អាស៊ានកំពុងក្លាយជាតម្រូវការរួមរបស់បណ្តាប្រទេសអាស៊ីអាគ្នេយ៍។
ពីមូលដ្ឋាននៃចំណងមិត្តភាព ដល់សក្ដានុភាពថ្មីនៃកិច្ចសហប្រតិបត្តិការ
ដំណើរទស្សនកិច្ចទៅវៀតណាមដោយថ្នាក់ដឹកនាំជាន់ខ្ពស់មកពីប្រទេសឡាវ កម្ពុជា ថៃ និងទីម័រខាងកើត សុទ្ធតែមានសារៈសំខាន់រៀងៗខ្លួន ប៉ុន្តែទាំងអស់នេះត្រូវបានបង្កើតឡើងដោយផ្អែកលើមូលដ្ឋានគ្រឹះនៃចំណងមិត្តភាព ការជឿទុកចិត្ត និងកិច្ចសហប្រតិបត្តិការយូរអង្វែងរវាងវៀតណាម និងបណ្តាប្រទេសក្នុងតំបន់។
សម្រាប់ប្រទេសឡាវ នេះគឺជាទំនាក់ទំនងមិត្តភាពដ៏មហិមា សាមគ្គីភាពពិសេស និងកិច្ចសហប្រតិបត្តិការលើគ្រប់ជ្រុងជ្រោយ ដែលត្រូវបានពូនជ្រុំដោយថ្នាក់ដឹកនាំនិងប្រជាជនជាច្រើនជំនាន់នៃប្រទេសទាំងពីរ។ ក្នុងដំណាក់កាលថ្មី ភាគីទាំងពីរកំពុងខិតខំអនុវត្តន៍ខ្លឹមសារនៃ "ការតភ្ជាប់ជាយុទ្ធសាស្ត្រ" នាំទំនាក់ទំនងទ្វេភាគីអភិវឌ្ឍន៍កាន់តែជាក់ស្តែងនិងស៊ីជម្រៅថែមទៀត។ ឯកអគ្គរដ្ឋទូតវៀតណាមប្រចាំនៅឡាវ លោក ង្វៀន មិញ តឹម បានសង្កត់ធ្ងន់ថា៖ «ដំណើរទស្សនកិច្ចនេះបន្តបញ្ជាក់ពីភាពស៊ីសង្វាក់គ្នារបស់ថ្នាក់ដឹកនាំជាន់ខ្ពស់នៃប្រទេសទាំងពីរ ក្នុងការពូនជ្រុំទំនាក់ទំនងវៀតណាម-ឡាវ ឱ្យអភិវឌ្ឍកាន់តែស៊ីជម្រៅ ជាក់ស្តែង និងមានប្រសិទ្ធភាពលើគ្រប់វិស័យ; ទន្ទឹមនឹងនោះ អនុវត្តន៍ជាក់ស្តែងនូវខ្លឹមសារនៃ "ការតភ្ជាប់ជាយុទ្ធសាស្ត្រ” រវាងប្រទេសទាំងពីរ។ នៅក្នុងបរិបទនៃការផ្លាស់ប្តូរភូមិសាស្ត្រនយោបាយ ភូមិសាស្ត្រសេដ្ឋកិច្ច និងបច្ចេកវិទ្យាយ៉ាងខ្លាំងនៅទូទាំងពិភពលោក និងក្នុងតំបន់ ដំណើរទស្សនកិច្ចនេះ បានបញ្ជូនសារយ៉ាងច្បាស់លាស់ថា វៀតណាម និងឡាវនឹងបន្តរួមដំណើរជាមួយគ្នា ចែករំលែកផលប្រយោជន៍ជាយុទ្ធសាស្ត្រ គាំទ្រគ្នាទៅវិញទៅមកក្នុងការអភិវឌ្ឍប្រទេសជាតិ និងសម្របសម្រួលយ៉ាងជិតស្និទ្ធដើម្បីដោះស្រាយបញ្ហាប្រឈមរួមប្រកបដោយប្រសិទ្ធភាព»។
ទំនាក់ទំនងវៀតណាម-កម្ពុជាក៏កំពុងចូលដល់ដំណាក់កាលអភិវឌ្ឍន៍ថ្មីជាមួយនឹងកិច្ចសហប្រតិបត្តិការកាន់តែស៊ីជម្រៅផងដែរ។ ជំនួបប្រាស្រ័យជាប្រចាំរវាងថ្នាក់ដឹកនាំជាន់ខ្ពស់នៃប្រទេសទាំងពីរនាពេលកថ្មីៗនេះ បានបន្តពង្រឹងទំនុកចិត្តនយោបាយ និងពង្រីកកិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម វិនិយោគ និងការផ្លាស់ប្តូររវាងប្រជាជននិងប្រជាជន។ លោក សូ ណារ៉ូ រដ្ឋមន្រ្តីប្រតិភូអមនាយករដ្ឋមន្រ្តី ហ៊ុន ម៉ាណែត បានបញ្ជាក់ថា៖
