ដោយប្រព្រឹត្តទៅក្នុងបរិបទដែលវៀតណាមអនុវត្តយ៉ាងសកម្មនូវការតម្រងទិសគោលនយោបាយការបរទេសនៃមហាសន្និបាតលើកទី១៤ របស់បក្ស និងសេចក្តីសម្រេចចិត្តលេខ ០៦ របស់ការិយាល័យនយោបាយស្តីពីការអនុវត្តការតម្រងទិសគោលនយោបាយការបរទេសនៃមហាសន្និបាតលើកទី១៤ របស់បក្ស ដំណើរទស្សនកិច្ចនេះបានប្រែក្លាយការប្តេជ្ញាចិត្តនយោបាយកម្រិតខ្ពស់ ទៅជាកិច្ចសហប្រតិបត្តិការប្រកបដោយប្រសិទ្ធភាពនិងជាក់ស្តែង យកកំណែទម្រង់ស្ថាប័ននីតិប្បញ្ញត្តិ និងការតភ្ជាប់ខ្សែសង្វាក់តម្លៃជាកម្លាំងចលករស្នូល។
ការទូតសភាជំរុញការអនុវត្តកិច្ចព្រមព្រៀងសហប្រតិបត្តិការ
លទ្ធផលលេចធ្លោនៃដំណើរទស្សនកិច្ចជាផ្លូវការរបស់លោកប្រធានរដ្ឋសភា ជិន ថាញ់មិន បានបង្ហាញយ៉ាងច្បាស់ពីតួនាទីរបស់ការទូតសភាក្នុងការជំរុញការអនុវត្តកិច្ចព្រមព្រៀងកម្រិតខ្ពស់។
នៅកូរ៉េខាងត្បូង ដំណើរទស្សនកិច្ចរបស់ប្រធានរដ្ឋសភាទៅកាន់ទីក្រុងសេអ៊ូល បានអនុវត្តន៍ជាក់ស្តែងនូវសេចក្តីថ្លែងការណ៍រួមស្តីពីភាពជាដៃគូយុទ្ធសាស្ត្រ គ្រប់ជ្រុងជ្រោយ វៀតណាម-កូរ៉េខាងត្បូង; អនុស្សរណៈនៃកិច្ចសហប្រតិបត្តិការដែលបានចុះហត្ថលេខាក្នុងខែវិច្ឆិកា ឆ្នាំ ២០២៥ ក៏ត្រូវបានដាក់ឱ្យអនុវត្តជាក់ស្តែង។ នៅក្នុងកិច្ចពិភាក្សាជាមួយលោកប្រធានរដ្ឋសភា Cho Jeong Sik ជំនួបសាវនាការជាមួយលោកនាយករដ្ឋមន្ត្រី Han Seong Sook និងវគ្គធ្វើការជាមួយសារជីវកម្មសេដ្ឋកិច្ចឈានមុខគេ (Samsung, LG, Hyosung, Doosan Enerbility, Lotte, Hyundai Motor, Hanwha) ប្រធានរដ្ឋសភាវៀតណាមបានផ្ញើសារដ៏រឹងមាំថា៖ វៀតណាមប្តេជ្ញាបង្កើតបរិយាកាសផ្លូវច្បាប់ប្រកបដោយតតម្លាភាពនិងស្ថិរភាព ដោយត្រៀមខ្លួនជាស្រេចសម្រាប់ស្វាគមន៍លំហូរវិនិយោគដែលមានបច្ចេកវិទ្យាខ្ពស់។
