យោងតាមក្រឹត្យមួយដែលបានប្រកាសនាថ្ងៃទី១០ ខែតុលា ប្រធានាធិបតីប៉ាឡេស្ទីនបានបញ្ជាក់ថា ការរឹតបន្តឹង និងការវាយប្រហារដោយកងទ័ពអ៊ីស្រាអែលនៅតំបន់ហ្គាហ្សា តំបន់វេស្តប៊ែង និងភាគខាងកើតទីក្រុងយេរូសាឡឹមបានធ្វើឱ្យប៉ះពាល់ដល់សមត្ថភាពក្នុងការរៀបចំការបោះឆ្នោតដ៏ទូលំទូលាយ យុត្តិធម៌ និងសេរីដូចដែលបានគ្រោងទុកដំបូង។ ការសម្រេចចិត្តរបស់ប្រធានាធិបតីម៉ាមូដ អាបាស់ក្នុងការពន្យារពេលការបោះឆ្នោតសភា និងប្រធានាធិបតីមានគោលបំណងធានាសុវត្ថិភាពរបស់អ្នកបោះឆ្នោត និងសមត្ថភាពរបស់ប្រជាជនប៉ាឡេស្ទីនក្នុងការអនុវត្តសិទ្ធិបោះឆ្នោតរបស់ពួកគេដោយសេរី។
ប៉ាឡេស្ទីនមិនបានរៀបចំការបោះឆ្នោតប្រធានាធិបតីចាប់តាំងពីឆ្នាំ២០០៥ និងការបោះឆ្នោតសភាចាប់តាំងពីឆ្នាំ២០០៦។ មុននោះ នៅថ្ងៃទី៧ ខែកញ្ញា ប្រធានាធិបតីប៉ាឡេស្ទីន អាបាស់ បានចុះហត្ថលេខាលើក្រឹត្យមួយដែលកំណត់កាលបរិច្ឆេទសម្រាប់ការបោះឆ្នោតសភានៅថ្ងៃទី២៨ ខែវិច្ឆិកា ឆ្នាំ២០២៦ និងការបោះឆ្នោតប្រធានាធិបតីនៅពេលវេលាមិនបានបញ្ជាក់នៅឆ្នាំ២០២៧។
នៅថ្ងៃដដែលនោះ ក្រសួងសុខាភិបាលប៉ាឡេស្ទីនបានរាយការណ៍ថា ក្នុងរយៈពេល២៤ម៉ោងកន្លងមកនេះ កងទ័ពអ៊ីស្រាអែលបានបន្តការវាយប្រហាររបស់ខ្លួនទៅលើតំបន់ហ្គាហ្សា ទោះបីជាបទឈប់បាញ់នៅតែមានសុពលភាពក៏ដោយ។ ការវាយប្រហារទាំងនេះបានបណ្តាលឱ្យមានមនុស្សស្លាប់យ៉ាងហោចណាស់ ១០ នាក់ និងរបួសរាប់សិបនាក់។ ក្រសួងសុខាភិបាលប៉ាឡេស្ទីនបានបញ្ជាក់ថា នេះគឺជារយៈពេលដ៏បង្ហូរឈាមបំផុតមួយនៃការវាយប្រហារដោយយោធារបស់អ៊ីស្រាអែលទៅលើតំបន់ហ្គាហ្សាក្នុងរយៈពេលថ្មីៗនេះ។ ក្រសួងសុខាភិបាលប៉ាឡេស្ទីនបានអះអាងថា ចាប់តាំងពីការចាប់ផ្តើមនៃជម្លោះនៅថ្ងៃទី ៧ ខែតុលា ឆ្នាំ ២០២៣ មក មនុស្សសរុបចំនួន ៧៤.៣៧០ នាក់បានស្លាប់ និងជិត ១៧៥.៤០០ នាក់បានរងរបួស៕
