ໝູ່ບ້ານອາຊີບຂັດສີ ກາດດັ່ງ ໄດ້ຮັບການສ້າງຕັ້ງຂຶ້ນ ແລະ ພັດທະນາໃນເວລາກວ່າ 600 ປີແລ້ວ, ຜະລິດຕະພັນຂອງໝູ່ບ້ານໄດ້ປະກົດໃນສາລາ, ວິຫານ, ວັດວາອາຮາມແຫ່ງຕ່າງໆ… ດ້ວຍບັນດາຜະລິດຕະພັນເຄືຶຶອບສີເຫຼືອງເຫຼື້ອມຄື: ບັນດາຮູບປັ້ນ, ບັນລັງ, ຕູ້ບູຊາ, ປະຕູຮ້ານບູຊາ, ຄຳປະຕິຄູ່… ກ່ອນນີ້, ຜະລິດຕະພັນຂັດສີເຄີຍເຮັດໃສ່ໄມ້ ແຕ່ປະຈຸບັນນາຍຊ່າງໝູ່ບ້ານ ກາດດັ່ງ ໄດ້ປະດິດສ້າງຜະລິດຕະພັນຈາກໄມ້ໄຜ່ໄມ້ເຮັ້ຍ ເພື່ອເຮັດເປັນເຄື່ອງທີ່ລະນຶກ, ປະດັບປະດາໃນຄອບຄົວ, ສຳນັກງານ… ເພື່ອໃຫ້ເໝາະສົມກັບຍຸກສະໄໝປະຈຸບັນ. ອ້າຍ ດັ້ງແທັ່ງກົງ ເຈົ້າຂອງຮາກຖານຜະລິດເຄື່ອງຂັດສີຢູ່ຕາແສງ ວ້ານທັງ ແຂວງ ນິງບິ່ງ ໃຫ້ຮູ້ວ່າ:
ເມື່ອກ່ອນໄດ້ເຮັດດ້ວຍມືທັງໝົດ ແຕ່ໃນ 2, 3 ປີມານີ້, ພວກຂ້າພະເຈົ້າກໍ່ໃຊ້ເຄື່ອງຈັກເພື່ອແນໃສ່ເພີ່ມປະລິມາການຜະລິດ. ໃນຊຸມປີມໍ່ໆມານີ້, ສິນຄ້າເຮັດດ້ວຍໄມ້ໄຜ່ ໄມ້ເຮັ້ຍ ໄດ້ເພີ່ມຂຶ້ນເປັນຈຳນວນຫຼາຍ. ສີມືຂອງນາຍຊ່າງໄດ້ຍົກສູງຂຶ້ນຍ້ອນຄວາມຮຽກຮ້ອງທີ່ນັບມື້ນັບຫຼາຍຂອງລູກຄ້າ. ຜະລິດຕະພັນສົ່ງອອກຂອງພວກຂ້າພະເຈົ້າແມ່ນແຕ່ 500 ຮອດລ້ານຜະລິດຕະພັນ.
ໄມ້ໄຜ່ໄມ້ເຮັ້ຍພາຍຫຼັງໄດ້ແຊ່ນ້ຳໄວ້ເປັນເດືອນ ກໍ່ເອົາມາຕາກໃຫ້ແຫ້ງປະມານ 1 ອາທິດ ແລ້ວຈະເອົາໄປເຮັດບັນດາຂັ້ນຕອນເພື່ອເຮັດເປັນຜະລິດຕະພັນ ຫຼັງຈາກນັ້ນຈະແມ່ນຂັ້ນຕອນຂັດສີ. ເອື້ອຍ ບຸ່ຍທິທູ ຜູ້ມີປະສົບການຜະລິດບັນດາຜະລິດຕະພັນຈາກໄມ້ໄຜ່ໄມ້ເຮັ້ຍຂັດສີເປັນເວລາ 20 ປີ ແບ່ງປັນວ່າ:
ນາຍຊ່າງຕອ້ງຄັດເລືອກໄມ້ເຮັ້ຍ ບໍ່ເອົາອ່ອນເກີນໄປ ກໍ່ຄືບໍ່ແກ່ເກີນໄປ. ເອົາມາແຊ່ນ້ຳຢ່າງໜ້ອຍສຸດແມ່ນ 6 ເດືອນເພື່ອບໍ່ໃຫ້ອອກໂໝກ, ມີຄວາມທົນທານ. ຫຼັງຈາກນັ້ນແມ່ນຂັ້ນຕອນຕັດຜ່າໄມ້ເຮັ້ຍເປັນທ່ອນ, ເຮັດໃຫ້ປ່ຽງໄມ້ເຮັ້ຍເຫຼື້ອມງາມ…
ພາຍຫຼັງໄດ້ກະກຽມໄມ້ໄຜ່ໄມ້ເຮັ້ຍຕາມຂັ້ນຕອນທຳອິດເປັນທີ່ຮຽບຮ້ອຍແລ້ວ, ແຕ່ລະຜະລິດຕະພັນໄດ້ປະຕິບັດຜ່ານຫຼາຍຂັ້ນຕອນຢ່າງລະອຽດລະອໍຕື່ມອີກຄື: ຮອງພື້ນສີ, ທາສີ, ຂັດໃຫ້ເຫຼື້ອມ, ຕິດຫອຍກັບກີ້, ໂອບເປືອກໄຂ່, ເຄືອບຄຳ… ສຸດທ້າຍ, ບັນດານາຍຊ່າງຈະປະດັບປະດາດ້ວຍລວດລາຍຕ່າງໆ. ທ່ານ ຈິ້ງງອກຖຸຍ ຮອງຜູ້ອຳນວຍການ ບໍລິສັດ ນາມຫາຍ ຈຳກັດ, ຕາແສງ ວ້ານທັງ ແຂວງ ນິງບິ່ງ ໃຫ້ຮູ້ວ່າ:
ທຸກຂັ້ນຕອນເຮັດຜະລິດຕະພັນຂັດສີທີ່ເຮັດດ້ວຍມື ລ້ວນແຕ່ສຳຄັນທີ່ສຸດ ຍ້ອນວ່າ ນັ້ນແມ່ນຜະລິດຕະພັນທີ່ເປັນມິດກັບສິ່ງແວດລ້ອມ. ນັ້ນແມ່ນເຄື່ອງໃຊ້ໃນຄອບຄົວ, ເຮືອນຄົວ, ເຄື່ອງບັນຈຸອາຫານ, ດັ່ງນັ້ນ ທຸກຂັ້ນຕອນຕ້ອງໄດ້ຮັບການກວດກາຢ່າງເຂັ້ມງວດເພື່ອຮັບປະກັນມາດຖານການສົ່ງອອກ ແລະ ຮັບປະກັນຫຼັກອະນາໄມດ້ານສະບຽງອາຫານ.
ປະຈຸບັນ, ຜະລິດຕະພັນຂັດສີຂອງໝູ່ບ້ານ ກາດດັ່ງ ມີຫຼາຍຮູບຫຼາຍແບບ, ສ່ວນຫຼາຍແມ່ນເຄື່ອງໃຊ້ໃນຄອບຄົວ, ເຄື່ອງປະດັບປະດາໃນເຮືອນຄື: ໂຖດອກໄມ້, ພາບ… ດ້ວຍເຕັກໂນໂລຊີໃໝ່, ຜະລິດຕະພັນບໍ່ພຽງແຕ່ຕອບສະໜອງຕາມຄວາມຕ້ອງການຂອງຕະຫຼາດພາຍໃນປະເທດເທົ່ານັ້ນ, ຫາກຍັງໄດ້ສົ່ງອອກໄປຍັງຫຼາຍປະເທດຄື: ອາເມລິກາ, ອີຢູ, ຍີ່ປຸ່ນ, ລັດເຊຍ… ອີກດ້ວຍ. ທ່ານ ຟ້າມຕຽນດ້ຽນ ຮອງປະທານຄະນະກຳມະການ ປຊຊ ຕາແສງ ວ້ານທັງ ແຂວງ ນິງບິ່ງ ໃຫ້ຮູ້ວ່າ:
ເມື່ອກ່ອນ, ບັນດາຄອບຄົວໃນຕາແສງໄດ້ເຮັດອາຊີບຂັດສີເອງ ເພື່ອສະໜອງໃຫ້ບັນດາຕາແສງໃກ້ຄຽງໃນແຂວງ ແລະ ໃນທົ່ວປະເທດ. ແຕ່ໄລຍະມໍ່ໆມານີ້, ອາຊີບຂັດສີ ກໍ່ໄດ້ພັດທະນາ, ມີຜະລິດຕະພັນສົ່ງອອກໄປຍັງ ເອີລົບ, ທະວີບອາເມລິກາ. ມາຮອດຈຸດເວລານີ້, ບັນດາວິສາຫະກິດໃນບໍລິເວນຕາແສງ ວ້ານທັງ ໄດ້ສ້າງຂຶ້ນເປັນຂອບຂະໜາດໃຫຍ່ແລ້ວ ແລະ ສ້າງຂັ້ນຕອນການຜະລິດຢ່າງເຂັ້ມງວດທີ່ສຸດ ເພື່ອຮັບປະກັນບັນດາມາດຖານການສົ່ງອອກ.
ປະຈຸບັນ, ຕາແສງ ວ້ານທັງ ແຂວງ ນິງບິ່ງ ມີແຮງງານກວ່າ 3000 ຄົນເຮັດອາຊີບຂັດສີ. ເພື່ອໃຫ້ອາຊີບໄດ້ພັດທະນາແບບຍືນຍົງ, ອຳນາດກາປົກຄອງທ້ອງຖິ່ນ ໄດ້ໜູນຊ່ວຍວິສາຫະກິດປ່ຽນແປງໃໝ່ເຄື່ອງອຸປະກອນ, ເຂົ້າຮ່ວງານຕະຫຼາດນັດສົ່ງເສີມການຄ້າ, ສ້າງເຄື່ອງໝາຍການຄ້າໃຫ້ຜະລິດຕະພັນເຮັດຈາກໄມ້ໄຜ່ໄມ້ເຮັ້ຍຂັດສີ ກາດດັ່ງ ເທື່ອລະກ້າວ. ພ້ອມກັນນັ້ນ, ຂະແໜງທ່ອງທ່ຽວຍັງໄດ້ນຳ ໝູບ້ານ ກາດດັ່ງ ກາຍເປັນສະຖານທີ່ທ່ອງທ່ຽວໝູ່ບ້ານອາຊີບ ສົມທົບກັບບັນດາລາຍການທ່ອງທ່ຽວວັດທະນະທຳ, ທຳມະຊາດຂອງແຂວງ ນິງບິງ ເທື່ອລະກ້າວອີກດ້ວຍ./.
