នាព្រឹកថ្ងៃទី ២០ ខែសីហា ដោយពិភាក្សានៅសាលប្រជុំអំពីការរួមបញ្ចូលកម្មវិធីគោលដៅជាតិទាំង ៤ ទៅជាកម្មវិធីគោលដៅជាតិតែមួយសម្រាប់ការអភិវឌ្ឍសង្គម-វប្បធម៌ តំបន់ជនបទ តំបន់ជនជាតិភាគតិច និងតំបន់ព្រៃភ្នំដំណាក់កាល ២០២៦-២០៣៥ សមាជិកសភានានា បានចាត់ទុកថា ការរួមបញ្ចូលគឺជាមូលដ្ឋានសម្រាប់កាត់បន្ថយការត្រួតស៊ីគ្នា និងបង្កើនប្រសិទ្ធភាពនៃការប្រើប្រាស់ធនធាន; ប៉ុន្តែចាំបាច់ត្រូវកំណត់យ៉ាងច្បាស់លាស់អំពីយន្តការសម្រាប់ការបែងចែក និងគ្រប់គ្រងដើមទុន ហើយធានាធនធានសម្រាប់តំបន់ដែលជួបការលំបាកផងដែរ។ គោលដៅខ្ពស់បំផុតគឺការលើកកម្ពស់គុណភាពជីវភាពសម្រាប់ប្រជាជន។
លោក Nguyen Xuan Nghiem សមាជិកសភាមកពីទីក្រុងដាណាំង បានថ្លែងថា គោលការណ៍ស្នូលគឺថា ការរួមបញ្ចូលត្រូវតែមានប្រសិទ្ធភាពជាក់ស្ដែង; មិនត្រូវកាត់បន្ថយកម្រិតអាទិភាពសម្រាប់តំបន់និងមុខសញ្ញាដែលកំពុងជួបការលំបាក។ ក្នុងពេលជាមួយគ្នានោះ ការធ្វើវិមជ្ឈការត្រូវតែដើរទន្ទឹមគ្នាជាមួយនឹងសមត្ថភាព ធនធាន ហើយប្រសិទ្ធភាពនៃកម្មវិធីត្រូវតែវាស់វែងដោយលទ្ធផលជាក់ស្តែង។
«ខ្ញុំចាត់ទុកថា ការរួមបញ្ចូលមិនមានន័យថា លុបបំបាត់គោលដៅ មុខសញ្ញា ឬគោលនយោបាយជាក់លាក់របស់វិស័យនីមួយៗនោះទេ។ ផ្ទុយទៅវិញ គោលនយោបាយជាក់លាក់ នៅតែត្រូវការពារ ប៉ុន្តែវិធីសាស្រ្តរៀបចំផែនការ សម្របសម្រួលធនធាន ការរៀបចំការអនុវត្ត ការតាមដាននិងវាយតម្លៃ ត្រូវតែមានការឯកភាព។ ជាពិសេស ការរួមបញ្ចូលត្រូវតែបង្កើតសមត្ថភាពសម្របសម្រួលធនធានកាន់តែប្រសើរឡើង មិនមែនគ្រាន់តែរួមបញ្ចូលដើមទុននោះទេ»។
យោងតាមសមាជិកសភា ផ្នត់គំនិតនៃកម្មវិធីគោលដៅជាតិត្រូវតែផ្លាស់ប្តូរយ៉ាងខ្លាំងតាមទិសដៅដែលរដ្ឋផ្តល់ការជួយគាំទ្រដើម្បីឱ្យប្រជាជនអាចអភិវឌ្ឍន៍ដោយខ្លួនឯងបាន៕
