ບ້ານ ເບົ່າຈຸກ, ຢູ່ຕາແສງ ນິງເຟືອກ, ແຂວງ ແຄັງຮວ່າ ເຄີຍໄດ້ຮູ້ຈັກກັນມາດ້ວຍອາຊີບເຮັດເຄື່ອງປັ້ນດິນເຜົາ. ແຕ່ຫຼາຍຄົນບໍ່ຮູ້ໄດ້ວ່າ ຢູ່ແຫ່ງນີ້ຍັງມີຄອບຄົວໜຶ່ງທີ່ຍັງຮັກສາອາຊີບຫັດຖະກຳທີ່ມີມາແຕ່ບູຮານແລ້ວຂອງຊົນເຜົ່າ ຈຳ ໄວ້, ນັ້ນແມ່ນອາຊີບສະຫຼັກເຄື່ອງເງິນ. ນີ້ໄດ້ຮັບຖືວ່າແມ່ນບ່ອນໜຶ່ງດຽວທີ່ເຮັດເຄື່ອງແກະສະຫຼັກອັນລະອຽດລະອໍ ທີ່ເຄີຍໃຊ້ໃນບັນດາພິທີການຕ່າງໆຂອງຊາວເຜົ່າ ຈຳ.
ແຕ່ລະມື້ສຽງແກະສະຫຼັກເຄື່ອງເງິນຂອງຄອບຄົວ ລຸງ ກິງວັນເກີ່ນ ແລະ ປ້າ ດ່າງທິມີ້ເຈິມ, ຢູ່ບ້ານ ເບົ່າຈຸກ, ຕາແສງ ນິງເຟືອງ, ແຂວງ ແຄັງຮວ່າ ຍັງດັງຂຶ້ນ. ຢູ່ລະບຽງເຮືອນ, ເອື້ອຍ ກິງທິມົ້ງງຶງ, ລູກສາວຜູ້ດຽວຂອງ ລຸງ ເກີ່ນ ແລະ ປ້າ ເຈິມ, ພວມສືບທອດອາຊີບຂອງບັນພະບຸລຸດ. ໂດຍບໍ່ນຳໃຊ້ເຄື່ອງຈັກ, ພຽງແຕ່ນຳໃຊ້ສິ່ວ ແລະ ຄ້ອນຕີ, ໃນເວລາສັ້ນໆ ເອື້ອຍໄດ້ສ້າງຜະລິດຕະພັນເປັນຮູບເປັນຮ່າງ. ປະຈຸບັນ, ສຽງແກະສະຫຼັກເງິນໄດ້ກາຍເປັນຄວາມລື້ງເຄີຍໃນການດຳລົງຊີວິດແຕ່ລະວັນຂອງຄອບຄົວ ເອື້ອຍ ກິງທິມົ້ງງຶງ.
“ຄາວຫາກໍ່ຮຽນອາຊີບນີ້, ຂ້າພະເຈົ້າແກະສະຫຼັກເຄື່ອງເງິນ ຫຼາຍເທື່ອກໍ່ບໍ່ເປັນຈັກເທື່ອ. ແຕ່ລະມື້ຕ້ອງມີຄວາມມານະພະຍາຍາມເຮັດ, ອາຊີບນີ້ຕ້ອງມີຄວາມດຸໜັ່ນ ແລະ ພາກພຽນຈຶ່ງເຮັດໄດ້. ແມ່ຂອງຂ້າພະເຈົ້າມີສີມືດີ, ຂັ້ນຕອນໃດກໍ່ເຮັດໄດ້, ສ່ວນພໍ່ຂອງຂ້າພະເຈົ້າສ່ວນຫຼາຍແມ່ນຮັບຜິດຊອບວຽກງານປະກອບໃຫ້ເປັນຜະລິດຕະພັນ. ຄອບຄົວຂ້າພະເຈົ້າຫວັງວ່າ ໃນອະນາຄົດລູກຫຼານຈະມີຄົນສືບທອດ, ຖ້າບໍ່ດັ່ງນັ້ນ ອາຊີບນີ້ກໍ່ຈະສູນເສຍໄປ”.
