មន្ត្រីអាមេរិកម្នាក់ដែលមិនបញ្ចេញឈ្មោះ បាននិយាយថា ការវាយប្រហារមួយចំនួននៅថ្ងៃទី១២ ខែកក្កដា បានកំណត់គោលដៅលើប្រព័ន្ធមីស៊ីល និងការពារដែនអាកាស ក៏ដូចជានាវាតូចៗរបស់កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) នៅទីតាំងជាច្រើនជុំវិញច្រកសមុទ្រហ័រមូស ដើម្បីបន្ទន់សមត្ថភាពរបស់អ៊ីរ៉ង់ក្នុងការវាយប្រហារលើនាវាដឹកជញ្ជូនពាណិជ្ជកម្ម។
ជាការឆ្លើយតប កងទ័ពអ៊ីរ៉ង់នាថ្ងៃដដែលនោះ បានប្រើប្រាស់យន្តហោះដ្រូន (UAV) ដើម្បីវាយប្រហារលើទីតាំងបាញ់មីស៊ីលរបស់សហរដ្ឋអាមេរិកនៅប្រទេសគុយវ៉ែត ដោយអះអាងថាប្រព័ន្ធមីស៊ីលទាំងអស់ត្រូវបានបំផ្លាញ។
គុយវ៉ែតបានបញ្ជាក់ថា “ប៉ុស្តិ៍ត្រួតពិនិត្យព្រំដែនគោក” ចំនួនបីនៅភាគខាងជើង និងអណ្ដូងខួងប្រេងនៅឯនាយសមុទ្រដែលជាកម្មសិទ្ធិរបស់ក្រុមហ៊ុនប្រេងគុយវ៉ែតរងការខូចខាត។ នៅប្រទេសកាតា ក្រសួងមហាផ្ទៃបានប្រកាសថា មនុស្សបីនាក់បានរងរបួសដោយសារបំណែកគ្រាប់បែកពីការស្ទាក់ចាប់ការវាយប្រហាររបស់អ៊ីរ៉ង់។ នៅប្រទេសហ្ស៊កដានី មីស៊ីលអ៊ីរ៉ង់ចំនួនបីគ្រាប់បានវាយប្រហារលើតំបន់នានាទូទាំងប្រទេសនេះ បណ្តាលឱ្យមានការខូចខាតតិចតួច ប៉ុន្តែមិនមានអ្នកស្លាប់និងរងរបួសនោះទេ។ ស៊ីរ៉ែនព្រមានមីស៊ីលក៏បានបន្លឺឡើងនៅអេមីរ៉ាតអារ៉ាប់រួម (UAE) និងបារ៉ែនផងដែរ។
អគ្គលេខាធិការអង្គការសហប្រជាជាតិ លោក Antonio Guterres បានសម្តែងការព្រួយបារម្ភយ៉ាងខ្លាំងចំពោះការកើនឡើងយ៉ាងធ្ងន់ធ្ងរ និងការប្រឈមមុខដាក់គ្នាខាងយោធាថ្មីនៅក្នុងតំបន់ឈូងសមុទ្រ។ លោកបានអំពាវនាវដល់គ្រប់ភាគីទាំងអស់ឱ្យមានភាពអត់ធ្មត់ជាអតិបរមា ជៀសវាងការឡើងកម្តៅបន្ថែមទៀត និងចាត់វិធានការជាបន្ទាន់ដើម្បីបន្ធូរបន្ថយភាពតានតឹង៕
