នាថ្ងៃទី១៤ ខែកញ្ញា ព្រះមហាក្សត្រថៃ Maha Vajiralongkorn Phra Vajiraklaochaoyuhua និងព្រះអគ្គមហេសី បានចាប់ផ្តើមព្រះរាជដំណើរទស្សនកិច្ចផ្លូវរដ្ឋនៅវៀតណាមចាប់ពីថ្ងៃទី១៤ ដល់ថ្ងៃទី១៦ ខែកញ្ញា តបតាមការអញ្ជើញរបស់អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម ប្រធានរដ្ឋនៃសាធារណរដ្ឋសង្គមនិយមវៀតណាម លោក តូ ឡឹម និងភរិយា។
ដំណើរទស្សនកិច្ចធ្វើឡើងក្នុងបរិបទដែលភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ថៃ កំពុងអភិវឌ្ឍន៍យ៉ាងល្អប្រសើរ ដោយឆ្នាំ២០២៦ គឺជាខួបលើកទី៥០ នៃការបង្កើតទំនាក់ទំនងការទូតរវាងប្រទេសទាំងពីរ (ថ្ងៃទី៦ ខែសីហា ឆ្នាំ១៩៧៦ - ថ្ងៃទី៦ ខែសីហា ឆ្នាំ២០២៦)។ យោងតាមឯកអគ្គរដ្ឋទូតវៀតណាមប្រចាំប្រទេសថៃ លោក ផាម វៀតហ៊ុង ក្នុងឆ្នាំនេះមានដំណើរទស្សនកិច្ចសំខាន់ៗជាច្រើនរវាងភាគីទាំងពីរ ដូចជាដំណើរទស្សនកិច្ចជាផ្លូវការទៅកាន់ប្រទេសថៃរបស់អគ្គលេខាបក្ស ប្រធានរដ្ឋវៀតណាមលោក តូ ឡឹម និងភរិយា; ដំណើរទស្សនកិច្ចរបស់នាយករដ្ឋមន្ត្រីថៃលោក អនុទីន ឆានវីរៈគុល និងភរិយាមកកាន់វៀតណាម; ដំណើរទស្សនកិច្ចរបស់ប្រធានរដ្ឋសភា និងប្រធានសភាតំណាងរាស្រ្តថៃ ទៅកាន់វៀតណាម។ ដោយវាយតម្លៃពីសារៈសំខាន់និងអត្ថន័យនៃព្រះរាជដំណើរទស្សនកិច្ចរបស់ព្រះមហាក្សត្រ និងព្រះអគ្គមហេសីថៃ លោកឯកអគ្គរដ្ឋទូត ផាម វៀតហ៊ុង បានសង្កត់ធ្ងន់ថា៖
“អត្ថន័យជានិមិត្តរូបនៃដំណើរទស្សនកិច្ចលើកនេះគឺធំធេងណាស់ មិនត្រឹមតែបង្ហាញពីការគោរពទំនាក់ទំនងរវាងប្រទេសជិតខាងទាំងពីរ ដៃគូសំខាន់ទាំងពីរនៅក្នុងអាស៊ាន និងក្នុងតំបន់ប៉ុណ្ណោះទេ ថែមទាំងក៏បង្ហាញពីមនោសញ្ចេតនាដ៏ជិតស្និទ្ធ និងរឹងមាំរវាងថ្នាក់ដឹកនាំខ្ពស់បំផុតនៃរដ្ឋទាំងពីរ ក៏ដូចជាមនោសញ្ចេតនារួមរបស់ប្រជាជននៃប្រទេសទាំងពីរផងដែរ។ ដំណើរទស្សនកិច្ចលើកនេះក៏នឹងពង្រឹងបន្ថែមទៀតនូវការយល់ដឹងគ្នា និងការជឿទុកចិត្តគ្នាទៅវិញទៅមករវាងប្រទេសទាំងពីរ។ ដោយមានមូលដ្ឋានគ្រឹះនយោបាយដ៏រឹងមាំ យើងអាចជឿជាក់ថា រដ្ឋាភិបាលនៃប្រទេសទាំងពីរ បណ្ដាក្រសួង ផ្នែក មូលដ្ឋាន សហគ្រាស និងប្រជាជននឹងអាចអភិវឌ្ឍន៍ប្រកបដោយទំនុកចិត្ត រួមជាមួយនឹងសមិទ្ធផលនៃកិច្ចសហប្រតិបត្តិការក្នុងវិស័យសេដ្ឋកិច្ច វិនិយោគ ពាណិជ្ជកម្ម អប់រំ និងការជួបប្រាស្រ័យរវាងប្រជាជន ហើយបង្កើនការចែករំលែកបទពិសោធន៍ កិច្ចសហប្រតិបត្តិការ និងការអភិវឌ្ឍរួមគ្នាសម្រាប់តំបន់ទាំងមូលក្នុងក្របខ័ណ្ឌអាស៊ាន ឆ្ពោះទៅរកកសាងតំបន់មួយដែលមានសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ កសាងសហគមន៍អាស៊ានដែលមានសាមគ្គីភាព ខ្លួនទីពឹងខ្លួន និងដើរតួនាទីជាមជ្ឈភាពក្នុងដំណើរការនានាក្នុងតំបន់ផងដែរ”៕