ກ່ອນນີ້, ບັນດາຜະລິດຕະພັນໄດ້ເຮັດດ້ວຍເງິນລ້ວນ ແຕ່ຍ້ອນລາຄາຂອງເງິນນັບມື້ນັບສູງ, ສະນັ້ນ, ມີຫຼາຍຜະລິດຕະພັນໄດ້ປ່ຽນໄປເຮັດດ້ວຍອາລູມີນຽມ ຫຼື ທອງເພື່ອໃຫ້ເໝາະສົມກັບເງື່ອນໄຂເສດຖະກິດຂອງປະຊາຊົນ. ເຖິງວ່າໄດ້ປ່ຽນແປງດ້ານວັດຖຸແລ້ວກໍ່ຕາມ ແຕ່ບັນດານາຍຊ່າງ ຍັງຄົງຮັກສາບັນດາລວດລາຍທີ່ເປັນມູນເຊື້ອ ແລະ ຄຸນຄ່າວັດທະນະທຳ ຈຳ ທີ່ໄດ້ແກະສະຫຼັກໄວ້ໃນຜະລິດຕະພັນຢູ່. ຕາມບົດຮຽນປະສົບການທີ່ມາແຕ່ບູຮານແລ້ວ, ຂອດຫຍຸ້ງຍາກທີ່ສຸດຂອງອາຊີບນີ້ແມ່ນຂັ້ນຕອນການແກະສະຫຼັກ ເພື່ອສ້າງເປັນລວດລາຍ, ຄື: ມັງກອນ, ດອກໄມ້, ໃບໄມ້ ຫຼື ບັນດາສັນຍາລັກວັດທະນະທຳທີ່ເປັນເອກະລັກສະເພາະຂອງຊາວເຜົ່າ ຈຳ. ປ້າ ດ່າງທິມິ້ເຈິມ, ໃຫ້ຮູ້ວ່າ:
“ຕອນທຳອິດພໍ່ຂອງຂ້າພະເຈົ້າໄດ້ເຮັດອາຊີບສະຫຼັກເຄື່ອງເງິນ, ຫຼັງຈາກນັ້ນກໍ່ຖ່າຍທອດໃຫ້ຂ້າພະເຈົ້າ. ຕໍ່ມາຂ້າພະເຈົ້າສ້າງຄອບຄົວແລ້ວ ກໍ່ຖ່າຍທອດໃຫ້ຜົວອາຊີບນີ້. ເມື່ອພໍ່ເສຍຊີວິດ, ສອງຜົວເມຍຂ້າພະເຈົ້າໄດ້ສືບທອດອາຊີບຂອງຄອບຄົວ ແລ້ວເຮັດອາຊີບນີ້ມາຮອດປະຈຸບັນ. ຜະລິດຕະພັນທີ່ຄອບຄົວຂ້າພະເຈົ້າຜະລິດນັ້ນ, ມີຄົນມາຊື້ແລ້ວນຳໄປຂາຍຢູ່ຫຼາຍແຫ່ງ, ທັງຢູ່ໃນແລະນອກແຂວງ ແຄັງຮວ່າ. ຍ້ອນມີອາຊີບສະຫຼັກເຄື່ອງເງິນ ຄອບຄົວຂ້າພະເຈົ້າຈຶ່ງສາມາດລ້ຽງດູແລະໃຫ້ລູກ 9 ຄົນໄປຮ່ຳໄປຮຽນໄດ້, ປະຈຸບັນລູກທັງ 9 ຄົນໄດ້ເຕີບໃຫຍ່ແລ້ວ”.
