កម្មវិធីនេះ បានចាប់ផ្តើមជាមួយនឹងពិធីបង្ហូតទង់អាស៊ាន។ កម្មាភិបាល បុគ្គលិក និងក្រុមគ្រួសារជាង ២០០នាក់ មកពីស្ថានទូតនៃបណ្តាប្រទេសអាស៊ាននៅទីក្រុងម៉ូស្គូ បានចូលរួមក្នុងពិធីគោរពទង់អាស៊ាន និងច្រៀងបទចម្រៀងអាស៊ាន ដែលបង្ហាញពីស្មារតីសាមគ្គីភាព និងចំណងមិត្តភាពដ៏ជិតស្និទ្ធរបស់សហគមន៍អាស៊ាននៅសហព័ន្ធរុស្ស៊ី។
ថ្លែងនៅក្នុងព្រឹត្តិការណ៍នេះ ឯកអគ្គរដ្ឋទូតហ្វីលីពីនប្រចាំសហព័ន្ធរុស្ស៊ី លោក Igor Bailen ដែលជាប្រធានប្តូរវេននៃគណៈកម្មាធិការអាស៊ាននៅទីក្រុងម៉ូស្គូឆ្នាំ ២០២៦ បានសង្កត់ធ្ងន់ថា កម្លាំងរបស់អាស៊ានស្ថិតនៅក្នុងសមត្ថភាពជំនះលើភាពខុសប្លែកគ្នា និងកសាងទំនុកចិត្តតាមរយៈការសន្ទនា និងការទូត។ យោងតាមលោក ស្មារតីនេះ មិនត្រឹមតែឆ្លុះបញ្ចាំងនៅក្នុងសេចក្តីថ្លែងការណ៍រួមប៉ុណ្ណោះទេ ប៉ុន្តែថែមទាំងត្រូវបានពូនជ្រុំតាមរយៈការផ្លាស់ប្តូរនៅក្នុងសហគមន៍អាស៊ានទៀតផង។ ឆ្លើយសំណួររបស់អ្នកយកព័ត៌មាននៃវិទ្យុសំឡេងវៀតណាមប្រចាំនៅសហព័ន្ធរុស្ស៊ី ឯកអគ្គរដ្ឋទូតបានវាយតម្លៃខ្ពស់ចំពោះតួនាទីរបស់វៀតណាមក្នុងការលើកកម្ពស់ទំនាក់ទំនងអាស៊ាន-រុស្ស៊ី និងពង្រឹងសាមគ្គីភាពនៃសហគមន៍អាស៊ាននៅទីក្រុងម៉ូស្គូ។
«អាស៊ានកំពុងអភិវឌ្ឍទៅជាសហគមន៍មួយដែលមានចក្ខុវិស័យរួម និងអត្តសញ្ញាណរួម ដោយប្រមូលផ្តុំប្រទេសចំនួន ១១ ផ្សេងៗគ្នា។ ក្នុងនោះ វៀតណាមគឺជាសមាជិកដ៏សំខាន់។ ព្រឹត្តិការណ៍នេះ ត្រូវបានរៀបចំឡើងនៅមជ្ឈមណ្ឌលហាណូយ-ម៉ូស្គូ ដែលវៀតណាមជាម្ចាស់កម្មសិទ្ធិនិងគ្រប់គ្រង បង្ហាញពីការទទួលខុសត្រូវ និងតួនាទីនាំមុខគេរបស់វៀតណាមក្នុងការបង្កើតលក្ខណ្ឌសម្រាប់សហគមន៍អាស៊ានទាំងមូល មានកន្លែងមួយសម្រាប់ជួបជុំគ្នានៅទីនេះ។ វៀតណាមក៏កំពុងបង្ហាញឱ្យយើងឃើញពីរបៀបលើកកម្ពស់ទំនាក់ទំនងជាមួយសហព័ន្ធរុស្ស៊ីផងដែរ»។
ស្តង់នីមួយៗនៅក្នុងទិវាបុណ្យមិនត្រឹមតែបង្ហាញម្ហូបអាហារ និងផលិតផលប្រពៃណីប៉ុណ្ណោះទេ ថែមទាំងបានរៀបរាប់ពីរឿងរ៉ាវនៃអត្តសញ្ញាណវប្បធម៌របស់ប្រទេសនីមួយៗទៀតផង។ ក្រៅពីការបង្ហាញវប្បធម៌ និងម្ហូបអាហារ អ្នកការទូតវ័យក្មេងវៀតណាមបានចូលរួមយ៉ាងសកម្មក្នុងសកម្មភាពផ្លាស់ប្តូរ ដោយរួមចំណែកដល់ការផ្សព្វផ្សាយរូបភាពនៃប្រទេសជាតិនិងប្រជាជនវៀតណាម ទៅកាន់មិត្តភក្តិអន្តរជាតិ។ លោក ង្វៀន ថាញ់លៀម លេខាទីបីនៃស្ថានទូតវៀតណាមប្រចាំសហព័ន្ធរុស្ស៊ី បានចែករំលែកថា៖ «ស្មារតីអាស៊ានមិនត្រឹមតែត្រូវបានបង្ហាញតាមរយៈឯកសារ ឬកិច្ចប្រជុំប៉ុណ្ណោះទេ ប៉ុន្តែក៏ត្រូវបានបង្ហាញយ៉ាងច្បាស់បំផុតតាមរយៈសកម្មភាពផ្លាស់ប្តូរវប្បធម៌រវាងប្រជាជននិងប្រជាជននៃបណ្តាប្រទេសអាស៊ានទៀតផង។ យើងជាអ្នកការទូតវ័យក្មេងដែលមានមោទនភាពក្នុងការលើកកម្ពស់រូបភាពនៃប្រទេសវៀតណាម ឧទ្ទេសនាមវប្បធម៌ ម្ហូបអាហារ និងសិល្បៈ ដែលរួមចំណែកដល់ភាពជោគជ័យរួមនៃព្រឹត្តិការណ៍នេះ»។
ប្រសិនបើស្តង់លក់អាហារបានជួយគណៈប្រតិភូស្វែងរកអត្តសញ្ញាណរបស់ប្រទេសនីមួយៗ នោះសកម្មភាពវប្បធម៌ និងល្បែងប្រជាប្រិយបាននាំឱ្យមនុស្សគ្រប់គ្នាកាន់តែជិតស្និទ្ធគ្នា។ បរិយាកាសនៃទិវាបុណ្យកាន់តែមានភាពរស់រវើក នៅពេលដែលតំណាងឥណ្ឌូនេស៊ីបានអញ្ជើញប្រតិភូឱ្យចូលរួមក្នុងរបាំជាក្រុម Gemu Famire។ លោកស្រី Ernaher Lina លេខាធិការទីបីទទួលបន្ទុកព័ត៌មាន វប្បធម៌ និងសង្គមកិច្ច នៅស្ថានទូតឥណ្ឌូនេស៊ីប្រចាំសហព័ន្ធរុស្ស៊ី បានថ្លែងថា៖ «នេះមិនគ្រាន់តែជាការអបអរសាទរ ទិវាបង្កើតអាស៊ានប៉ុណ្ណោះទេ ប៉ុន្តែក៏ជាឱកាសមួយសម្រាប់អាស៊ានដើម្បីបង្ហាញពីស្មារតីសាមគ្គីគ្នាទៀតផង។ មិនត្រឹមតែក្នុងចំណោមប្រទេសសមាជិកប៉ុណ្ណោះទេ ប៉ុន្តែថែមទាំងជាមួយសហគមន៍រុស្ស៊ីទៀតផង ដែលថា អាស៊ានតែងតែប្រកៀកស្មា សាមគ្គីភាព និងឯកភាពគ្នាជានិច្ច។ យើងសង្ឃឹមថា ស្មារតីនៃកិច្ចសហប្រតិបត្តិការ ចំណងមិត្តភាព និងការឯកភាពក្នុងចំណោមប្រទេសអាស៊ាននឹងបន្តអភិវឌ្ឍ មិនត្រឹមតែរវាងបណ្តាស្ថានទូតប៉ុណ្ណោះទេ ប៉ុន្តែថែមទាំងនៅក្នុងសហគមន៍ និងអាណិកជននៃបណ្តាប្រទេសអាស៊ានទូទាំងសហព័ន្ធរុស្ស៊ីទៀតផង»។
ក្រោយរយៈពេល ៦០ឆ្នាំនៃការបង្កើត និងអភិវឌ្ឍន៍ អាស៊ានមិនត្រឹមតែត្រូវបានស្គាល់ដល់ជាអង្គការសហប្រតិបត្តិការក្នុងតំបន់ដ៏មានប្រសិទ្ធភាពប៉ុណ្ណោះទេ ប៉ុន្តែថែមទាំងបានក្លាយជាសហគមន៍ដ៏ជិតស្និតកាន់តែខ្លាំងឡើងទៀតផង។ ទិវាគ្រួសារអាស៊ានឆ្នាំ ២០២៦ នៅទីក្រុងម៉ូស្គូ គឺជាផ្ទាំងគំនូរតូចមួយនៃសហគមន៍នោះ ដែលបណ្តាប្រទេសសមាជិកបានចែករំលែកអត្តសញ្ញាណវប្បធម៌ ប៉ុន្តែនៅតែខិតខំឆ្ពោះទៅរកតម្លៃរួមនៃសន្តិភាព កិច្ចសហប្រតិបត្តិការ និងការអភិវឌ្ឍ៕
