ຫວຽດນາມ ໄດ້ສ້າງເຄືອຂ່າຍບັນດາສັນຍາການຄ້າເສລີເປີດກວ້າງ, ເປີດຫຼາຍກາລະໂອກາດກ່ຽວກັບຕະຫຼາດ, ການລົງທຶນ ແລະ ການສົ່ງອອກ. ເຖິງຢ່າງໃດກໍຕາມ, ບັນດາບຸລິມະສິດຈາກສັນຍາການຄ້າເສລີ (FTA) ຕ່າງໆ ຈະບໍ່ສາມາດເຕີບໂຕດ້ວຍຕົນເອງໄດ້ ຖ້າຂາດຄວາມສາມາດຈັດຕັ້ງປະຕິບັດຢູ່ທ້ອງຖິ່ນ ແລະ ຄວາມເປັນເຈົ້າການຂອງວິສາຫະກິດ. ໃນສະພາບການບັນດາມາດຖານກ່ຽວກັບຕົ້ນກຳເນີດ, ສິ່ງແວດລ້ອມ, ແຮງງານ ແລະ ການພັດທະນາແບບຍືນຍົງນັບມື້ນັບເຄັ່ງຂັດ ແລະ ການປະຕິບັດບັນດາຄຳໝັ້ນສັນຍາ FTA ຢ່າງມີປະສິດທິຜົນ ພວມກາຍເປັນຄວາມຮຽກຮ້ອງຕ້ອງການທີ່ສຳຄັນເພື່ອຍົກສູງຄວາມສາມາດໃນການແກ້ງແຍ້ງ.
ປັດຈຸບັນຫວຽດນາມ ມີ FTA 17 ສະບັບພວມປະຕິບັດ, ເປີດກວ້າງພື້ນທີ່ຕະຫຼາດໃຫ້ແກ່ສິນຄ້າ ແລະ ວິສາຫະກິດພາຍໃນປະເທດ. ເຖິງຢ່າງໃດກໍຕາມ, ເພື່ອໃຫ້ບັນດາຄຳໝັ້ນສັນຍານີ້ເສີມຂະຫຍາຍປະສິດທິຜົນໄດ້, ແມ່ນຕ້ອງມີການປະສານສົມທົບກັນນັບແຕ່ຂັ້ນສູນກາງລົງຮອດທ້ອງຖິ່ນ ໃນການນຳບັນດາຂໍ້ກຳນົດກ່ຽວກັບພາສີອາກອນ, ຕົ້ນກຳເນີດ, ມາດຕະຖານດ້ານເຕັກນິກ ແລະ ບັນດາຄວາມຮຽກຮ້ອງຕ້ອງການຂອງຕະຫຼາດເຂົ້າພຶດຕິກຳຕົວຈິງ, ພ້ອມທັງສ້າງເງື່ອນໄຂເພື່ອໃຫ້ວິສາຫະກິດໝູນໃຊ້ບຸລິມະສິດຢ່າງມີປະສິດທິຜົນ.
ຫ໋າຍຝ່ອງ ແມ່ນຕົວຢ່າງໜຶ່ງ. ປີ 2026, ເຖິງວ່າຫາກໍ່ປັບປຸງກົງຈັກການຈັດຕັ້ງ,ການບໍລິຫານອຳນາດການປົກຄອງທ້ອງຖິ່ນສອງຂັ້ນ ແລະ ຕ້ອງຮັບມືກັບບັນດາການຜັນແປຂອງການຄ້າສາກົນ, ແຕ່ນະຄອນຍັງບັນລຸລະດັບເຕີບໂຕ GRP 11,81%. ຍອດວົງເງິນການສົ່ງອອກບັນລຸ 91,72 ຕື້ USD, ໃນນັ້ນ ການສົ່ງອອກບັນລຸ 50,14 ຕື້ USD. ຕາມໝາກຜົນຂອງ FTA Index 2025, ຫ໋າຍຝ່ອງ ນຳໜ້າທົ່ວປະເທດກ່ຽວກັບການປະຕິບັດ FTA. ທ່ານ ຮວ່າງມິງເກື່ອງ, ຮອງປະທານຄະນະກຳມະການປະຊາຊົນ ນະຄອນ ຫ໋າຍຝ່ອງ ໃຫ້ຮູ້ວ່າ:
ຕ້ອງຖືວິສາຫະກິດເປັນໃຈກາງ ແລະ ຖືປະສົບການຕົວຈິງຂອງວິສາຫະກິດແມ່ນໄມ້ຫຼາວັດແທກ. ຫ໋າຍຝ່ອງ ຄ່ອຍໆຫັນປ່ຽນຈາກການໂຄສະນາລວມໄປສູ່ການສະໜອງຂໍ້ມູນຕາມຂະແໜງສິນຄ້າ, ຕາມຕະຫຼາດ, ເພີ່ມທະວີການໂອ້ລົມສົນທະນາ, ແກ້ໄຂຂໍ້ສະເໜີກ່ຽວກັບການສົ່ງອອກ-ນຳເຂົ້າຢ່າງທັນການ, C/O ແລະ logistics. ນະໂຍບາຍຈະມີຄຸນຄ່າກໍ່ຕໍ່ເມື່ອວິສາຫະກິດເຂົ້າເຖິງໄດ້, ເຂົ້າໃຈໄດ້ ແລະ ຫັນເປັນໃບສັ່ງຊື້ສິນຄ້າ, ຕະຫຼາດ ແລະ ວຽກເຮັດງານທຳໄດ້.
