CADAO Collective នាំយកនូវតម្លៃវប្បធម៌ប្រពៃណីឱ្យកាន់តែខិតជិតសាធារណជនតាមរយៈវិធីសាស្រ្តច្នៃប្រឌិតនិងទំនើប ប៉ុន្តែនៅតែរក្សាបាននូវស្មារតីនៃបេតិកភណ្ឌ។ ចំណុចលេចធ្លោនៅទីនេះ គឺការប្រមូលផ្តុំនូវទម្រង់សិល្បៈប្រពៃណីឆ្នើមៗទាំងបីរបស់ទីក្រុងហាណូយ។ ប្រសិនបើការចម្រៀង Xam ឆ្លុះបញ្ចាំងពីចង្វាក់ប្រជាប្រិយ និងចម្រៀង Ca Tru តំណាងឱ្យភាពថ្លៃថ្នូរ និងបញ្ញារបស់រាជធានីបុរាណ នោះ ល្ខោនអាយ៉ងទឹកបាននាំមកនូវបរិយាកាសពិធីបុណ្យ និងរឿងព្រេងប្រជាប្រិយ។ ការរួមបញ្ចូលគ្នានេះ បង្កើតបានជាបទពិសោធន៍វប្បធម៌យ៉ាងពេញលេញរបស់ទីក្រុងហាណូយ សម្រាប់អ្នកទេសចរទាំងក្នុងស្រុក និងអន្តរជាតិ។ លោក Nguyen Minh Thang ប្រធានផ្នែកទីផ្សារនិងយុទ្ធសាស្ត្រនៅ CADAO Collective បានឱ្យដឹងថា៖ «យើងមានបំណងចង់នាំយកបេតិកភណ្ឌវប្បធម៌វៀតណាមទៅក្នុងជីវភាពសម័យទំនើប។ CADAO Collective មិនមែនជាសារមន្ទីរធម្មតា ដែលបេតិកភណ្ឌវប្បធម៌ត្រូវបានដាក់ស៊ុមនោះឡើយ ប៉ុន្តែនៅទីនេះ បេតិកភណ្ឌវប្បធម៌បានក្លាយទៅជារស់រវើក និងតាមទាន់ល្បឿននៃចង្វាក់ជីវិតនៅទីក្រុងសព្វថ្ងៃនេះ ជាមួយនឹងវិធីសាស្រ្តដ៏គួរឱ្យទាក់ទាញជាង។»
កម្មវិធីសម្តែងនៅ CADAO Collective នាំទស្សនិកជនទៅកាន់ដំណើរសិល្បៈដែលប្រមូលផ្តុំនូវតម្លៃប្រពៃណី ជាមួយនឹងខ្យល់ដង្ហើមនៃសម័យទំនើប។
នៅកម្មវិធី «Roi Show» ទស្សនិកជនបានទស្សនានិងរីករាយជាមួយនឹងការអន្តរកម្មលើឆាកយ៉ាងពិសេស ជាមួយនឹងការសម្តែងដែលត្រូវបានបំផុសគំនិតពីរឿងព្រេងប្រជាប្រិយប្រពៃណី។ កម្មវិធីនេះ បានរួមបញ្ចូលគ្នារវាងល្ខោនអាយ៉ងទឹក និងល្ខោនស្រមោល ជាមួយផ្នែកតន្ត្រីដែលរួមបញ្ចូលគ្នារវាងបទភ្លេងប្រជាប្រិយ និងស្នាដៃថ្មីៗ បង្កើតបានជាវិធីសាស្ត្រដ៏ថ្មីថ្មោងសម្រាប់សិល្បៈប្រពៃណី។ ឆាកល្ខោនទឹកត្រូវបានរចនានិងសាងសង់ឡើងដោយដៃទាំងស្រុង ដោយរួមបញ្ចូលគ្នានូវស្ថាបត្យកម្មប្រពៃណី ជាមួយនឹងការរចនាសម័យទំនើប