ធ្វើឲ្យសុក្រិតស្ថាប័នបើកផ្លូវសម្រាប់ការអភិវឌ្ឍ

ខ្លឹមសារចំនួន ៣៣ ដែលត្រូវបានរដ្ឋសភាលើកមកពិចារណា នៅក្នុងសម័យប្រជុំនេះ មិនត្រឹមតែឆ្លុះបញ្ចាំងពីចំនួនការងារដ៏ច្រើនប៉ុណ្ណោះទេ ប៉ុន្តែក៏បង្ហាញពីតម្រូវការបន្ទាន់ក្នុងការកែលម្អស្ថាប័ន ដើម្បីដោះស្រាយបញ្ហាជាក់ស្តែងដែលកំពុងកើតមាន ខណៈពេលដែលបង្កើតមូលដ្ឋានគ្រឹះផ្នែកច្បាប់សម្រាប់ដំណាក់កាលអភិវឌ្ឍន៍ជាបន្តរបស់ប្រទេសជាតិ។

មិនទុកឲ្យស្ថាប័នក្លាយទៅជាចំណុចកក់ស្ទះ

សម័យប្រជុំវិសាមញ្ញលើកដំបូងនៃរដ្ឋសភានីតិកាលទី១៦ កំពុងត្រូវបានប្រារព្ធឡើងនៅក្នុងបរិបទដែលប្រទេសទាំងមូល កំពុងខិតខំសម្រេចបានកំណើនពីរខ្ទង់នៅឆ្នាំ២០២៦ និងឆ្នាំបន្តបន្ទាប់។ ដើម្បីសម្រេចគោលដៅនោះ ក្រៅពីប្រភពធនធាន ហេដ្ឋារចនាសម្ព័ន្ធ និងវិទ្យាសាស្ត្របច្ចេកវិទ្យា តម្រូវការបន្ទាន់មួយគឺត្រូវអនុវត្តន៍ជាក់ស្តែងរាល់គោលការណ៍ណែនាំរបស់បក្សទៅជាបទប្បញ្ញត្តិផ្នែកច្បាប់ដែលអាចដំណើរការបាន។ ដូច្នេះ បញ្ហាជាច្រើនដែលប៉ះពាល់ដោយផ្ទាល់ទៅលើបរិយាកាសវិនិយោគ ការអភិវឌ្ឍហេដ្ឋារចនាសម្ព័ន្ធ ការកែទម្រង់នីតិវិធីរដ្ឋបាល រចនាសម្ព័ន្ធអង្គការ និងគំរូអាជ្ញាធរបីកម្រិត កំពុងត្រូវបានរដ្ឋសភាពិចារណានៅក្នុងសម័យប្រជុំនេះ។

មិនត្រឹមតែធ្វើការពិនិត្យ ធ្វើវិសោធនកម្មនិងបំពេញបន្ថែមច្បាប់សំខាន់ៗមួយចំនួន ឬការសម្រេចចិត្តលើគម្រោងធំៗ សម័យប្រជុំនេះ ក៏បង្ហាញពីការប្តេជ្ញាចិត្តក្នុងការពន្លឿនដំណើរការស្ថាប័នភាវូបនីយកម្ម ដើម្បីឱ្យគោលការណ៍ណែនាំ និងគោលនយោបាយអាចក្លាយជាមូលដ្ឋានច្បាប់សម្រាប់ការអភិវឌ្ឍក្នុងពេលឆាប់ៗនេះ។ នៅក្នុងសុន្ទរកថាបើកសម័យប្រជុំ ប្រធានរដ្ឋសភា លោកជិនថាញ់ មិន បានសង្កត់ធ្ងន់ថា៖ “ជាមួយនឹងភារកិច្ចស្នូលគឺការងារនីតិបញ្ញត្តិ និងការសម្រេចចិត្តលើបញ្ហា សំខាន់ៗរបស់ប្រទេសជាតិ តាមតម្រូវការជាក់ស្តែង សម័យប្រជុំនេះបង្ហាញពីការប្តេជ្ញាចិត្តខាងនយោបាយ ស្មារតីសកម្ម និងសកម្មភាពសម្រេចចិត្តជាក់ស្តែងរបស់រដ្ឋសភា រដ្ឋាភិបាល និងស្ថាប័ននានាក្នុងការធ្វើសុក្រិតស្ថាប័ន និងអនុវត្តគោលនយោបាយរបស់បក្សភ្លាមៗ បំពេញតាមតម្រូវការ និងសេចក្តីប្រាថ្នារបស់ប្រជាជននិងអាជីវកម្ម ដោយមិនពន្យារពេល និងមិនខកខានឱកាសសម្រាប់ការអភិវឌ្ឍប្រទេសជាតិ។ ក្នុងពេលជាមួយគ្នានេះ រដ្ឋសភា រដ្ឋាភិបាល ក្រសួង វិស័យ និងមូលដ្ឋាននានា ត្រូវអនុវត្តជាបន្ទាន់នូវសេចក្តីសន្និដ្ឋានលេខ ១៧ របស់ការិយាល័យនយោបាយ និងទិសដៅនីតិបញ្ញត្តិសម្រាប់អាណត្តិរដ្ឋសភាលើកទី ១៦ ដោយធានាអំពីតម្រូវការគុណភាព និងវឌ្ឍនភាពដែលបានដាក់ចេញ”។