ຍ້ອນມີຄວາມງາມໃນແຕ່ລະຜະລິດຕະພັນ, ແລະມີຊື່ສຽງໃນອາຊີບນີ້, ສະນັ້ນ ຜະລິດຕະພັນທີ່ຄອບຄົວ ລຸງ ກິງວັນເກີ່ນ ຜະລິດອອກ ບໍ່ພຽງແຕ່ຂາຍດີຢູ່ໃນແຂວງ ແຄັງຮວ່າ ເທົ່ານັ້ນ ຫາກຍັງໄດ້ຮັບຄວາມນິຍົມຢູ່ບັນດາແຂວງ, ຄື: ເລິມດົ່ງ, ດົ່ງນາຍ, ໄຕນິງ, ນະຄອນ ໂຮ່ຈີມິນ ອີກດ້ວຍ. ອ້າຍ ບາມິນຈວ່ຽນ, ພະນັກງານຫໍພິພິຕະພັນ ແຄັງຮວ່າ, ໃຫ້ຮູ້ວ່າ:
“ສຳລັບຊາວເຜົ່າ ຈຳ, ບັນດາເຄື່ອງໃຊ້ທີ່ແກະສະຫຼັກດ້ວຍເງິນແມ່ນມີຄວາມສຳຄັນທີສຸດ. ຕົວຢ່າງຄື ພາໃສ່ໃບພູແລະໝາກຄ້ຽວ, ກັບໃສ່ໃບພູແລະໝາກຄ້ຽວ… ນັ້ນແມ່ນບັນດາເຄື່ອງໃຊ້ເຊິ່ງຊາວເຜົ່າ ຈຳ ມີຄວາມນັບຖືທີ່ສຸດ, ໃນໂອກາດຖະຫວາຍບູຊາຈຶ່ງເອົາມາໃສ່ເຄື່ອງບູຊາ ເພື່ອຖະຫວາຍປູ່ຍ່າຕາຍາຍ, ບັນພະບຸລຸດ. ຜ່ານນັ້ນ, ສະແດງຄວາມເຄົາລົບນັບຖືຕໍ່ເທວະດາຟ້າແຖນ, ປູ່ຍ່າຕາຍາຍ, ບັນພະບຸລຸດ”.
ປະຈຸບັນ, ທ້ອງຖິ່ນພວມກຳນົດທິດອະນຸລັກຮັກສາ ແລະ ນຳອາຊີບສະຫຼັກເຄື່ອງເງິນນີ້ ສົມທົບກັບເຄື່ອງບັ້ນດິນເຜົາ ເບົ່າຈຸກ ແລະ ຕ່ຳຜ້າພື້ນເມືອງ ມີ້ງຽບ ເຂົ້າໃນໂຄງການພັດທະນາການທ່ອງທ່ຽວຊຸມຊົນ. ທ່ານ ດ່າງຈິກວຽດ, ເລຂາພັກບ້ານ ເບົ່າຈຸກ, ກ່າວວ່າ:
“ຫວັງວ່າ ອຳນາດການປົກຄອງທຸກຂັ້ນ, ບັນດາຂະແໜງການເອົາໃຈໃສ່ເຖິງນະໂຍບາຍບຳລຸງສ້າງອາຊີບ, ກໍ່ຄືສ້າງເງື່ອນໄຂເພື່ອເຮັດສຳເນົາເອກະສານຮັບຮອງຜົວເມຍລຸງ ເກີ່ນ ແລະ ປ້າ ເຈິມ ເປັນນັກສິລະປະກອນດີເດັ່ນ. ຜ່ານນັ້ນ, ກໍ່ຈະເປັນການລະດົມກຳລັງໃຈ, ສົ່ງເສີມຈິດໃຈ ລຸງ ເກີ່ນ ແລະ ປ້າ ເຈິມ, ປະກອບສ່ວນຖ່າຍທອດ, ສິດສອນອາຊີບສະຫຼັກເຄື່ອງເງິນໃຫ້ແກ່ຄົນລຸ້ນຫຼັງ”.
ອາຊີບສະຫຼັກເຄື່ອງເງິນຢູ່ບ້ານ ເບົ່າຈຸກ ແມ່ນອາຊີບຫັດຖະກຳທີ່ມີມາແຕ່ດົນນານ ແລະ ເປັນເອກະລັກສະເພາະ. ເຖິງວ່າບໍ່ບໍ່ແມ່ນອາຊີບທົ່ວໄປຄືອາຊີບເຮັດເຄື່ອງປັ້ນດິນເຜົາກໍ່ຕາມ, ແຕ່ອາຊີບສະຫຼັກເຄື່ອງເງິນຍັງໄດ້ຮັບການຮັກສາໄວ້ຜ່ານຫຼາຍລຸ້ນຄົນ, ສວມບົດບາດທີ່ຈຳເປັນໃນການຜະລິດບັນດາຜະລິດຕະພັນຮັບໃຊ້ຊີວິດທາງດ້ານຈິດວິນຍານ ແລະ ການເຫຼື້ອມໄສເຊື່ອຖືຂອງຊາວເຜົ່າ ຈຳ.