បង្កើតបានជា ឆាកល្ខោនដែលពោរពេញទៅដោយស្លាកស្នាមបេតិកភណ្ឌផង និងមានចំណុចលេចធ្លោផ្នែកសិល្បៈផង។ លោក Ta Trung Dung នាយកសិល្បៈ និងជាប្រធានក្រុមសម្តែងអាយ៉ងទឹក Tay Ho បានឱ្យដឹងថា៖ «ជាមួយនឹងល្ខោនអាយ៉ងទឹក យើងខ្ញុំមានបំណងចង់នាំមកនូវការច្នៃប្រឌិតថ្មីៗ ដោយសារតែអាយ៉ងទឹកជាប្រភេទសិល្បៈប្រពៃណីមួយដែលផ្សារភ្ជាប់នឹងជីវភាពរស់នៅរបស់ប្រជាជនតាំងពីបុរាណកាលមក។ យើងខ្ញុំមានបំណងចង់នាំមកនូវប្រការថ្មីៗ ប៉ុន្តែមិនផ្លាស់ប្តូរកត្តាចាស់នោះឡើយ។ យើងខ្ញុំបានធ្វើការច្នៃប្រឌិតលើកត្តាដូចជា ឆាកល្ខោនទឹក ឬតួអង្គនីមួយៗនឹងមានចលនាដៃជើងថ្មីៗ តាមតន្ត្រីថ្មី ដែលជិតស្និទ្ធជាមួយទស្សនិកជនវ័យក្មេងជាង»។
រួមជាមួយនឹងការសម្តែងល្ខោនអាយ៉ងទឹក អ្នកទស្សនាក៏អាចរីករាយជាមួយ " Ca Tru Show" ជាមួយនឹងការសម្តែងចម្រៀង Ca Tru ផងដែរ។ លើសពីនេះ កន្លែងច្រៀងចម្រៀង Xam បានឧទ្ទេសនាមដល់សាធារណជន អំពីបទភ្លេងដែលផ្សារភ្ជាប់យ៉ាងជិតស្និទ្ធជាមួយជីវភាពរស់នៅក្នុងតំបន់វិថីបុរាណរបស់ទីក្រុងហាណូយ តាមរយៈការសម្តែងដោយសិល្បករប្រជាជន Xuan Hoach សិប្បករ Ta Hanh និងសិប្បករជាច្រើនទៀត។ លោក Ta Trung Dung នាយកផ្នែកសិល្បៈនិងជាប្រធានក្រុមល្ខោនអាយ៉ងទឹក Tay Ho បានបន្ថែមថា៖ «ទាក់ទងនឹងចម្រៀង Xam និងចម្រៀង Ca Tru នៅ CADAO Collective យើងធ្វើការជាមួយបណ្តាសិប្បករ។ មិនត្រឹមតែទស្សនិកជនវ័យចំណាស់ប៉ុណ្ណោះទេ ថែមទាំងទស្សនិកជនវ័យក្មេងទៀតផង សុទ្ធតែចាប់អារម្មណ៍យ៉ាងខ្លាំង ហើយរាល់ពេលដែលពួកគេមកទទួលយកបទពិសោធន៍សិល្បៈប្រពៃណីទាំងនេះ ពួកគេទទួលបានមេរៀនដ៏មានតម្លៃជាច្រើន។ យុវជនក៏អាចស្តាប់ការចែករំលែករបស់សិប្បករដោយផ្ទាល់ផងដែរ»។
ចំណុចពិសេសមួយនៅ CADAO Collective គឺទស្សនិកជនមិនត្រឹមតែរីករាយនឹងការសម្តែងប៉ុណ្ណោះទេ ប៉ុន្តែថែមទាំងអាចធ្វើអន្តរកម្មដោយផ្ទាល់ជាមួយសិប្បករ ស្វែលយល់អំពីប្រវត្តិនៃទម្រង់សិល្បៈផ្សេងៗ និងទទួលបទពិសោធន៍ឧបករណ៍ភ្លេងប្រពៃណីជាច្រើនផងដែរ។ លោក Nguyen Minh Thang ប្រធានផ្នែកទីផ្សារ និងយុទ្ធសាស្ត្រនៅ CADAO Collective បានចែករំលែកបន្ថែមទៀតថា៖