នៅប្រទេសម៉ុងហ្គោលី ដំណើរទស្សនកិច្ចរបស់លោកប្រធានរដ្ឋសភាក្រោយរយៈពេល ២៣ឆ្នាំ មានអត្ថន័យជាប្រវត្តិសាស្ត្រ។ ការចុះហត្ថលេខាលើអនុស្សរណៈនៃកិច្ចសហប្រតិបត្តិការរវាងរដ្ឋសភាទាំងពីរ និងរវាងខុទ្ទកាល័យរដ្ឋសភាទាំងពីរ បានធ្វើស្ថាប័នភាវូបនីយកម្មនូវក្របខ័ណ្ឌភាពជាដៃគូលើគ្រប់ជ្រុងជ្រោយ ដែលបានបង្កើតឡើងក្នុងឆ្នាំ ២០២៤។ ជាពិសេស ភាគីទាំងពីរបានយល់ព្រមសហការគ្នាក្នុងការអនុវត្តបញ្ញាសិប្បនិម្មិត (AI) និងការផ្លាស់ប្តូរឌីជីថលក្នុងអភិបាលកិច្ចសភា ដោយមានគោលបំណងលើកកម្ពស់ប្រសិទ្ធភាព និងគុណភាពនៃប្រតិបត្តិការសភា; គាំទ្រគម្រោងរួមគ្នា ការស្រាវជ្រាវ គំនិតផ្តួចផ្តើមសាកល្បង និងអនុវត្តជាក់ស្តែង ដោយឆ្ពោះទៅរកការអភិវឌ្ឍដំណោះស្រាយសភាឌីជីថល។
លទ្ធផលនៃដំណើរទស្សនកិច្ចនេះបានបំពេញតាមការរំពឹងទុករបស់អនុរដ្ឋមន្ត្រីអចិន្ត្រៃយ៍ក្រសួងការបរទេសវៀតណាម លោក ង្វៀន មិញវ៉ូ៖
«ការទូតសភាកម្រិតខ្ពស់មិនត្រឹមតែជាការបង្កើតក្របខ័ណ្ឌច្បាប់អំណោយផលសម្រាប់កិច្ចសហប្រតិបត្តិការប៉ុណ្ណោះទេ ប៉ុន្តែក៏ជាបណ្តាញមួយដើម្បីលើកកម្ពស់ និងពន្លឿនការអនុវត្តកិច្ចព្រមព្រៀងសហប្រតិបត្តិការ ចែករំលែកបទពិសោធន៍ក្នុងការកសាងច្បាប់ ការកែលម្អស្ថាប័ន និងអភិបាលកិច្ចជាតិ ហើយក៏ជំរុញការប្តេជ្ញាចិត្តខាងនយោបាយឱ្យក្លាយទៅជាកិច្ចសហប្រតិបត្តិការប្រកបដោយប្រសិទ្ធភាព និងមានអត្ថប្រយោជន៍សម្រាប់ប្រជាជន និងសហគ្រាសផងដែរ។»
ចូលរួមចំណែកកំណត់ទីតាំងរបស់សហគ្រាសវៀតណាម នៅក្នុងគម្រោង សឺមីកុងឌុចទ័រនិងបញ្ញាសិប្បនិម្មិត
ភាពជោគជ័យនៃដំណើរទស្សនកិច្ចជាផ្លូវការទៅកាន់ប្រទេសកូរ៉េខាងត្បូង និងម៉ុងហ្គោលីរបស់លោកប្រធានរដ្ឋសភា ជិន ថាញ់មិន ក៏ត្រូវបានបង្ហាញពីការបង្កើនប្រសិទ្ធភាពនៃកិច្ចសហប្រតិបត្តិការរបស់សហគ្រាសវៀតណាមនៅក្នុងខ្សែសង្វាក់តម្លៃសកលផងដែរ។
នៅកូរ៉េខាងត្បូង ប្រមុខរដ្ឋសភាវៀតណាមបានបញ្ជាក់ពីការលើកទឹកចិត្តដល់សាជីវកម្មកូរ៉េឱ្យពង្រីកការវិនិយោគនៅវៀតណាម ក្នុងវិស័យហេដ្ឋារចនាសម្ព័ន្ធ ថាមពលបៃតង និងមជ្ឈមណ្ឌលទិន្នន័យ។ ទន្ទឹមនឹងនោះ រួមគ្នាស្រាវជ្រាវ និងអភិវឌ្ឍន៍ ដោយផ្លាស់ប្តូរពីគំរូ "កូរ៉េខាងត្បូងវិនិយោគ - វៀតណាមផ្គត់ផ្គង់" ទៅជាការស្រាវជ្រាវ ការអភិវឌ្ឍ និងការធ្វើពាណិជ្ជកម្មផលិតផលរួមគ្នា។
