ໂດຍຕັ້ງຢູ່ທາງທິດຕາເວັນຕົກສ່ຽງເໜືອຂອງ ຫວຽດນາມ, ຕາແສງ ທູລຸ້ມ (ແຂວງ ລາຍເຈົາ) ແມ່ນແຫ່ງດຳລົງຊີວິດຂອງພໍ່ແມ່ປະຊາຊົນບັນດາເຜົ່າ ຮ່າຍີ່, ລາຮູ, ຢ້າວ. ຢູ່ແຫ່ງນີ້ເງື່ອນໄຂທຳມະຊາດຮ້າຍແຮງ, ທາງຄົມມະນາຄົມຖືກຕັດແຍກ, ແຕ່ໃນຊຸມປີຜ່ານມາ, ຍ້ອນມີຄວາມເອົາໃຈໃສ່ຢ່າງໃກ້ຊິດຂອງພັກ, ລັດ ຜ່ານລະບົບນະໂຍບາຍຊົນເຜົ່າ ແລະ ບັນດາໂຄງການເປົ້າໝາຍແຫ່ງຊາດ, ທູລຸ້ມ ໄດ້ຄ່ອຍໆຫັນປ່ຽນ, ສ້າງໂສມໜ້າໃໝ່ທັງດ້ານເສດຖະກິດ, ສັງຄົມ ແລະ ຊີວິດທາງດ້ານວັດທະນະທຳ ຈິດໃຈໃຫ້ແກ່ປະຊາຊົນ.
ບັນດາເສັ້ນທາງເບຕົງທີ່ເຊື່ອມຕໍ່ກັບໝູ່ບ້ານ, ໄຟຟ້າໄດ້ມາຍັງແຕ່ລະຄອບຄົວ, ບັນດາສວນຢາສະໝູນໄພຂຽວອຸ່ມທຸ່ມ… ນັ້ນແມ່ນຮູບພາບໃໝ່, ພິສູດໃຫ້ເຫັນການປ່ຽນແປງຢ່າງແຮງ ພ້ອມກັບຄວາມຄາດຫວັງບືນຕົວຂຶ້ນຂອງປະຊາຄົມບັນດາເຜົ່າຢູ່ ທູລຸ້ມ, ແຫ່ງທີ່ເຄີຍປະເຊີນໜ້າກັບຄວາມອຶດຫິວ, ທຸກຍາກມາຫຼາຍປີຢູ່ເຂດຊາຍແດນແຂວງ ລາຍເຈົາ.
ຫວນຄືນການດຳລົງຊີວິດໃນເມື່ອກ່ອນ ເມື່ອເງື່ອນໄຂທຳມະຊາດຍັງຮ້າຍແຮງ, ທາງຄົມມະນາຄົມຖືກຕັດແຍກ, ໄຟຟ້າບໍ່ມີ, ນ້ຳຍັງຂາດເຂີນ, ພໍ່ແມ່ປະຊາຊົນພຽງແຕ່ລຶ້ງເຄີຍກັບການຜະລິດແບບກະແຈກກະຈາຍ, ດຳລົງຊີວິດແບບຊົ່ວຄາວ, ທ່ານ ຈູຍູ່ກ່າ, ຊົນເຜົ່າ ຮ່າຍີ່, ຢູ່ບ້ານ ແມ໊ຢ໊ອງ, ຜູ້ທີ່ໄດ້ຕິດພັນກັບ ຕາແສງທູລຸ້ມ ມາເປັນເວລາກວ່າ 60 ປີ, ສະແດງຄວາມພາກພູມໃຈຕໍ່ການປ່ຽນແປງຂອງໝູ່ບ້ານ, ບ້ານເກີດເມືອງນອນ.
