ໂດຍຕັ້ງຢູ່ທາງຝັ່ງຊ້າຍແຄມແມ່ນຳ້ແດງ, ຮ່າໂນ້ຍ, ໝູ່ບ້ານອາຊີບຜະລິດເຄືື່ອງປັ້ນດິນເຜົາ ກີມລານ ແມ່ນໜຶ່ງໃນບັນດາອູ່ຜະລິດເຄື່ອງປັ້ນດິນເຜົາບູຮານຂອງເຂດທົ່ງພຽງທາງພາກເໜືອ ຫວຽດນາມ. ໝູ່ບ້ານອາຊີບ ກິມລານ ບໍ່ມີຄວາມອຶກກະທຶກຄຶກໂຄມ, ບໍ່ຖືກຫັນເປັນການຄ້າ ແລະ ໄດ້ຄົງຕົວຢ່າງສະຫງົບງຽບ, ທົນທານ, ພ້ອມກັບນາຍຊ່າງລຸ້ນຕ່າງໆ ນັບມື້ນັບຮັກສາ ແລະ ເສີມຂະຫຍາຍອາຊີບຜະລິດເຄື່ອງປັ້ນດິນເຜົາທີ່ເປັນມູນເຊື້ອຂອງບ້ານເກີດເມືອງນອນ.
ໂດຍຢູ່ຫ່າງຈາກ ຮ່າໂນ້ຍ ປະມານ 20 ກມ, ໝູ່ບ້ານຜະລິດເຄື່ອງປັ້ນດິນເຜົາ ກິມລານ, ຕາແສງ ບາດຈ່າງ, ຮ່າໂນ້ຍ ໄດ້ຮູ້ຈັກເຖິງແມ່ນໝູ່ບ້ານຜະລິດເຄື່ອງປັ້ນດິນເຜົາ, ດິນເຄືອບໃຫ້ແກ່ລາຊະວັງ ທັງລອງ ໃນເມື່ອກ່ອນ ດ້ວຍໄລຍະປະຫວັດສາດອັນຍາວນານນັບຫຼາຍປີ. ອາຊີບຜະລິດເຄື່ອງປັ້ນດິນເຜົາຢູ່ທີ່ນີ້ໄດ້ສ້າງຕັ້ງຂຶ້ນນັບແຕ່ສະຕະວັດທີ 8 ແລະ ມີການພັດທະນາຢ່າງຈະເລີນຮຸ່ງເຮືອງໃນເວລາເກືອບ 10 ສະຕະວັດ ຈົນຮອດເວລາຖືກສູນຫາຍໄປໃນທ້າຍສະຕະວັດທີ 18. ຮອດທ້າຍຊຸມປີ 70 ຂອງສະຕະວັດກ່ອນ, ຊາວໝູ່ບ້ານ ກິມລານ ພັດໄດ້ຟື້ນຟູບັນດາເຕົາເຜົາດິນເກົ່າ ຄ່ອຍໆຟື້ນຟູເປັນໝູ່ບ້ານອາຊີບທີ່ມັ່ງຄັ່ງຄືໃນທຸກວັນນີ້.
ໂດຍມີອາຍຸເກືອບ 1000 ປີ, ໝູ່ບ້ານ ກິມລານ ຍັງຮັກສາໄດ້ສີສັນຂອງໝູ່ບ້ານອາຊີບບູຮານອັນສະຫງົບງຽບທີ່ມີມູນເຊື້ອໃນການຜະລິດເຄື່ອງປັ້ນດິນເຜົາມາແຕ່ດົນນານ. ສິ່ງໄດ້ສ້າງຄວາມແຕກຕ່າງຂອງເຄື່ອງປັ້ນດິນເຜົາ ກິມລານ ແມ່ນຜະລິດຕະພັນບໍ່ມີລວດລາຍທີ່ພິຖີລະອຽດ ຫາກມີຄວາມລຽບງ່າຍ, ກົມກຽວ, ສ້າງຄວາມສະດວກ ແຕ່ຍັງພົ້ນເດັ່ນອອກຈຸດທີ່ສວຍງາມ, ດູດດື່ມໃຈ… ທ່ານ ດ່າວຫວຽດບິນ, ນັກສິລະປະກອນ, ປະທານສະມາຄົມເຄື່ອງປັ້ນດິນເຜົາ ກິມລານ ໃຫ້ຮູ້ວ່າ:
ໝູ່ບ້ານອາຊີບຜະລິດເຄື່ອງປັ້ນດິນເຜົາ ກິມລານ ມີ 425 ຄອບຄົວ ຊື່ງໄດ້ຜະລິດບັນດາປະເພດເຄື່ອງປັ້ນດິນເຜົາກໍ່ສ້າງ, ເຄື່ອງໃຊ້ໃນຄອບຄົວ, ເຄື່ອງຮວງຈຸ້ຍ, ເຄື່ອງບູຊາ… ຢູ່ໝູ່ບ້ານອາຊີບ ກິມລານ ມີບັນດາໂຮງຈັກຜະລິດໃຫຍ່, ຫມູ່ບ້ານໄດ້ສ້າງຕັ້ງສະມາຄົມເຄື່ອງປັ້ນດິນເຜົາ ຊື່ງແມ່ນແຫ່ງທີ່ບັນດານັກສີລະປະກອນ, ນາຍຊ່າງສາມາດພົວພັນແລກປ່ຽນ, ຮ່ຳຮຽນ ແລະ ຖ່າຍທອດບັນດາບົດຮຽນປະສົບການໃນການຜະລິດໃຫ້ກັນ.