ឆ្នាំ២០២៦ ក៏ជាខួបលើកទី៥០ នៃការបង្កើតទំនាក់ទំនងការទូតរវាងវៀតណាម និងថៃ (១៩៧៦-២០២៦)។ បន្ទាប់ពីការអភិវឌ្ឍកន្លះសតវត្សរ៍ ប្រទេសទាំងពីរបានក្លាយជាដៃគូយុទ្ធសាស្ត្រដ៏ទូលំទូលាយ និងជាដៃគូសេដ្ឋកិច្ចឈានមុខគេរបស់គ្នាទៅវិញទៅមកនៅក្នុងអាស៊ាន។ ដោយផ្អែកលើផែនការសកម្មភាពសម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយ ឆ្នាំ២០២៦-២០៣១ ភាគីទាំងពីរមានគោលបំណងពង្រីកកិច្ចសហប្រតិបត្តិការក្នុងវិស័យថ្មីៗដូចជា៖ ការតភ្ជាប់គមនាគមន៍ ឡូជីស្ទិក ខ្សែសង្វាក់ផ្គត់ផ្គង់ សេដ្ឋកិច្ចឌីជីថល នវានុវត្តន៍ ថាមពលកកើតឡើងវិញ និងការអភិវឌ្ឍធនធានមនុស្សមានគុណភាពខ្ពស់។
ទន្ទឹមនឹងនោះ ទំនាក់ទំនងវៀតណាម-ទីម័រខាងកើតកំពុងចូលដល់ដំណាក់កាលអភិវឌ្ឍន៍ថ្មី រួមជាមួយនឹងដំណើរការធ្វើសមាហរណកម្មអាស៊ាន របស់ប្រទេសវ័យក្មេងបំផុតនៅអាស៊ីអាគ្នេយ៍។ យោងតាមលោក ផាម ប៊ិញ ដាម ភារធារីវៀតណាមប្រចាំទីម័រខាងកើតបានឱ្យដឹងថា បច្ចុប្បន្ននេះ ប្រទេសទាំងពីរមានលក្ខខណ្ឌអំណោយផលជាច្រើនដើម្បីប្រែក្លាយទំនុកចិត្តនយោបាយទៅជាកម្មវិធីសហប្រតិបត្តិការជាក់ស្តែងក្នុងវិស័យកសិកម្ម សន្តិសុខស្បៀងអាហារ ពាណិជ្ជកម្ម វិនិយោគ ការអប់រំ និងបណ្តុះបណ្តាល និងការផ្លាស់ប្តូរឌីជីថល។
រួមដំណើរជាមួយគំនិតផ្តួចផ្តើមរបស់វៀតណាមដើម្បីអនាគតអាស៊ាន
រួមជាមួយនឹងសកម្មភាពការទូតទ្វេភាគី ក្នុងអំឡុងពេលដំណើរទស្សនកិច្ចនៅវៀតណាម មេដឹកនាំជាន់ខ្ពស់នៃបណ្តាប្រទេសបានចូលរួមក្នុងវេទិកាអនាគតអាស៊ានលើកទីបីនៅទីក្រុងហាណូយ។ ការចូលរួមរបស់ថ្នាក់ដឹកនាំប្រទេសទាំងនេះ បានបង្ហាញពីការគាំទ្រចំពោះគំនិតផ្តួចផ្តើមដែលវៀតណាមបានស្នើរឡើងក្នុងឆ្នាំ ២០២៣ និងឆ្លុះបញ្ចាំងពីទំនុកចិត្តកាន់តែខ្លាំងឡើងលើតួនាទីតភ្ជាប់ និងការចូលរួមចំណែករបស់វៀតណាមដល់ដំណើរការនានាក្នុងតំបន់។ ឯកអគ្គរដ្ឋទូតវៀតណាមប្រចាំនៅថៃ លោក ផាំ វៀតហុង បានចាត់ទុកថា៖ «ការដែលនាយករដ្ឋមន្ត្រីថៃបានចូលរួមដោយផ្ទាល់នៅក្នុងវេទិកាអនាគតអាស៊ានលើកនេះ បង្ហាញពីការយកចិត្តទុកដាក់របស់ថៃ ចំពោះទំនាក់ទំនងទ្វេភាគីជាមួយវៀតណាម ក៏ដូចជាគំនិតផ្តួចផ្តើមរបស់ប្រទេសនានា រួមទាំងវៀតណាម ក្នុងការជំរុញកិច្ចសន្ទនា និងដំណោះស្រាយរួមសម្រាប់អាស៊ាន ដើម្បីដោះស្រាយបញ្ហាប្រឈមនាពេលបច្ចុប្បន្ន និងកសាងសហគមន៍អាស៊ានសាមគ្គីភាព និងកាន់តែរឹងមាំនាពេលអនាគត»។
សកម្មភាពការទូតទាំងនេះបង្ហាញពីការទទួលស្គាល់ដោយប្រទេសជិតខាងចំពោះការរួមចំណែកជាវិជ្ជមានកាន់តែខ្លាំងឡើងរបស់វៀតណាមក្នុងការជំរុញកិច្ចសន្ទនា ពង្រឹងសាមគ្គីភាពក្នុងតំបន់ និងរួមជាមួយប្រទេសសមាជិក ដើម្បីកសាងអាស៊ានដ៏រឹងមាំ ស្វាហាប់ និងអភិវឌ្ឍប្រកបដោយចីរភាព៕