ជំនួបរវាងលោកប្រធានរដ្ឋសភា ជិន ថាញ់មិន ជាមួយបណ្តាញនវានុវត្តន៍និងអ្នកជំនាញវៀតណាមនៅទីក្រុងសេអ៊ូល មានសារៈសំខាន់ជាយុទ្ធសាស្ត្រយ៉ាងខ្លាំង។ បណ្តាញនេះ មានបញ្ញវន្តជាង ២.០០០នាក់មកពីបណ្តាញមួយដែលឧបត្ថម្ភដោយមជ្ឈមណ្ឌលនវានុវត្តន៍ជាតិ (NIC) ត្រូវបានចាត់ទុកជា "ដៃពង្រីក" សម្រាប់កិច្ចសហប្រតិបត្តិការបច្ចេកវិទ្យា។ ការប្តេជ្ញាចិត្តរបស់រដ្ឋសភាក្នុងការផ្ទៀងស្តាប់ ការអនុម័តលើក្របខ័ណ្ឌសាកល្បង (ប្រអប់ខ្សាច់) និងការទទួលយកហានិភ័យវិទ្យាសាស្ត្រដែលមានការគ្រប់គ្រង គឺជាគន្លឹះក្នុងការលុបបំបាត់ឧបសគ្គ និងប្រែក្លាយលទ្ធផលស្រាវជ្រាវនិងអភិវឌ្ឍន៍ទៅជាសមត្ថភាពផលិតកម្មជាក់ស្តែងយ៉ាងឆាប់រហ័ស។ ដោយវាយតម្លៃពីទស្សនវិស័យសម្រាប់កិច្ចសហប្រតិបត្តិការវៀតណាម-កូរ៉េខាងត្បូង លោក Lee Hongbae នាយកសាខាវៀតណាមរបស់ក្រុមហ៊ុនច្បាប់ Yulchon បានសម្តែងថា៖
«ការប្តេជ្ញាចិត្តយ៉ាងរឹងមាំ និងស៊ីសង្វាក់គ្នារបស់វៀតណាមចំពោះគោលនយោបាយកំណែទម្រង់និងបើកចំហរ ក៏ដូចជាការអភិវឌ្ឍសេដ្ឋកិច្ច គឺជាចំណុចវិជ្ជមានដ៏ធំមួយ។ ការតម្រងទិសគោលនយោបាយនេះ បានផ្ញើរសារដ៏ច្បាស់លាស់ និងវិជ្ជមានទៅកាន់ សហគមន៍វិនិយោគិន។ ជាពិសេស វៀតណាមកំពុងជំរុញកំណែទម្រង់រដ្ឋបាលជាបន្តបន្ទាប់ និងអនុវត្តគម្រោងវិនិយោគហេដ្ឋារចនាសម្ព័ន្ធទ្រង់ទ្រាយធំ ដើម្បីបង្កើតលក្ខខណ្ឌអំណោយផលសម្រាប់ការអភិវឌ្ឍសហគ្រាស។»
ភាពជោគជ័យនៃដំណើរទស្សនកិច្ចជាផ្លូវការរបស់លោកប្រធានរដ្ឋសភា ជិន ថាញ់មិន ទៅកាន់កូរ៉េខាងត្បូង និងម៉ុងហ្គោលី បានបញ្ជាក់ពីវិធីសាស្រ្តការទូតសភាប្រកបដោយភាពសកម្ម បត់បែន និងស្ថាបនា។ តាមរយៈការតភ្ជាប់ស្ថាប័ននីតិបញ្ញត្តិជាមួយនឹងតម្រូវការសហប្រតិបត្តិការជាក់ស្តែង ដំណើរទស្សនកិច្ចនេះមិនត្រឹមតែបានពង្រឹងទំនុកចិត្តនយោបាយយ៉ាងរឹងមាំប៉ុណ្ណោះទេ ថែមទាំងបានបើកចេញលំហអភិវឌ្ឍថ្មី ធ្វើឱ្យក្របខ័ណ្ឌភាពជាដៃគូកាន់តែស៊ីជម្រៅ និងបម្រើដល់ការអភិវឌ្ឍយ៉ាងឆាប់រហ័ស និងប្រកបដោយចីរភាពរបស់ប្រទេសជាតិ៕
