អគ្គីភ័យដែលមានទីតាំងនៅ High Fens ដែលជាតំបន់អភិរក្សធម្មជាតិមួយនៅភាគខាងកើតប្រទេសបែលហ្ស៊ិក បានផ្ទុះឡើងនៅថ្ងៃទី ១៤ ខែសីហា។ ក្រុមពន្លត់អគ្គីភ័យមកពីទូទាំងប្រទេសបែលហ្ស៊ិក រួមជាមួយប្រទេសជិតខាងអាល្លឺម៉ង់និងលុចសំបួរ បានខិតខំប្រឹងប្រែងដើម្បីកំចាត់អគ្គីភ័យ ដោយមានជួយឧបត្ថម្ភពីយោធា និងកសិករ។
យោងតាមការអាប់ដេតពីការិយាល័យអភិបាលក្រុង Liege នៅល្ងាចថ្ងៃទី ១៥ ខែសីហា អគ្គីភ័យបានឆេះផ្ទៃដីចំនួន ២.៧០០ ហិកតា ដែលបង្ហាញថា អណ្តាតភ្លើងនៅតែរាលដាល ខណៈផ្ទៃដីដែលឆេះបានកើនឡើងពី ១.៦០០ ហិកតា ដែលបានរាយការណ៍មុននេះ។ នេះគឺជាអគ្គីភ័យដ៏ធំបំផុតដែលមិនធ្លាប់មាននៅក្នុងប្រទេសបែលហ្ស៊ិក ដោយផ្ទៃដីដែលឆេះបានកើនឡើងជិតទ្វេដងនៃអគ្គីភ័យឆ្នាំ ២០១១។
រួមជាមួយបែលហ្ស៊ិក ប្រទេសជាច្រើននៅអឺរ៉ុបកំពុងប្រឈមមុខនឹងភ្លើងឆេះព្រៃដ៏ធំ និងមិនអាចទប់ស្កាត់បាន ដោយសារតែអាកាសធាតុក្តៅរយៈពេលយូរ។ នៅប្រទេសបារាំង ភ្លើងឆេះព្រៃមួយទៀតបានផ្ទុះឡើងនៅខេត្ត Landes ភាគនិរតីនៅព្រឹកថ្ងៃទី ១៥ ខែសីហា។ អាជ្ញាធរបានបញ្ជាឱ្យជម្លៀសប្រជាជន និងអ្នកទេសចរប្រហែល ១០០ នាក់បន្ថែមទៀតនៅជុំវិញភូមិ Luglon។
នៅក្រូអាស៊ី អ្នកពន្លត់អគ្គីភ័យជាង ១០០ នាក់ ដោយមានការគាំទ្រពីយន្តហោះពន្លត់អគ្គីភ័យពីរគ្រឿង បានគ្រប់គ្រងភ្លើងឆេះព្រៃដ៏ធំមួយនៅលើកោះ Dugi Otok ពេញមួយយប់។ ភ្លើងឆេះព្រៃដ៏ធំមួយទៀតនៅលើឧបទ្វីប Pelješac ជាកន្លែងដែលអណ្តាតភ្លើងបានបំផ្លាញចម្ការទំពាំងបាយជូរ និងចម្ការអូលីវ ក៏ត្រូវបានគ្រប់គ្រងនៅល្ងាចថ្ងៃទី ១៤ ខែសីហាផងដែរ។ នៅប្រទេសក្រិក អ្នកពន្លត់អគ្គីភ័យនៅតែស្ថិតក្នុងការប្រុងប្រយ័ត្នខ្ពស់ ដោយសារតែខ្យល់បក់ខ្លាំងជាប់លាប់ និងហានិភ័យខ្ពស់នៃភ្លើងឆេះព្រៃនៅក្នុងតំបន់ជាច្រើននៃប្រទេស។ ភ្លើងឆេះព្រៃ និងកសិកម្មជាង ៥០កន្លែងបានផ្ទុះឡើងក្នុងរយៈពេល ២៤ ម៉ោងកន្លងមក ប៉ុន្តែអ្នកពន្លត់អគ្គីភ័យបានពន្លត់ភ្លើងឆេះព្រៃភាគច្រើនយ៉ាងឆាប់រហ័ស៕
