សេចក្តីប្រកាសខាងលើ បានកើតឡើងបន្ទាប់ពីបញ្ជាការកណ្តាលអាមេរិក (CENTCOM) ប្រកាសថា បានស្ទាក់ចាប់ការវាយប្រហារដោយមីស៊ីលបាលីស្ទីកសំដៅទៅលើកម្លាំងអាមេរិកនៅប្រទេសហ្ស៊កដានី។ មុននោះ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានអះអាងថា បានបាញ់មីស៊ីលជាច្រើនគ្រាប់លើមូលដ្ឋានទ័ពអាកាសអាមេរិក និងមជ្ឈមណ្ឌលបញ្ជាការយោធាមួយនៅក្នុងប្រទេសនេះ។ យោងតាមសហរដ្ឋអាមេរិក មីស៊ីលទាំងអស់ត្រូវបានស្ទាក់ចាប់ ហើយមិនមានអ្នកស្លាប់ និងរងរបួសនោះទេ។
ភ្លាមៗបន្ទាប់ពីហេតុការណ៍នេះ សហរដ្ឋអាមេរិក បានសម្របសម្រួលជាមួយអារ៉ាប៊ីសាអូឌីត ធ្វើការវាយប្រហារតាមផ្លូវអាកាសលើគោលដៅជាច្រើនរបស់ក្រុមប្រដាប់អាវុធគាំទ្រអ៊ីរ៉ង់នៅភាគខាងកើតប្រទេសអ៊ីរ៉ាក់។ CENTCOM បានឱ្យដឹងថា ប្រតិបត្តិការនេះត្រូវបានធ្វើឡើងដើម្បីឆ្លើយតបទៅនឹងការវាយប្រហារដោយយន្តហោះដ្រូនជាង ៣០លើកក្នុងរយៈពេល ៧២ ម៉ោង សំដៅទៅលើកងកម្លាំងអាមេរិក និងរោងចក្រថាមពលអារ៉ាប៊ីសាអូឌីត៕