នៅក្នុងបរិបទនៃតម្រូវការអភិវឌ្ឍន៍កាន់តែបន្ទាន់ ការធ្វើសុក្រិតក្របខ័ណ្ឌស្ថាប័នមិនគ្រាន់តែជាកិច្ចការនៃការតាក់តែងច្បាប់ទៀតហើយ ប៉ុន្តែបានក្លាយជាលក្ខខណ្ឌសម្រាប់ការអនុវត្តគោលនយោបាយអភិវឌ្ឍន៍ទាន់ពេលវេលា និងមានប្រសិទ្ធភាព។ លោក ង្វៀន ទ្រឿង យ៉ាង អនុប្រធានគណៈកម្មាធិការច្បាប់ និងយុត្តិធម៌នៃរដ្ឋសភា បានឲ្យដឹងថា៖ “រាល់សេចក្តីព្រាងច្បាប់ និងសេចក្តីសម្រេចដែលបានរដ្ឋាភិបាលនិងស្ថាប័ននានាដាក់ជូនរដ្ឋសភា សុទ្ធតែជាបញ្ហាបន្ទាន់ ហើយត្រូវបានរៀបចំយ៉ាងយកចិត្តទុកដាក់។ ដូច្នេះ រដ្ឋសភាបើកសម័យប្រជុំវិសាមញ្ញមួយនៅខែសីហានេះ ដើម្បីឆ្លើយតបទៅនឹងតម្រូវការនៃជីវភាព តម្រូវការនៃការគ្រប់គ្រងសង្គម និងតម្រូវការនៃការអភិវឌ្ឍសេដ្ឋកិច្ចសង្គមរបស់ប្រទេសជាតិ”។

