ໂຄງການເສັ້ນທາງລົດໄຟຄວາມໄວສູງ ຮ່າໂນ້ຍ - ກວ໋າງນິງ ໂດຍບໍລິສັດຫຸ້ນສ່ວນລົງທຶນ ແລະ ພັດທະນາເສັ້ນທາງລົດໄຟຄວາມໄວສູງ VinSpeed (ກຸ່ມບໍລິສັດ Vingroup) ເປັນເຈົ້າຂອງລົງທຶນດ້ວຍຍອດເງິນລົງທຶນກ່ວາ 147.000 ຕື້ດົ່ງ (ກວ່າ 5,6 ຕື້ USD). ໂຄງການມີຄວາມຍາວປະມານ 120 ກີໂລແມັດ, ເຊື່ອມຕໍ່ບັນດາສູນກາງພັດທະນາເສດຖະກິດໃຫຍ່ຄື: ຮ່າໂນ້ຍ, ບັກນິງ, ຫ໋າຍຝ່ອງ ແລະ ກວ໋າງນິງ. ໂຄງການນຳໃຊ້ລົດໄຟຄວາມໄວສູງລຸ້ນໃໝ່ຫຼ້າສຸດ, ທັນສະໄໝທີ່ສຸດພ້ອມກັບລະບົບຂໍ້ມູນ, ສັນຍານ, ວັດຖຸອຸປະກອນແຖວໜ້າໂລກ ໂດຍ ບໍລິສັດ Siemens Mobility (ເຢຍລະມັນ)ສະໜອງ ແລະ ຈະຄ່ອຍໆຖ່າຍທອດເຕັກໂນໂລຢີໃຫ້ແກ່ VinSpeed ໃນວິວັດການເຄື່ອນໄຫວເປັນເທື່ອລະກ້າວ. ທ່ານ ຫງວຽນຫວຽດກວາງ, ຮອງປະທານທັງເປັນຜູ້ອຳນວຍການໃຫຍ່ກຸ່ມບໍລິສັດ Vingroup ແບ່ງປັນວ່າ:
ດ້ວຍຄວາມໄວສູງທີສຸດ, ໂຄງການຈະເປີດແກນເຊື່ອມຕໍ່ຢ່າງມີປະສິດທິຜົນລະຫວ່າງນະຄອນຫຼວງ ກັບບັນດາສູນອຸດສາຫະກຳ, logistics ແລະ ການທ່ອງທ່ຽວ ຢູ່ເຂດເສດຖະກິດຈຸດສຸມທາງທິດເໜືອ, ປະກອບສ່ວນຊຸກຍູ້ການແລກປ່ຽນຄ້າຂາຍ, ການລົງທຶນ ແລະ ເຄື່ອນຍ້າຍແຮງງານທີ່ມີຄຸນນະພາບສູງ. ພ້ອມທັງສ້າງເງື່ອນໄຂເພື່ອໃຫ້ບັນດາທ້ອງຖິ່ນພັດທະນາຕາມທິດເຊື່ອມຕໍ່ເຂດໃຫ້ແໜ້ນແຟ້ນກວ່າ.
