លោក Rustam Minnikhanov ប្រមុខសាធារណរដ្ឋតាតាស្ថាន បានសង្កត់ធ្ងន់ថា តាតាស្ថានមានឧស្សាហកម្មមុខព្រួញដូចជា ការផលិតរថយន្ត Kamaz សារធាតុគីមី យន្តហោះស៊ីវិល ប្រេងឥន្ធនៈ វាយនភណ្ឌ និងគ្រឿងឈើ។ តាតាស្ថានក៏ផ្តោតសំខាន់លើការអភិវឌ្ឍសហគ្រាសធុនតូចនិងមធ្យម និងមណ្ឌលឧស្សាហកម្មក្នុងវិស័យបច្ចេកវិទ្យាព័ត៌មានផងដែរ។ តាតាស្ថានមានបំណងចង់បង្កើតទំនាក់ទំនងជាមួយមូលដ្ឋាននានារបស់វៀតណាម មិនត្រឹមតែឧទ្ទេសនាមគំរូអភិវឌ្ឍន៍ប៉ុណ្ណោះទេ ប៉ុន្តែថែមទាំងតភ្ជាប់អាជីវកម្មដើម្បីស្វែងរកឱកាសសហប្រតិបត្តិការទៀតផង។
រីឯខ្លួនវិញ លោកនាយករដ្ឋមន្ត្រី ឡេ មិញហ៊ឹងបានថ្លែងថា វៀតណាមយកចិត្តទុកដាក់លើកិច្ចសហប្រតិបត្តិការជាមួយសហគ្រាសឧស្សាហកម្មនៃសាធារណរដ្ឋតាតាស្ថាន ហើយរដ្ឋាភិបាលវៀតណាមប្តេជ្ញាបង្កើតលក្ខខណ្ឌអំណោយផលសម្រាប់សហគ្រាសរុស្ស៊ី រួមទាំងសហគ្រាសមកពីតាតាស្ថាន ដើម្បីធ្វើអាជីវកម្មរយៈពេលវែង ប្រកបដោយស្ថិរភាពនៅវៀតណាម។ លោក បានសម្តែងក្តីសង្ឃឹមថា នាពេលអនាគតដ៏ខ្លីខាងមុខនេះ សាធារណរដ្ឋតាតាស្ថាននឹងរកឃើញមូលដ្ឋាននៅវៀតណាមដែលសមស្របដើម្បីបង្កើតទំនាក់ទំនងសហប្រតិបត្តិការ។ លោកនាយករដ្ឋមន្ត្រីក៏បានលើកទឹកចិត្តក្រុមហ៊ុនអាកាសចរណ៍មកពីប្រទេសទាំងពីរឱ្យពិចារណាអភិវឌ្ឍផ្លូវហោះហើរពាណិជ្ជកម្មបន្ថែមទៀតដែលភ្ជាប់កាហ្សានជាមួយរដ្ឋធានីហាណូយ៕
