ថ្លែងនៅក្នុងពិធីនេះ លោកអគ្គលេខាបក្ស ប្រធានរដ្ឋ តូ ឡឹម បានអបអរសាទរចំពោះសមិទ្ធផលលេចធ្លោដែលប្រជាជនថៃសម្រេចបាន ក្រោមការគ្រងរាជ្យសម្បត្តិ របស់ព្រះមហាក្សត្រ និងតួនាទីដ៏សំខាន់របស់រាជវង្សានុវង្ស ក្នុងការពង្រឹងឯកភាពជាតិ រក្សាស្ថិរភាព និងអភិវឌ្ឍប្រទេសជាតិ។ យោងតាមលោកអគ្គលេខាបក្ស ប្រធានរដ្ឋ ប្រការដ៏មានតម្លៃមួយគឺចំណងមិត្តភាពរវាងវៀតណាម និងថៃ មិនត្រឹមតែត្រូវបានកសាងឡើងតាមរយៈឯកសារសហប្រតិបត្តិការ និងដំណើរទស្សនកិច្ចកម្រិតខ្ពស់ប៉ុណ្ណោះទេ ប៉ុន្តែក៏ត្រូវបានបង្កើតឡើង ថែរក្សា និងពូនជ្រុំដោយចំណងមិត្តភាពដ៏ជិតស្និទ្ធរវាងប្រជាជននៃប្រទេសទាំងពីរផងដែរ។
«រយៈពេល ៥០ ឆ្នាំកន្លងមកនេះ គឺជាដំណើរដ៏គួរឱ្យមោទនភាពសម្រាប់យើងក្រឡែកមើលឡើងវិញ ហើយក៏ជាការចាប់ផ្តើមនៃការបោះជំហានកាន់តែឆ្ងាយផងដែរ។ វៀតណាមចង់សហការជាមួយថៃ ដើម្បីកសាងទំនាក់ទំនងកាន់តែជាក់ស្តែង ដែលក្នុងនោះ ភាពជោគជ័យរបស់ប្រទេសម្ខាងនឹងបង្កើតឱកាសកាន់តែច្រើនសម្រាប់ការអភិវឌ្ឍរបស់ប្រទេសម្ខាងទៀត។ ខ្ញុំជឿជាក់ថា យុវជនជំនាន់ក្រោយនៃប្រទេសទាំងពីរនឹងបន្តទទួលមរតកសមិទ្ធផលរបស់មនុស្សជំនាន់មុនៗ ដោយរួមគ្នាកសាងចំណងមិត្តភាពកាន់តែរឹងមាំរវាងប្រទេសទាំងពីរ។ ខ្ញុំជឿជាក់ថា ជាមួយនឹងមូលដ្ឋានគ្រឹះដ៏រឹងមាំនៃទំនុកចិត្តនយោបាយ ចំណងមិត្តភាពដ៏ជិតស្និទ្ធរវាងប្រជាជននៃប្រទេសទាំងពីរ និងអត្ថន័យដ៏សំខាន់នៃព្រះរាជដំណើរទស្សនកិច្ចលើកនេះ របស់ព្រះមហាក្សត្រ និងព្រះអគ្គមហេសី ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-ថៃ នឹងអភិវឌ្ឍកាន់តែស៊ីជម្រៅ ជាក់ស្តែង និងប្រកបដោយចីរភាព»។
ព្រះមហាក្សត្រថៃបានសង្កត់ធ្ងន់ថា ព្រះរាជដំណើរទស្សនកិច្ចមកកាន់វៀតណាមលើកនេះ បានប្រព្រឹត្តទៅក្នុងឱកាសខួបលើកទី ៥០ ទិវាបង្កើតទំនាក់ទំនងការទូតរវាងប្រទេសទាំងពីរ គឺជាការបញ្ជាក់យ៉ាងខ្លាំងក្លាអំពីចំណងមិត្តភាពជិតស្និទ្ធ និងកិច្ចសហប្រតិបត្តិការជាបន្តបន្ទាប់លើគ្រប់វិស័យ។ ទន្ទឹមនឹងនោះ រួមចំណែកដល់ការពង្រឹងទំនាក់ទំនងភាពជាអ្នកជិតខាងដ៏សាមគ្គីភាព ដៃគូយុទ្ធសាស្ត្រគ្រប់ជ្រុងជ្រោយ និងសមាជិកនៃសហគមន៍អន្តរជាតិ ឱ្យកាន់តែរឹងមាំ និងស្ថិតស្ថេរជារាងរហូត៕