បង្កើតស្ថាប័នសម្រាប់ការអភិវឌ្ឍ

ប្រសិនបើការរៀបចំសម័យប្រជុំវិសាមញ្ញបង្ហាញពីការឆ្លើយតបយ៉ាងសកម្មរបស់រដ្ឋសភាចំពោះតម្រូវការនៃការអនុវត្ត នោះគោលដៅខ្ពស់ជាងនេះមិនត្រឹមតែជាការចេញផ្សាយច្បាប់ឱ្យបានឆាប់រហ័សប៉ុណ្ណោះទេ ប៉ុន្តែថែមទាំងត្រូវកែលម្អគុណភាពនៃការសម្រេចចិត្តនីតិបញ្ញត្តិនីមួយៗផងដែរ។ ច្បាប់មួយមានអត្ថន័យពិតប្រាកដលុះត្រាតែច្បាប់នោះដោះស្រាយបញ្ហាជាក់ស្តែង ហើយអាចមានប្រសិទ្ធភាពភ្លាមៗបន្ទាប់ពីបានចូលជាធរមាន។ ដូច្នេះ ដើម្បីសម្រេចគោលដៅនេះ ​យោងតាមប្រធានរដ្ឋសភាលោកជិន ថាញ់ មិន បានបញ្ជាក់ថា៖ “ខ្ញុំស្នើឱ្យស្ថាប័ននានារបស់រដ្ឋសភា និងតំណាងរដ្ឋសភានីមួយៗ បន្តច្នៃប្រឌិតយ៉ាងខ្លាំងនូវការត្រិះរិះរបស់ពួកគេក្នុងការកសាងច្បាប់។ គោលនយោបាយ និងច្បាប់គួរតែត្រូវបានអនុម័តតាមរបៀបដែលឆ្លុះបញ្ចាំងពីការពិតយ៉ាងពិតប្រាកដ។ ជាមួយគ្នានោះ គួរតែដាក់ប្រជាជន និងអាជីវកម្មនៅកណ្តាល ហើយប្រើប្រាស់គុណភាព និងប្រសិទ្ធភាពនៃការអនុវត្តប្រព័ន្ធច្បាប់ជារង្វាស់នៃសកម្មភាពនីតិបញ្ញត្តិ។ មូលដ្ឋានច្បាប់គួរតែត្រូវបានធ្វើសុក្រិត ដើម្បីដោះស្រាយបញ្ហាបន្ទាន់ដែលកើតចេញពីការអនុវត្តប្រកបដោយប្រសិទ្ធភាព។ តួនាទី និងការទទួលខុសត្រូវរបស់ស្ថាប័ននីមួយៗ និងអ្នកដឹកនាំរបស់ខ្លួនគួរតែត្រូវបានបង្កើនឱ្យដល់កម្រិតអតិបរមានៅក្នុងដំណើរការនៃការអភិវឌ្ឍ និងអនុម័តគោលនយោបាយ និងច្បាប់ ជាពិសេសភ្នាក់ងាររៀបចំសេចក្តីព្រាង និងពិនិត្យឡើងវិញ”។

តម្រូវការសម្រាប់ការច្នៃប្រឌិតថ្មីក្នុងការត្រិះរិះអំពីនីតិបញ្ញត្តិបង្ហាញថា ចំណុចសំខាន់លែងផ្តោតលើបរិមាណច្បាប់ និងសេចក្តីសម្រេចដែលបានអនុម័តទៀតហើយ ប៉ុន្តែផ្តោតលើគុណភាព និងប្រសិទ្ធភាពនៃការអនុវត្តគោលនយោបាយនីមួយៗបន្ទាប់ពីការប្រកាសចេញជាធរមាន។ ប្រការនេះទាមទារឱ្យសេចក្តីព្រាងច្បាប់នីមួយៗត្រូវបានរៀបចំយ៉ាងល្អិតល្អន់ ផលប៉ះពាល់គឺត្រូវបានវាយតម្លៃយ៉ាងពេញលេញ ច្បាមជាប់នឹងតម្រូវការជាក់ស្តែងពីដំណាក់កាលធ្វើគោលនយោបាយ។ មានតែនៅពេលដែលច្បាប់ពិតជាដោះស្រាយបញ្ហាជីវភាពរស

នៅ​ដល់ប្រជាពលរដ្ឋ និងអាជីវកម្ម និងដោះសោធនធានអភិវឌ្ឍន៍ប៉ុណ្ណោះ ទើបសកម្មភាពនីតិបញ្ញត្តិនឹងសម្រេចគោលដៅស្ថាបនាដែលរដ្ឋសភាកំពុងឆ្ពោះទៅ។

ជាមួយនឹងខ្លឹមសារដែលបានបង្ហាញសម្រាប់ការពិចារណា និងការសម្រេចចិត្ត សម័យប្រជុំវិសាមញ្ញ លើកដំបូងរបស់រដ្ឋសភាបានបញ្ជាក់បន្ថែមទៀតអំពីស្មារតីសកម្ម និងច្នៃប្រឌិតរបស់រដ្ឋសភាក្នុងការងារនីតិបញ្ញត្តិ ដោយធានាថា ក្របខ័ណ្ឌស្ថាប័នតែងតែតាមទាន់​តម្រូវការអភិវឌ្ឍន៍របស់ប្រទេសជាតិ៕