ບໍ່ພຽງແຕ່ເປີດກວ້າງຕະຫຼາດ, ຫ໋າຍຝ່ອງ ຍັງເອົາໃຈໃສ່ເປັນພິເສດເຖິງການຍົກສູງຄວາມສາມາດໃນການຜະລິດ ແລະ ຕອບສະໜອງບັນດາມາດຕະຖານໃໝ່. ທ່ານ ຮວ່າງມິງເກື່ອງ ໃຫ້ຮູ້ວ່າ:
ຫ໋າຍຝ່ອງ ໄດ້ປະສານສົມທົບກັນເປີດກວ້າງຕະຫຼາດດ້ວຍການຍົກສູງຄວາມສາມາດພາຍໃນ ແລະ ພັດທະນາແບບຍືນຍົງ. ນະຄອນໃຫ້ບຸລິມະສິດແກ່ເຕັກໂນໂລຢີສູງ, ເຕັກໂນໂລຢີສະອາດ, ການຜະລິດສີຂຽວ, ນຳໃຊ້ພະລັງງານຢ່າງມີປະສິດທິຜົນ, ໜູນຊ່ວຍວິສາຫະກິດຕອບສະໜອງກົດເກັນແຫຼ່ງກຳເນີດສິນຄ້າ, ມາດຕະຖານສິ່ງແວດລ້ອມ, ແຮງງານ ແລະ ການຊອກຫາແຫຼ່ງທີ່ມາຂອງຜະລິດຕະພັນ. ບຸລິມະສິດດ້ານພາສີອາກອນ ແມ່ນໂອກາດ, ແຕ່ຄຸນນະພາບຜະລິດຕະພັນ,ຄວາມສາມາດດ້ານດີຈີຕອນ ແລະ ການຄຸ້ມຄອງບໍລິຫານລະບົບຕ່ອງໂສ້ການສະໜອງ ຈຶ່ງເປັນປັດໃຈຕັດສິນຄວາມສາມາດເດີນໄປໄກຂອງວິສາຫະກິດ.
ຢູ່ ແທັງຮວ໋າ, ບັນດາຄຳໝັ້ນສັນຍາ FTA ກໍ່ໄດ້ນຳເຂົ້ານະໂຍບາຍໜູນຊ່ວຍວິສາຫະກິດ, ສຸມໃສ່ເປີດກວ້າງຕະຫຼາດ, ພັດທະນາ logistics, ຍົກສູງເຕັກໂນໂລຢີ ແລະ ຫັນແຫຼ່ງກຳເນີດສິນຄ້າເປັນໂປ່ງໃສ. ຕາມ FTA Index 2025 ແລ້ວ, ແທັງຮວ໋າ ຢືນອັນດັບ 3 ໃນທົ່ວປະເທດ. ທ່ານ ຢວານຈ້ອງແທັງ, ຮອງຫົວໜ້າຫ້ອງການຄຸ້ມຄອງການນຳເຂົ້າ-ສົ່ງອອກ, ພະແນກອຸດສາຫະກຳການຄ້າແຂວງ ແທັງຮວ໋າ ໃຫ້ຮູ້ວ່າ:
ບົນພື້ນຖານບັນດາສັນຍາທີ່ໄດ້ລົງນາມ, ທາງແຂວງໄດ້ປະກາດໃຊ້ແຜນການເພື່ອຜັນຂະຫຍາຍການປະຕິບັດໃນທັນທີ, ເພື່ອໃຫ້ບັນດາອົງການຈັດຕັ້ງ, ບັນດາວິສາຫະກິດໃນບໍລິເວນແຂວງ ກຳແໜ້ນ ແລະ ໝູນໃຊ້ບັນດາທ່າໄດ້ປຽບໄດ້. ທີສອງແມ່ນປະກາດໃຊ້ບັນດາແຜນນະໂຍບາຍເພື່ອຊຸກຍູ້ການເຊື່ອມໂຍງຄື