នេះគឺជាដំណើរទស្សនកិច្ចផ្លូវការលើកដំបូងរបស់លោកប្រធានាធិបតី មីន អ៊ុង ឡាំង មកកាន់ប្រទេសវៀតណាម ចាប់តាំងពីប្រទេសមីយ៉ាន់ម៉ាបានបញ្ចប់ការបោះឆ្នោតសកលនិងបង្កើតរដ្ឋាភិបាលថ្មីនៅក្នុងខែមេសា ឆ្នាំ២០២៦មក។ ដំណើរទស្សនកិច្ចនេះ បានធ្វើឡើងក្នុងបរិបទដែលវៀតណាមនិងមីយ៉ាន់ម៉ាកំពុងរក្សានិងពង្រីកទំនាក់ទំនងលើវិស័យជាច្រើន ដោយបើកចេញឱកាសសម្រាប់ភាគីទាំងពីរក្នុងការពង្រឹងទំនុកចិត្ត បង្កើនការតភ្ជាប់ និងពង្រីកកិច្ចសហប្រតិបត្តិការជាក់ស្តែង។
មូលដ្ឋានគ្រឹះសម្រាប់ទំនាក់ទំនងដ៏រឹងមាំ
វៀតណាម និងមីយ៉ាន់ម៉ា បានបង្កើតទំនាក់ទំនងការទូតជាផ្លូវការនៅថ្ងៃទី២៨ ខែឧសភា ឆ្នាំ១៩៧៥ ប៉ុន្តែចំណងមិត្តភាពរវាងប្រជាជាតិទាំងពីរត្រូវបានបង្កើតឡើងតាំងពីយូរយារណាស់មកហើយ។ វៀតណាមមានការិយាល័យតំណាងប្រចាំនៅទីក្រុង Yangon ចាប់តាំងពីឆ្នាំ១៩៤៧មក។ ដំណើរទស្សនកិច្ចរបស់នាយករដ្ឋមន្ត្រីមីយ៉ាន់ម៉ា លោក U Nu ទៅកាន់វៀតណាមក្នុងឆ្នាំ១៩៥៤ និងដំណើរទស្សនកិច្ចរបស់លោកប្រធានហូជីមិញមកកាន់មីយ៉ាន់ម៉ាក្នុងឆ្នាំ១៩៥៨ គឺជាព្រឹត្តិការណ៍សំខាន់ៗ ដែលរួមចំណែកដល់ការដាក់គ្រឹះសម្រាប់ទំនាក់ទំនងទ្វេភាគី។ រយៈពេលជាង ៥ សវត្សរ៍ ឆ្លងកាត់ការឡើងចុះជាច្រើន ទំនាក់ទំនងរវាងប្រទេសទាំងពីរបន្តត្រូវបានរក្សា និងអភិវឌ្ឍ។ ឯកអគ្គរដ្ឋទូតវៀតណាមប្រចាំនៅមីយ៉ាន់ម៉ា លោក ង្វៀន អាញ ឌឹក បានថ្លែងថា៖ «វៀតណាម និងមីយ៉ាន់ម៉ាមានទំនាក់ទំនងសាមគ្គីភាព និងផ្សារភ្ជាប់យ៉ាងជិតស្និទ្ធចាប់តាំងពីឆ្នាំដំបូងដែលវៀតណាមទទួលបានឯករាជ្យមក និងបានបង្កើតទំនាក់ទំនងការទូតជាផ្លូវការនៅឆ្នាំ១៩៧៥។ ភាគីទាំងពីរបានលើកកម្ពស់ទៅជាក្របខ័ណ្ឌភាពជាដៃគូលើគ្រប់ជ្រុងជ្រោយក្នុងអំឡុងពេលដំណើរទស្សនកិច្ចជាផ្លូវការនៅមីយ៉ាន់ម៉ារបស់លោកអគ្គលេខាបក្ស ង្វៀន ភូទ្រុង ក្នុងឆ្នាំ២០១៧។»
ក្នុងដំណើរអភិវឌ្ឍរបស់ខ្លួន ប្រទេសទាំងពីរមានភាពស្រដៀងគ្នាជាច្រើននៅក្នុងវប្បធម៌ និងប្រវត្តិសាស្ត្រ ជាពិសេសនៅក្នុងប្រពៃណីនៃការតស៊ូដណ្ដើមឯករាជ្យជាតិ។ ដោយផ្អែកលើមូលដ្ឋាននោះ ក្របខ័ណ្ឌភាពជាដៃគូលើគ្រប់ជ្រុងជ្រោយបន្តបើកចេញឱកាសសម្រាប់ប្រទេសទាំងពីរ ដើម្បីអភិវឌ្ឍទំនាក់ទំនងបន្ថែមទៀត។ ទំនាក់ទំនងទ្វេភាគីនៅតែបន្តរក្សាតាមរយៈការផ្លាស់ប្តូរ និងបណ្តាញទំនាក់ទំនង; កិច្ចសហប្រតិបត្តិការបានពង្រីកនៅក្នុងវិស័យសន្តិសុខ និងការពារជាតិ វប្បធម៌ ការអប់រំ និងបណ្តុះបណ្តាល ទេសចរណ៍ ការផ្លាស់ប្ដូររវាងប្រជាជន និងប្រជាជន ក៏ដូចជាកិច្ចសហប្រតិបត្តិការតាមរយៈកាណាល់បក្ស និងរដ្ឋសភា។
ក្នុងនោះ កិច្ចសហប្រតិបត្តិការសេដ្ឋកិច្ច និងពាណិជ្ជកម្មគឺជាចំណុចលេចធ្លោមួយនៅក្នុងទំនាក់ទំនងរវាងប្រទេសទាំងពីរ។ តម្លៃពាណិជ្ជកម្មទ្វេភាគីនៅឆ្នាំ២០២៥ សម្រេចបាន ៥៩០ លានដុល្លារអាមេរិក; និងសម្រេចបានប្រហែល ៣៣៥លានដុល្លារអាមេរិកក្នុងរយៈពេលប្រាំមួយខែដើមឆ្នាំ២០២៦។ បច្ចុប្បន្ននេះ វៀតណាមជាប់ចំណាត់ថ្នាក់លេខ ៧ ក្នុងចំណោមវិនិយោគិនបរទេសឈានមុខគេនៅមីយ៉ាន់ម៉ា ដោយគម្រោងភាគច្រើនផ្តោតលើវិស័យទូរគមនាគមន៍ ធនាគារ អចលនទ្រព្យ សំណង់ ផលិតកម្មឧស្សាហកម្ម និងកសិកម្ម។
ប្រទេសទាំងពីរក៏បង្ហាញពីសាមគ្គីភាព និងការចែករំលែកនៅក្នុងគ្រាលំបាកផងដែរ។ បន្ទាប់ពីគ្រោះរញ្ជួយដីក្នុងខែមីនា ឆ្នាំ២០២៥ វៀតណាមបានបញ្ជូនកងកម្លាំងជួយសង្គ្រោះ និងសម្ភារៈជំនួយយ៉ាងទាន់ពេលវេលា ដើម្បីជួយមីយ៉ាន់ម៉ាជំនះពុះពារលើផលវិបាក។
សកម្មភាពទាំងនេះរួមចំណែកដល់ការពង្រឹងរូបភាពរបស់វៀតណាមជាដៃគូដែលអាចទុកចិត្តបាន ដោយតែងតែចែករំលែកការលំបាកជាមួយមីយ៉ាន់ម៉ា បង្កើតមូលដ្ឋានគ្រឹះដ៏រឹងមាំសម្រាប់ពង្រីកកិច្ចសហប្រតិបត្តិការក្នុងដំណាក់កាលថ្មី។
បរិយាកាសកិច្ចសហប្រតិបត្តិការបើកចំហ
ដោយឈរលើមូលដ្ឋាននៃទំនាក់ទំនងនយោបាយអស់រយៈពេលជាង ៥០ ឆ្នាំ កន្លងទៅ ប្រទេសទាំងពីរនៅតែមានឱកាសជាច្រើនដើម្បីលើកកម្ពស់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។ មីយ៉ាន់ម៉ាមានប្រជាជនជាង ៥១ លាននាក់ ធនធានសម្បូរបែបនិងកម្លាំងពលកម្មវ័យក្មេង ខណៈពេលដែលតម្រូវការកសាងហេដ្ឋារចនាសម្ព័ន្ធ ទំនិញប្រើប្រាស់ និងការទាក់ទាញការវិនិយោគបរទេសគឺធំធេងណាស់។ ទាំងនេះ គឺជាវិស័យដែលអាចបង្កើតឱកាសបន្ថែមទៀតសម្រាប់សហគ្រាសវៀតណាម។ ឯកអគ្គរដ្ឋទូត ង្វៀន អាញឌឹក បានបន្ថែមថា៖