ຕາມບັນດານັກສິລະປະກອນ, ນາຍຊ່າງໃນໝູ່ບ້ານ, ເຄື່ອງປັ້ນດິນເຜົາ ກິລານ ມີຈຸດພິເສດສະເພາະ ຍ້ອນສາມາດປະກາຍເລືອງແສງ ເມື່ອມີແສງສະຫວ່າງ, ເຄັດລັບສ້າງຄວາມສາມາດປະກາຍແສງຂອງເຄື່ອງປັ້ນດິນເຜົາ ແມ່ນຢູ່ໃນວັດຖຸດິບ ແລະ ຕັກນິກການເຜົາດິນທີ່ຊັດເຈນ. ໂດຍມີເວລາເກືອບ 40 ປີໄດ້ຕິດພັນກັບອາຊີບ, ນັກສິລະປະກອນ ຫງວຽນວັນງວຽນ ໄດ້ຍຶດໝັ້ນກັບການເຮັດເຄື່ອງປັ້ນດິນເຜົາແບບຫັດຖະກຳ. ນັກສິລະປະກອນ ຫງວຽນວັນງວຽນ ແບ່ງປັນວ່າ:
ຂ້າພະເຈົ້າເຮັດເຄື່ອງປັນດິນເຜົາດ້ວຍມືຈາກດິນດາກ, ສືບທອດມູນເຊື້ອຂອງລຸ້ນພໍ່ລຸ້ນອ້າຍ. ຜະລິດຕະພັນຂອງຂ້າພະເຈົ້າເຮັດແມ່ນນ້ຳເຄືອບສີຟ້າ. ຂ້າພະເຈົ້າໄດ້ເດີນຕາມທິດທາງສະເພາະຂອງຕົນເພື່ອຮັກສາອາຊີບ, ພ້ອມກັນນັ້ນ ນີ້ກໍ່ແມ່ນຜະລິດຕະພັນເຄື່ອງປັ້ນດິນເຜົາມີມູນຄ່າສູງ. ຜ່ານບັນດາຜະລິດຕະພັນນີ້, ຫຼາຍຄົນກໍ່ຮູ້ຈັກ ເຄື່ອງປັ້ນດິນເຜົາ ກິມລານ.