«នាពេលខាងមុខ យើងនឹងបើកថ្នាក់រៀនអំពីការច្រៀងចម្រៀង ca trù ចម្រៀង xẩm និងការសម្តែងល្ខោនអាយ៉ងទឹក ដើម្បីបណ្តុះបណ្តាលសិប្បករអាយ៉ងទឹក និងអ្នកច្រៀង Ca Tru ជំនាន់ក្រោយ។ នៅ CADAO Collective យើងចង់បង្កើតបទពិសោធន៍អំណោយផលបំផុតសម្រាប់អ្នកទស្សនា ដើម្បីឱ្យពួកគេអាចទទួលបានបទពិសោធន៍យ៉ាងពេញលេញនូវភាពទាក់ទាញនៃវប្បធម៌និងសិល្បៈរបស់ទីក្រុងហាណូយ នៅក្នុងដំណើរតែមួយ»។
ក្រៅពីកម្មវិធីសិល្បៈ ទីនេះក៏រួមបញ្ចូលគ្នានូវការឧទ្ទេសនាមម្ហូបអាហារ ដែលបំផុសគំនិតពីវប្បធម៌ប្រជាប្រិយ និងផលិតផលដែលផលិតពីគ្រឿងផ្សំក្នុងស្រុក។ ការរួមបញ្ចូលគ្នានៃសិល្បៈ និងបទពិសោធន៍ទទួលទានអាហារសដំដៅបង្កើតដំណើរទៅស្វែងយល់ពីវប្បធម៌របស់ទីក្រុងហាណូយដ៏ចម្រុះពណ៌។ លោក Nguyen Trung Hieu ទស្សនិកជនម្នាក់មកពីទីក្រុងហាណូយ បានចែករំលែកអារម្មណ៍ថា៖ «ខ្ញុំមានការចាប់អារម្មណ៍យ៉ាងខ្លាំងចំពោះការរៀបចំយ៉ាងហ្មត់ចត់នៅ CADAO Collective។ ជាន់ទីមួយគឺជាការសម្តែងអាយ៉ងទឹក។ ជាន់ទីពីរគឺជាតំបន់ទទួលទានអាហារ។ ជាន់ទីបីគឺជាការសម្តែងច្រៀង Xam និង Ca Tru។ ខ្ញុំក៏មានការចាប់អារម្មណ៍យ៉ាងខ្លាំងចំពោះការរួមបញ្ចូលគ្នានៃម្ហូបអាហារ និងសិល្បៈបេតិកភណ្ឌនៅទីនេះផងដែរ។ ការអង្គុយនៅក្នុងលំហកក់ក្ដៅ រីករាយជាមួយកាកាវមួយពែង ខណៈពេលកំពុងស្តាប់ចម្រៀង Ca Tru ឬទស្សនាការសម្តែងអាយ៉ងទឹក នាំមកនូវបទពិសោធន៍ដ៏ពេញលេញ»។
នៅ CADAO Collective ក្បូរក្បាច់រចនា គ្រឿងតុបតែង និងសូម្បីតែតំងន់ទទួលទានអាហារសុទ្ធតែត្រូវបានរចនានិងផលិតដោយសិប្បករផ្ទាល់។ CADAO Collective មានគោលបំណងបង្កើតគោលដៅសហសម័យ ខណៈពេលដែលកំពុងកសាងសហគមន៍ដើម្បីចូលរួមចំណែកក្នុងការអភិរក្ស និងពង្រីកសិល្បៈប្រពៃណី៕