“ການດຳລົງຊີວິດຂອງປະຊາຊົນ ແລະ ຄວາມຮັບຮູ້ຂອງປະຊາຊົນໄດ້ຮັບການຍົກສູງຂຶ້ນຢ່າງເຫັນໄດ້ຊັດ. ນັບແຕ່ເມື່ອມີກົງຈັກການນຳໃໝ່, ສະພາບເສດຖະກິດ - ສັງຄົມຂອງພໍ່ແມ່ປະຊາຊົນໄດ້ຮັບຄວາມເອົາໃຈໃສ່ ແລະ ພັດທະນາກວ່າ. ໄຟຟ້າ, ເສັ້ນທາງ, ໂຮງຮຽນ, ສຸກສາລາ ໄດ້ຮັບການລົງທຶນ ແລະ ມີຄວາມໝັ້ນຄົງກວ່າເມື່ອທຽບໃສ່ກ່ອນນີ້”.
ຕາແສງ ທູລຸ້ມ ໄດ້ຮັບການສ້າງຕັ້ງຂຶ້ນບົນພື້ນຖານໂຮມຕາແສງ ກາລັງ ເຂົ້າກັບ ທູລຸ້ມ (ເມືອງ ເມື່ອງແຕ່ ເກົ່າ). ກອງປະຊຸມໃຫຍ່ຜູ້ແທນຄັ້ງທີ 1 ຄະນະພັກຕາແສງ ທູລຸ້ມ ໄລຍະ 2025 – 2030 ໄດ້ກຳນົດເປົ້າໝາຍຮອດປີ 2030, ກາຍເປັນຕາແສງພັດທະນາປານກາງດີຂອງແຂວງ ລາຍເຈົາ. ເພື່ອຫັນເປົ້າໝາຍນັ້ນໃຫ້ປະກົດຜົນເປັນຈິງ, ທູລຸ້ມ ໄດ້ເອົາໃຈໃສ່ພັດທະນາເສດຖະກິດອີງຕາມທ່າໄດ້ປຽບຂອງເຂດພູສູງ, ສົ່ງເສີມພັດທະນາການບໍລິການ. ທ່ານ ເປີ່ກໍຕື, ເລຂາໜ່ວຍພັກບ້ານ ແມ໊ຢ໊ອງ, ໃຫ້ຮູ້ວ່າ:
“ການພັດທະນາເສດຖະກິດ, ສັງຄົມ… ຢູ່ບໍລິເວນຕາແສງ ເວົ້າລວມ, ບ້ານ ແມ໊ຢ໊ອງ ເວົ້າສະເພາະ, ຕາມມະຕິຊີ້ນຳແມ່ນຈາກຕາແສງ ລົງມາ. ພວກຂ້າພະເຈົ້າຍັງຄົງຜັນຂະຫຍາຍໃຫ້ສະມາຊິກພັກໃນໜ່ວຍພັກ ແລະ ພໍ່ແມ່ປະຊາຊົນ. ຕົ້ນໄມ້ຊະນິດໃດທີ່ເໝາະສົມກັບທ້ອງຖິ່ນຂອງຕົນ, ໜ່ວຍພັກກໍ່ຊີ້ນຳ ແລະ ໂຄສະນາເພື່ອໃຫ້ແກພໍ່ແມ່ປະຊາຊົນເຮັດ”.
ໂດຍໝູນໃຊ້ທ່າໄດ້ປຽບຂອງເນື້ອທີ່ປ່າທຳມະຊາດທີ່ກວ້າງໃຫຍ່, ທູລຸ້ມ ພວມຄ່ອຍໆສ້າງເປັນເຂດປູກຢາສະໝູນໄພດ້ວຍຂອບຂະໜາດໃຫຍ່, ຄື: ກະວານດຳ, ຕົ້ນແຄ່, ຫົວສີໄຄ, ເຂດປູກໂສມ ລາຍເຈົາ… ພວມຄ່ອຍໆໄດ້ຮັບການເປີດກວ້າງ.