ດ້ວຍຄວາມໄວອອກແບບສູງສຸດແມ່ນ 350 ກີໂລແມັດ/ຊົ່ວໂມງ, ເສັ້ນທາງລົດໄຟຄວາມໄວສູງ ຮ່າໂນ້ຍ - ກວ໋າງນິງ ຈະຊ່ວຍຫຼຸດເວລາເດີນທາງໄປກັບລະຫວ່າງ ຮ່າໂນ້ຍ ກວ໋າງນິງ ລົງ 5 – 7 ເທົ່າ. ບ່ອນເລີ່ມຕົ້ນຂອງໂຄງການແມ່ນຢູ່ສະຖານນີລົດໄຟ ໂກລວາ (ຮ່າໂນ້ຍ) ບ່ອນສຸດທ້າຍແມ່ນຢູ່ສະຖານີລົດໄຟ ຮະລອງ (ກວ໋າງນິງ). ເສັ້ນທາງລົດໄຟຄວາມໄວສູງ ຮ່າໂນ້ຍ - ກວ໋າງນິງ ຈະໄປຜ່ານສາມສະຖານນີຄ່ຽນຖ່າຍແມ່ນ ຢາບິ່ງ (ບັກນິງ), ນິງສາ (ຫ໋າຍຝ່ອງ), ອຽນຕື (ກວ໋າງນິງ). ໂດຍແມ່ນເສັ້ນທາງລົດໄຟຄວາມໄວສູງເຊື່ອມຕໍ່ລະຫວ່າງເຂດ ສາຍທຳອິດທີ່ໄດ້ຜັນຂະຫຍາຍຢູ່ ຫວຽດນາມ, ເສັ້ນທາງລົດໄຟ ຮ່າໂນ້ຍ - ກວ໋າງນິງ ບໍ່ພຽງແຕ່ສ້າງກຳລັງໜູນຢ່າງແຮງໃຫ້ແກ່ເຂດເສດຖະກິດຈຸດສຸມທາງພາກເໜືອເທົ່ານັ້ນ ຫາກຍັງປະກອບສ່ວນຫັນຄວາມຕັດສິນໃຈຍົກສູງຄວາມສາມາດແກ້ງແຍ້ງແຫ່ງຊາດໃຫ້ປະກົດຜົນເປັນຈິງອີກດ້ວຍ. ທ່ານ ບຸຍວັນຄັ້ງ, ປະທານຄະນະກຳມະການປະຊາຊົນແຂວງ ກວ໋າງນິງ ໃຫ້ຮູ້ວ່າ:
ເມື່ອໂຄງການເສັ້ນທາງລົດໄຟຄວາມໄວສູງ 350 ກີໂລແມັດ/ຊົ່ວໂມງ ກໍ່ສ້າງສຳເລັດ, ເວລາເດີນທາງຈະຫຼຸດລົງເຫຼືອພຽງ 25 ນາທີ ຖ້າບໍ່ຢຸດຢູ່ສະຖານີລົດໄຟຕ່າງໆ. ນີ້ແມ່ນທ່າໄດ້ປຽບໃນການແກ່ງແຍ່ງທີ່ເຫັນໄດ້ຊັດ, ແມ່ນບັນດາປັດໄຈໃໝ່ເພື່ອສ້າງໂອກາດໃຫ້ແກ່ການພັດທະນາ.
ການເດີນທາງຢ່າງວ່ອງໄວ ແລະ ສະດວກລະຫວ່າງບັນດານະຄອນ ຈະສ້າງເປັນພື້ນທີ່ເສດຖະກິດເຊື່ອມຕໍ່ຢ່າງແໜ້ນແຟ້ນ, ຊ່ວຍໃຫ້ບັນດາວິສາຫະກິດ, ແຮງງານທີ່ມີຄຸນນະພາບສູງ ແລະ ກະແສເງິນລົງທຶນພັດທະນາຢ່າງແຮງ. ໜຶ່ງໃນບັນດາເປົ້າໝາຍສຳຄັນຂອງໂຄງການ ແມ່ນຊ່ວຍໃຫ້ ກວ໋າງນິງ, ແຂວງທີ່ພວມບົນເສັ້ນທາງກາຍເປັນນະຄອນຂຶ້ນກັບສູນກາງ, ກາຍເປັນຕາໂສ້ສຳຄັນໃນເຄືອຂ່າຍເສດຖະກິດທາງທິດເໜືອ. ພິເສດ, ດ້ວຍການພັດທະນາຂອງຂະແໜງການທ່ອງທ່ຽວ, ການເຊື່ອມຕໍ່ທີ່ສະດວກກັບ ຮ່າໂນ້ຍ ແລະ ບັນດາທ້ອງຖິ່ນອື່ນຈະຊ່ວຍໃຫ້ ກວ໋າງນິງ ຂຸດຄົ້ນຄວາມສາມາດບົ່ມຊ້ອນດ້ານການທ່ອງທ່ຽວຂອງອ່າວ ຮະລອງ, ອຽນຕື ແລະ ບັນດາເຂດຜັກຜ່ອນບຳລຸງສຸຂະພາບລະດັບສູງຢ່າງມີປະສິດທິຜົນກວ່າອີກ. ທ່ານ ບຸຍວັນຄັ້ງ, ປະທານຄະນະກຳມະການປະຊາຊົນແຂວງ ກວ໋າງນິງ ໃຫ້ຮູ້ວ່າ ສຳລັບ ກວ໋າງນິງ, ໂຄງການແມ່ນກຳລັງໜູນຍຸດທະສາດເພື່ອເປີດກວ້າງພື້ນທີ່ພັດທະນາໃໝ່ ແລະ ຍົກສູງຖານະບົດບາດໃນການເຊື່ອມຕໍ່ເຂດ. ການເຊື່ອມຕໍ່ໂຍກົງກັບນະຄອນຫຼວງ ຮ່າໂນ້ຍດ້ວຍເສັ້ນທາງລົດໄຟຄວາມໄວສູງ ຈະນຳ ກວ໋າງນິງ ກາຍເປັນຂົ້ວເຕີບໂຕທາງທິດຕາເວັນອອກຂອງເຂດ.
ພວກຂ້າພະເຈົ້າໄດ້ລາຍງານຕໍ່ສູນກາງໃຫ້ ກວ໋າງນິງ ຄົ້ນຄ້ວາເພື່ອລົງທຶນກໍ່ສ້າງເສັ້ນທາງລົດໄຟເຊື່ອມຕໍ່ ຫ໋າຍຝ່ອງ - ຮະລອງ - ມ້ອງກາຍ ກັບແຂວງ ຕຸງຊິງ (ຈີນ), ຕາມຮູບການຄົມມະນາຄົມຂົນສົ່ງທັງຜູ້ໂດຍສານ ແລະ ສິນຄ້າ. ຂ້າພະເຈົ້າຖືວ່າ ນີ້ແມ່ນບັນດາປັດໄຈສະດວກທີ່ສຸດກ່ຽວຂ້ອງເຖິງສະພາບແວດລ້ອມແຫ່ງການລົງທຶນດຳເນີນທຸລະກິດໃນໄລຍະຈະມາເຖິງ.
ເສັ້ນທາງລົດໄຟຄວາມໄວສູງ ຮ່າໂນ້ຍ - ກວ໋າງນິງ ບໍ່ພຽງແຕ່ມຸ່ງໄປເຖິງການເຊື່ອມຕໍ່ບັນດາທ້ອງຖິ່ນ ຜ່ານລະບົບຄົມມະນາຄົມທີ່ທັນສະໄໝເທົ່ານັ້ນ, ຫາກຍັງສ້າງແລວເສດຖະກິດໃໝ່, ຊຸກຍູ້ການຮ່ວມມື ແລະ ພັດທະນາລວມຂອງເຂດທິດເໜືອ. ຢູ່ໃນວິໄສທັດໄລຍະຍາວ, ໂຄງການເປີດອອກກາລະໂອກາດສ້າງເປັນຂະແໜງອຸດສາຫະກຳເສັ້ນທາງລົດໄຟທີ່ທັນສະໄໝຢູ່ ຫວຽດນາມ ດ້ວຍຄົບພາກສ່ວນປະກອບນັບແຕ່ການຜະລິດ, ເຕັກໂນໂລຢີ ຕະຫຼອດຮອດການເຄື່ອນໄຫວ ແລະ ບຳລຸງກໍ່ສ້າງຊັບພະຍາກອນມະນຸດ. ນີ້ແມ່ນຂົງເຂດທີ່ມີມູນຄ່າເພີ່ມສູງ, ມີຄວາມສາມາດແຜ່ລາມອອກຢ່າງແຮງ ແລະ ສວມບົດບາດສຳຄັນໃນວິວັດການຫັນເປັນປະເທດອຸດສາຫະກຳ.