ນັກສິລະປະກອນໜຸ່ມ ເຈິ່ນເຕິດກວັນ ດ້ວຍພື້ນຖານຄວາມຮູ້ດ້ານວິຈິດສິນທີ່ດີ ພວມນຳມາເຊິ່ງກະແສລົມໃໝ່ໃຫ້ແກ່ໝູ່ບ້ານອາຊີບຜະລິດເຄື່ອງປັ້ນດິນເຜົາ ກິມລານ. ດ້ວຍການໝູນໃຊ້ວິທີການປັ້ນນູນ 3 ມິຕິ, ສົມທົບກັນຢ່າງກົມກຽວລະຫວ່າງລັກສະນະຄວາມງາມ ແລະ ສະມັດຕະພາບການນຳໃຊ້, ລາວໄດ້ສ້າງບັນດາຜະລິດຕະພັນທີ່ໄດ້ຮັບການອອກແບບພິເສດ, ທັງງາມ, ທັງມີປະໂຫຍດໃນການນຳໃຊ້. ນັກສິລະປະກອນ ເຈິ່ນເຕິດກວັນ ໃຫ້ຮູ້ວ່າ:
ຂ້າພະເຈົ້າເຮັດຜະລິດຕະພັນ decor ປະດັບປະດາຕາມແບບປັ້ນ, ແຕ້ມ, ປະດິດສ້າງ, ປ່ຽນແປງ… ຫາກບໍ່ໄດ້ເຮັດຕາມແບບທີ່ມີແລ້ວ. ຂ້າພະເຈົ້າໄດ້ຮັດເຄື່ອງປັ້ນດິນເຜົາຕາມວິທີການທັນສະໄໝ. ບັນດາແບບໂດຍຂ້າພະເຈົ້າອອກແບບຈະບໍ່ຊ້ຳກັນ. ຈຳນວນບໍ່ຫຼາຍ ແຕ່ເມື່ອເປັນຜະລິດຕະພັນກໍ່ລ້ວນແຕ່ມີແຂກມາຊື້ໝົດ.
ຢູ່ໝູ່ບ້ານອາຊີບຜະລິດເຄື່ອງປັ້ນດິນເຜົາ ກິມລານ, ມູນເຊື້ອບໍ່ໄດ້ປະກົດຢູ່ລວດລາຍ, ສີເຄືອບເທົ່ານັ້ນ, ຫາກຍັງແມ່ນໃນຈິນຕະນາການຮັກສາອາຊີບ ດ້ວຍວິທີເຮັດໃໝ່ອີກດ້ວຍ. ບັນດານັກສິລະປະກອນໜຸ່ມບໍ່ຄິດງໍ້ທີ່ທົດລອງບັນດາການອອກແບບໃໝ່ ຫຼືນຳໃຊ້ການຄ້າເອເລັກໂຕນິກ ເພື່ອເປີດກ້ວາງສົ້ນອອກຂອງຜະລິດຕະພັນ. ທ່ານ ດ່າວຫວຽດບິນ, ນັກສິລະປະກອນ, ປະທານສະມາຄົມເຄື່ອງປັ້ນດິນເຜົາ ກິມລານ ໃຫ້ຮູ້ວ່າ:
ຢູ່ໝູ່ບ້ານອາຊີບຜະລິດເຄື່ອງປັ້ນດິນເຜົາ ກິມລານ, ມີເຂດວາງສະແດງບັນດາຜະລິດຕະພັນ OCOP ຢູ່ໃກ້ກັບຫໍພິພິຕະພັນເຄື່ອງປັ້ນດິນເຜົາ ກິມລານ. ນອກຈາກນັ້ນ ກໍ່ຍັງມີບັນດາເຕົາເຜົາເຄື່ອງປັ້ນດິນເຜົາບູຮານພື້ນເມືອງ ເຜົາດ້ວຍຖ່ານທີ່ເກົ່າແກ່ ຊື່ງແຂກຕ່າງປະເທດນິຍົມທີ່ສຸດ. ໃນອະນາຄົດ, ພວກຂ້າພະເຈົ້າໄດ້ມີການກຳນົດທິດພັດທະນາອາຊີບຜະລິດເຄື່ອງປັ້ນດິນເຜົາ ຕິດພັນກັບການທ່ອງທ່ຽວ.
ແຕ່ລະປີ, ບັນດານັກສິລະປະກອນ, ນາຍຊ່າງຂອງໝູ່ບ້ານອາຊີບຜະລິດເຄື່ອງປັ້ນດິນເຜົາ ກິມລານ ໄດ້ຈັດບັນດາຊຸດສອນວິຊາຊີບຜະລິດເຄື່ອງປັ້ນດິນເຜົາໃຫ້ແກ່ລຸ້ນໜຸ່ມ ໃນຄວາມມານະພະຍາຍາມອະນຸລັກຮັກສາ ແລະ ພັດທະນາອາຊີບທີ່ເປັນມູນເຊື້ອ; ຜ່ານນັ້ນ, ກໍ່ໄດ້ສືບຕໍ່ວິວັດການປະສານສົມທົບລະຫວ່າງມໍລະດົກສີລະປະ ແລະ ຄວາມຍອດຍິ່ງທີ່ຂ້າມຜ່ານການເວລາ./.