ທ່ານ ລິ໊ຈຸຍຫື່, ຮອງປະທານຄະນະກຳມະການປະຊາຊົນຕາແສງ ທູລຸ້ມ, ໃຫ້ຮູ້ວ່າ: ຕົ້ນຢາສະໝູນໄພໄດ້ຮັບຖືວ່າແມ່ນພືດຍຸດທະສາດ ທີ່ມີມູນຄ່າດ້ານເສດຖະກິດສູງ ແລະ ພືດທີ່ເປັນສິນຄ້າ. ມີຫຼາຍຮູບແບບສ້າງລາຍຮັບໄດ້ແຕ່ 60 – 100 ລ້ານດົ່ງ (2.400 – 4.000 USD)/ເຮັກຕາ, ສູງກວ່າຫຼາຍເທົ່າເມື່ອທຽບໃສ່ການເຮັດໄຮ່ແບບດັ້ງເດີມ. ບັນດານະໂຍບາຍໜູນຊ່ວຍກ່ຽວກັບແນວພັນ, ທຶນກູ້ຢືມບຸລິມະສິດ, ການຖ່າຍທອດວິທະຍາສາດ ເຕັກນິກ; ມີຫຼາຍຄອບຄົວຊາວເຜົ່າ ຮ່າຍີ່, ລາຮູ ໄດ້ກ້າປ່ຽນໃໝ່ຈີນຕະນາການຜະລິດ, ບືນຕົວຂຶ້ນຫຼຸດພົ້ນອອກຈາກຄວາມທຸກຍາກ, ສ້າງຄວາມຮັ່ງມີຢູ່ດິນແດນແຫ່ງບ້ານເກີດເມືອງນອນເທື່ອລະກ້າວ.
“ຕາແສງໄດ້ສົ່ງເສີມປະຊາຊົນເຂົ້າຮ່ວມໜ່ວຍຮ່ວມມື, ສະຫະກອນປູກຕົ້ນຢາສະໝູນໄພ, ດຶງດູດການລົງທຶນ, ລົງນາມສັນຍາຈຳໜ່າຍຜະລິດຕະພັນ. ຄະນະກຳມະການປະຊາຊົນຕາແສງ ກໍ່ກຳນົດວ່າ ການພັດທະນາເສດຖະກິດປູກຕົ້ນຢາສະໝູນໄພຢູ່ໃຕ້ຮົ່ມໄມ້ປ່າແມ່ນການກຳນົດທິດໄລຍະຍາວ, ສອດຄ່ອງກັບເງື່ອນໄຂຕົວຈິງຂອງທ້ອງຖິ່ນ. ເລື່ອງຜັນຂະຫຍາຍການກຳນົດທິດນີ້ຢ່າງມີປະສິດທິຜົນຈະປະກອບສ່ວນຂຸດຄົ້ນຊັບພະຍາກອນປ່າໃຫ້ເໝາະສົມ, ຍົກສູງລາຍຮັບໃຫ້ແກ່ປະຊາຊົນ, ປົກປັກຮັກສາສະພາບແວດລ້ອມຊີວະພາບ ແລະ ຊຸກຍູ້ເສດຖະກິດ - ສັງຄົມຂອງທ້ອງຖິ່ນໃຫ້ພັດທະນາຕາມທິດຍືນຍົງ”.
ຈາກຕາແສງທຸກຍາກຢູ່ເຂດຊາຍແດນ, ປະຈຸບັນ ທູລຸ້ມ ໄດ້ມີໂສມໜ້າໃໝ່, ແມ່ນບ່ອນອີງທີ່ໝັ້ນຄົງເຂັ້ມແຂງໃຫ້ເຂດຊາຍແດນ, ເພື່ອໃຫ້ເຂດຊາຍແດນຂອງປະເທດຊາດນັບມື້ນັບມີຄວາມອີ່ມໜຳສຳລານ, ສົມບູນພູນສຸກ.