ນະໂຍບາຍໜູນຊ່ວຍບັນດາວິສາຫະກິດເມື່ອມີຕະຫຼາດໃໝ່, ສົ່ງອອກສິນຄ້າປະເພດໃໝ່ ແລະ ນະໂຍບາຍກ່ຽວກັບການພັດທະນາວິສາຫະກິດ, ກໍ່ຄືບັນດານະໂຍບາຍໜູນຊ່ວຍບັນດາບໍລິສັດກຳປັ່ນສາກົນ ເພື່ອມອບຮັບສິນຄ້າຢູ່ທ່າກຳປັ່ນ ງີເຊີນ ກໍ່ຄືໜູນຊ່ວຍບັນດາວິສາຫະກິດທີ່ມີສິນຄ້າສົ່ງອອກຜ່ານທ່າກຳປັ່ນ ງີເຊີນ.
ຕົວຈິງຈາກບັນດາທ້ອງຖິ່ນສະແດງໃຫ້ເຫັນວ່າ ການປະຕິບັດ FTA ພວມກາຍເປັນເນື້ອໃນໜຶ່ງຂອງການຄຸ້ມຄອງ ແລະ ບໍລິຫານການພັດທະນາເສດຖະກິດ. ທ່ານ ຟ້າມຢາຕຸກ ຮອງນາຍົກລັດຖະມົນຕີ ຜູ້ປະຈຳການລັດຖະບານ ຫວຽດນາມ ເນັ້ນໜັກວ່າ:
ຕ້ອງຖືການປະຕິບັດ FTA ແມ່ນພາກສ່ວນໜຶ່ງທີ່ຂາດບໍ່ໄດ້ຂອງຍຸດທະສາດພັດທະນາເສດຖະກິດສັງຄົມ, ແມ່ນຕົວເລກຄາດໝາຍທີ່ສຳຄັນເພື່ອຕີລາຄາຄວາມສາມາດບໍລິຫານ ແລະ ເຊື່ອມໂຍງຂອງບັນດາທ້ອງຖິ່ນ, ຫາກບໍ່ພຽງແຕ່ແມ່ນໜ້າທີ່ສະເພາະຂອງຂະແໜງອຸດສາຫະກຳການຄ້າ ຫຼືຂະແໜງການຕ່າງປະເທດເທົ່ານັ້ນ. ແຕ່ລະທ້ອງຖິ່ນຕ້ອງນຳການປະຕິບັດ FTA ແລະ ໂຄງການບໍລິຫານການພັດທະນາເສດຖະກິດ-ສັງຄົມຕິດພັນກັບໜ້າທີ່ຮັບຜິດຊອບຂອງຜູ້ນຳໜ້າ.
ເພາະສະນັ້ນ, ການປະຕິບັດ FTA ບໍ່ພຽງແຕ່ຢຸດຢູ່ການເຜີຍແຜ່ຄຳໝັ້ນສັນຍາເທົ່ານັ້ນ ຫາກຍັງຕ້ອງຫັນເປັນການກະທຳລະອຽດຢູ່ແຕ່ລະທ້ອງຖິ່ນ. ເມື່ອອຳນາດການປົກຄອງຮ່ວມເດີນທາງແລະໃກ້ຊິດຕິດແທດກັບວິສາຫະກິດ, ສ່ວນວິສາຫະກິດຕ້ອງເປັນເຈົ້າການຍົກສູງຄຸນນະພາບ, ເຕັກໂນໂລຢີ ແລະ ຄວາມສາມາດຕອບສະໜອງມາດຕະຖານ, ບັນດາຄຳໝັ້ນສັນຍາການຄ້າຈຶ່ງຈະສາມາດກາຍເປັນຕະຫຼາດ, ມີໃບສັ່ງຊື້ສິນຄ້າ ແລະ ມີຄວາມສາມາດແກ້ງແຍ້ງຍືນຍົງໄດ້.
