បន្ទាប់ពីបញ្ចប់ប្រកួតវគ្គផ្តាច់ព្រ័ត្ររវាងក្រុមបាល់ទាត់ជម្រើសជាតិវៀតណាម និងថៃ អ្នកគាំទ្ររាប់ពាន់នាក់នៅទីក្រុងហាណូយបានចុះតាមដងផ្លូវ ឆ្ពោះទៅកណ្តាលទីក្រុងដើម្បីអបអរសាទរជ័យជម្នះរបស់ក្រុមជម្រើសជាតិ។
នៅតាមវិថីដើរថ្មើរជើងង្វៀនហ្វេ ក្នុងទីក្រុងហូជីមិញ អ្នកគាំទ្របានស្រែកថា “វៀតណាម-ជើងឯក” “វៀតណាម - ហូជីមិញ” ដោយឥតឈប់ឈរ។ សំឡេងស្គរ ត្រែ និងការអបអរសាទរបានបន្លឺឡើងគ្រប់ទីកន្លែង បង្កើតបានជាបរិយាកាសដ៏រំភើប។ អ្នកស្រី ង្វៀន ធីថាញ់ ជាអ្នកគាំទ្រម្នាក់ បាននិយាយថា៖
“បរិយាកាសមានភាពរស់រវើក និងពោរពេញដោយសេចក្តីក្លៀវក្លា។ មនុស្សគ្រប់គ្នាសម្តែងការគាំទ្រយ៉ាងខ្លាំងដល់កីឡាករ នោះហើយជាមូលហេតុដែលខ្ញុំមកទីនេះ។ ពិតណាស់ថា គ្មានប្រទេសណាផ្សេងទៀតដែលប្រជាជនមានសេចក្តីស្រឡាញ់យ៉ាងខ្លាំងចំពោះកីឡាបាល់ទាត់ដូចប្រទេសវៀតណាមឡើយ”។
ទន្ទឹមនឹងនេះ នៅក្នុងទីក្រុងដាណាំង អ្នកគាំទ្រ និងអ្នកទេសចរបរទេសក៏បានប្រមូលផ្តុំគ្នានៅតាមដងផ្លូវដើម្បីអបអរសាទរជ័យជម្នះរបស់ក្រុមវៀតណាមផងដែរ។ ទង់ជាតិ និងបដាដែលមានពាក្យថា "វៀតណាម-ជើងឯក" បានបក់រវិកៗនៅគ្រប់ដងផ្លូវទាំងអស់៕