«បច្ចុប្បន្ន ទំនាក់ទំនងរវាងប្រទេសទាំងពីរកំពុងចូលដល់ដំណាក់កាលអភិវឌ្ឍន៍ថ្មីមួយ។ ភាគីទាំងពីរត្រូវផ្តោតលើវិស័យសហប្រតិបត្តិការសំខាន់ៗចំនួនបួន៖ ទីមួយ ពង្រឹងទំនុកចិត្តនយោបាយ; ទីពីរ ការជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្ម ជាពិសេសក្នុងវិស័យកសិកម្ម ទូរគមនាគមន៍ និងការផលិតយានយន្តអគ្គិសនី។ ទីបី ការពង្រីកការជួបប្រាស្រ័យរវាងប្រជាជន ទេសចរណ៍ និងជើងហោះហើរត្រង់។ ទីបួន ការសម្របសម្រួលយ៉ាងជិតស្និទ្ធនៅក្នុងវេទិកាតំបន់ និងអន្តរជាតិ ជាពិសេសនៅអាស៊ាន និងអនុតំបន់មេគង្គ។»
នៅក្នុងបរិបទដែលប្រទេសមីយ៉ាន់ម៉ាចូលដល់ដំណាក់កាលថ្មីនៃការអភិវឌ្ឍបន្ទាប់ពីការបោះឆ្នោតសកល និងការបង្កើតរដ្ឋាភិបាលថ្មី ដំណើរទស្សនកិច្ចជាផ្លូវការរបស់លោកប្រធានាធិបតី មីន អ៊ុងឡាំង មកកាន់វៀតណាម គឺមានសារៈសំខាន់យ៉ាងខ្លាំងចំពោះទំនាក់ទំនងទ្វេភាគី។
«ដំណើរទស្សនកិច្ចនេះមានអត្ថន៍យសំខាន់ណាស់៖ មិនត្រឹមតែពង្រឹងទំនុកចិត្តនយោបាយ និងពង្រីកកិច្ចសហប្រតិបត្តិការទ្វេភាគីប៉ុណ្ណោះទេ ប៉ុន្តែថែមទាំងបញ្ជាក់ពីតួនាទីសកម្ម និងមានទំនួលខុសត្រូវរបស់វៀតណាម រួមជាមួយអាស៊ាន ក្នុងការគាំទ្រប្រទេសមីយ៉ាន់ម៉ា ដើម្បីសន្តិភាព ស្ថិរភាព និងការអភិវឌ្ឍប្រកបដោយចីរភាព។ ខ្ញុំជឿជាក់ថា ដំណើរទស្សនកិច្ចនេះនឹងទទួលបានជោគជ័យដ៏ល្អប្រសើរ ដោយបង្កើតកម្លាំងចលករថ្មី ដើម្បីអភិវឌ្ឍន៍ទំនាក់ទំនងភាពជាដៃគូ សហប្រតិបត្តិការលើគ្រប់ជ្រុងជ្រោយរវាងវៀតណាម និងមីយ៉ាន់ម៉ា ឱ្យកាន់តែជាក់ស្តែង ដោយនាំមកនូវអត្ថប្រយោជន៍ជាក់ស្តែងដល់ប្រជាជននៃភាគីទាំងពីរ។»
ដោយទទួលស្វាគមន៍លោកប្រធានាធិបតី មីន អ៊ុងឡាំង អញ្ជើញមកបំពេញទស្សនកិច្ចជាផ្លូវការ វៀតណាមបានផ្ញើសារដ៏រឹងមាំមួយអំពីការអនុវត្តគោលនយោបាយការបរទេសប្រកបដោយសន្តិភាព កិច្ចសហប្រតិបត្តិការ ការអភិវឌ្ឍ ពហុភាគីនីយកម្ម និងធ្វើពិពិធកម្មទំនាក់ទំនងការបរទេស ការលើកកម្ពស់ទំនាក់ទំនងជាមួយប្រទេសជាមិត្តប្រពៃណី និងឱ្យតម្លៃដល់ទំនាក់ទំនងជាមួយមីយ៉ាន់ម៉ា។ ដំណើរទស្សនកិច្ចនេះ ក៏បើកចេញឱកាសសម្រាប់ប្រទេសទាំងពីរក្នុងការពង្រីកវិសាលភាពនៃកិច្ចសហប្រតិបត្តិការគ្រប់ជ្រុងជ្រោយ និងជាក់ស្តែងលើវិស័យជាច្រើនក្នុងដំណាក់កាលថ្មី៕
