ສຳລັບຊາວເຜົ່າມົ້ງ ຢູ່ຕາແສງ ຕາຊົວ ແຂວງ ເຊີນລາ, ການຍ້ອມສີຄາມບໍ່ພຽງແຕ່ໄດ້ສ້າງເປັນສີຟ້າພິເສດສະເພາະໃຫ້ແຜ່ນແພເທົ່ານັ້ນ, ຜ່ານນັ້ນຈະແມ່ນບັນດາລວດລາຍທີ່ໄດ້ຮັກສາໄວ້ຜ່ານຫຼາຍລຸ້ນຄົນອີກດ້ວຍ. ແຕ່ລະແຖວຖັກແສ່ວ, ແຕ່ລະລວດລາຍກໍ່ລ້ວນແຕ່ມີຂີດໝາຍຂອງແຕ່ລະກຸ່ມຊາວເຜົ່າມົ້ງ, ກາຍເປັນວິທີເພື່ອຮັບຮູ້ກົກເຄົ້າ ແລະ ສີສັນວັດທະນະທຳ. ອ້າຍ ທ່າວອາຈົງ ຜູ້ພວມຮັກສາອາຊີບຍ້ອມສີຄາມພື້ນເມືອງຂອງຊາວເຜົ່າມົ້ງ ຢູ່ຕາແສງ ຕາຊົວ ແບ່ງປັນວ່າ:
ຮິດຄອງປະເພນີຂອງແຕ່ລະບ່ອນຈະມີຄວາມແຕກຕ່າງກັນ, ຢູ່ຕາແສງ ຕາຊົວ, ຊາວເຜົ່າມົ້ງດຳ ແລະ ຊາວເຜົ່າມົ້ງສີ ແມ່ນ 2 ຕະກຸນຕ່າງກັນ ແຕ່ມີເຕັກນິກການຕ່ຳແພຄືກັນ, ມີລວດລາຍຕ່າງກັນ. ເບິ່ງສົ້ງເສື້ອຂອງຕະກຸນຊາວເຜົ່າມົ້ງ, ເບິ່ງລວດລາຍຈະສາມາດຈຳແນກ 2 ຕະກຸນຊາວເຜົ່າມົ້ງໄດ້.
ເພື່ອຍ້ອມສີຄາມໃຫ້ແຜ່ນແພຜືນໜຶ່ງບໍ່ແມ່ນສິ່ງທີ່ງ່າຍດາຍ. ຈາກຂອດແຊ່ຄາມກໍ່ຕ້ອງຄິດໄລ່ລະອຽດ ເພື່ອເຮັດແນວໃດໃຫ້ມີສີຕິດທົນທານ ແລະ ງາມທີ່ສຸດ. ອ້າຍ ຫງວຽນຈ້ອງທິ້ງ, ຜູ້ກໍ່ຕັ້ງ ແລະ ແນະນຳຢູ່ໂຮງຈັກຍ້ອມສີຄາມ ຕາແສງ ຕາຊົວ, ແຂວງ ເຊີນລາ ແບ່ງປັນວ່າ:
ເມື່ອເຮົາຫາກໍ່ເຮັດສີຄາມເພື່ອຍ້ອມ, ມັນຕ່າງກັບບັນດາວັດຖຸດິບອື່ນ ແມ່ນບໍ່ສາມາດຍ້ອມໄດ້ເລີຍ, ຫາກຕ້ອງລໍຖ້າເວລາເໝາະສົມ. ເພື່ອບັນລຸໄດ້ຄຸນນະພາບດີທີ່ສຸດ, ສີງາມທີ່ສຸດ, ອາດຈະເສຍເວລາເຖິງ 1 ເດືອນ, ເວລານັ້ນຈຶ່ງຈະສາມາດຜະລິດ ແລະ ຍ້ອມດ້ວຍຈຳນວນຫຼາຍໄດ້. ເມື່ອໄດ້ເວລາເໝາະສົມ, ຄຸນນະພາບຜະລິດຕະພັນອາດຈະແກ່ຍາວເຖິງນັບສີບປີກໍ່ບໍ່ອອກສີ.
ປະຈຸບັນ, ແຕ່ລະເດືອນ, ໂຮງງານຍ້ອມສີຄາມ ຕາຊົວ ໄດ້ຜະລິດປະມານ 100 ຜະລິດຕະພັນ ແລະ ຕ້ອນຮັບແຂກນັບສີບຖ້ຽວຄົນມາຢ້ຽມຊົມ ແລະ ລົງຕົວຈິງ. ເຖິງວ່າຂອບຂະໜາດບໍ່ໃຫຍ່ ແຕ່ກໍ່ພໍໃຫ້ບັນດາຜູ້ຮັກສາອາຊີບພື້ນເມືອງ ບົນເຂດດິນແດນຂອງບ້ານເກີດເມືອງນອນມີຄວາມເຊື່ອໝັ້ນວ່າ: ຕົນເອງພວມໄປຖືກທິດ.
ຖ້າກ່ອນນີ້, ຫຼາຍຄົນໄດ້ມາ ຕາຊົວ ເພື່ອຮັບອາລຸນໃນທ່າມກາງທະເລໝອກ ຫຼືຄົ້ນຫາກະດູກສັນຫຼັງຂອງ ໄດໂນເສົາ, ແຕ່ປະຈຸບັນ, ວິວັດການນັ້ນກໍ່ມີຈຸດນັດພົບໃໝ່. ເພື່ອນ ຕ້າຍຸງ, ແຂກທ່ອງທ່ຽວມາຈາກ ຮ່າໂນ້ຍ ແບ່ງປັນວ່າ:
ຂ້າພະເຈົ້າມີຄວາມປະທັບໃຈທີ່ສຸດແມ່ນຂັ້ນຕອນການຍ້ອມສີຄາມ, ແພຂາວຜືນໜຶ່ງພາຍຫຼັງໄດ້ຍ້ອມສີຄາມຈະກາຍເປັນແຜ່ນແພສີຄາມທີ່ເປັນເອກະລັກສະເພາະທີ່ສຸດ. ເມື່ອແຕ້ມດ້ວຍຂີ້ເຜິ້ງໃສ່ແຜ່ນແພສີຄາມ ພັດກາຍເປັນສີຂາວ. ສິ່ງພິເສດແມ່ນແຜ່ນແພໄດ້ຍ້ອມສີຄາມຈະບໍ່ປ່ຽນສີເມື່ອຊັກລວມກັບສົ້ງເສື້ອອື່ນໆ. ບັນດາວັດຖຸດິບທຳມະຊາດນີ້ ໄດ້ເຮັດໃຫ້ເປັນສີທີ່ເປັນເອກະລັກສະເພາະຂອງບັນດາຊຸດອາພອນທີ່ໄດ້ຍ້ອມສີຄາມຂອງຊາວເຜົ່າມົ້ງ.
ໂດຍບໍ່ຄຶກໂຄມ, ບໍ່ອວດໂອ້, ບັນດາຄົນໜຸ່ມໄດ້ເລົ່າເລື່ອງອາຊີບຍ້ອມສີຄາມຢູ່ຕາແສງ ຕາຊົວ ແຂວງ ເຊີນລາ ດ້ວຍຈັງຫວະການດຳລົງຊີວິດຂອງໝູ່ບ້ານ ກັບບັນດາຄຸນຄ່າດັ້ງເດີມທີ່ສຸດ ເພື່ອໃຫ້ຄຸນຄ່າພື້ນເມືອງບໍ່ຖືກສູນຫາຍໄປ./.
