ນະຄອນໂຮ່ຈີມິນ ພວມມານະພະຍາຍາມຫັນເປົ້າໝາຍການເຕີບໂຕເສດຖະກິດບັນລຸລະດັບກວ່າ 10% ໃນປີ 2026 ໃຫ້ປະກົດຜົນເປັນຈິງ. ໃນສະພາບທີ່ໝາກຜົນຂອງ 9 ເດືອນຕົ້ນປີນີ້ມີຫຼາຍສັນຍານທີ່ຕັ້ງໜ້າ ແຕ່ຄວາມກົດດັນຕໍ່ການເຕີບໂຕໃນໄຕມາດທີ IV ຍັງໃຫຍ່ຫຼວງທີ່ສຸດ, ທາງນະຄອນໄດ້ສຸມໃສ່ເສີມຂະຫຍາຍແຮງຂັບເຄື່ອນແບບເກົ່າ, ປົດລັອກຊັບພະຍາກອນການລົງທຶນ, ແກ້ໄຂຂໍ້ຕິດຂັດກ່ຽວກັບທີ່ດິນ, ສິນເຊື່ອ ແລະ ຊຸກຍູ້ການບໍລິໂພກ. ປະສິດທິຜົນຂອງການຜັນຂະຫຍາຍບັນດາມາດຕະການນີ້ຈະມີຄວາມໝາຍຕັດສິນຕໍ່ການປະຕິບັດສຳເລັດເປົ້າໝາຍເຕີບໂຕທັງປີ, ພ້ອມທັງປັບປຸງບົດບາດນຳໜ້າເສດຖະກິດຂອງນະຄອນ.
ຕາມຕົວເລກທີ່ໄດ້ປະກາດ, 9 ເດືອນຕົ້ນປີ 2026, GRDP ຂອງນະຄອນເພີ່ມຂຶ້ນ 9,06% ເມື່ອທຽບໃສ່ໄລຍະດຽວກັນຂອງປີກາຍ; ສະເພາະໄຕມາດ III ເພີ່ມຂຶ້ນ 9,86%, ລະດັບເພີ່ມຂຶ້ນສູງສຸດໃນໄລຍະ 10 ປີມານີ້. ອັດຕາການປ່ອຍເງິນລົງທຶນສາທາລະນະ ບັນລຸກວ່າ 75%, ໃນຂະນະທີ່ເງິນລົງທຶນໂດຍກົງຈາກຕ່າງປະເທດ (FDI) ບັນລຸ 17,8 ຕື້ USD, ລື່ນກາຍ 62% ແຜນການທັງປີ. ບັນດາໝາກຜົນນີ້ສະແດງໃຫ້ເຫັນການເຄື່ອນໄຫວເສດຖະກິດພວມຮັກສາທ່າເຕີບໂຕ, ສ້າງພື້ນຖານເພື່ອໃຫ້ນະຄອນກ້າວເຂົ້າສູ່ໄລຍະສຸດທ້າຍຂອງປີ.
ເຖິງຢ່າງໃດກໍຕາມ, ເພື່ອບັນລຸໄດ້ເປົ້າໝາຍການເຕີບໂຕສອງຕົວເລກ, ເສດຖະກິດນະຄອນໃນໄຕມາດທີ IV ຕ້ອງເພີ່ມຢ່າງໜ້ອຍສຸດ 13,23%. ນີ້ແມ່ນສິ່ງທ້າທາຍໃຫຍ່, ເຖິງວ່າໄລຍະທ້າຍປີມີທ່າໄດ້ປຽບຈາກການເຄື່ອນໄຫວຜະລິດ, ການບໍລິໂພກ, ການທ່ອງທ່ຽວ ແລະ ການກະກຽມສິນຄ້າຮັບໃຊ້ງານບຸນ, ບຸນເຕັດ(ບຸນປີໃໝ່). ທ່ານ ຫງວຽນຄັກຮວ່າງ, ຫົວໜ້າພະແນກສະຖິຕິນະຄອນ ໂຮ່ຈີມິນ ໃຫ້ຂໍ້ສັງເກດວ່າ:
ຕາມປົກກະຕິແລ້ວ, ລະດັບການເຕີບໂຕຂອງໄຕມາດທີ IV ແມ່ນສູງກວ່າໄຕມາດທີ III ປະມານ 1,5%. ສິ່ງນີ້ສ່ອງແສງໃຫ້ເຫັນລັກສະນະລະດູການຂອງການເຄື່ອນໄຫວເສດຖະກິດ ເມື່ອໄຕມາດທີ IV ແມ່ນໄລຍະເລັ່ງລັດການຜະລິດ, ບໍລິໂພກ, ການທ່ອງທ່ຽວ ແລະ ກະກຽມສິນຄ້າຮັບໃຊ້ບຸນເຕັດ(ບຸນປີໃໝ່ປະຈຳຊາດ). ນີ້ແມ່ນຂໍ້ສະດວກ ເພື່ອໃຫ້ທາງນະຄອນຂຸດຄົ້ນ, ຊຸກຍູ້ການເຕີບໂຕໃນຊຸມເດືອນທ້າຍປີ.
ເພື່ອນຳໃຊ້ທ່າແຮງບົ່ມຊ້ອນນີ້, ທາງນະຄອນໄດ້ກຳນົດຍູ້ໄວການປ່ອຍເງິນລົງທຶນສາທາລະນະ ແລະ ແກ້ໄຂຂໍ້ຕິດຂັດໃຫ້ແກ່ບັນດາໂຄງການແມ່ນໜຶ່ງໃນບັນດາໜ້າທີ່ຈຸດສຸມ. ດ້ວຍແຜນເງິນລົງທຶນສາທາລະນະໃນປີ 2026 ເກືອບ 147.600 ຕື້ດົ່ງ (ເກືອບ 5,7 ຕື້ USD), ຄຳຮຽກຮ້ອງຕ້ອງການທີ່ວາງອອກ ບໍ່ພຽງແຕ່ແມ່ນການປ່ອຍເງິນລົງທຶນຢ່າງໄວເທົ່ານັ້ນ ຫາກຍັງຕ້ອງນຳແຫຼ່ງທຶນນັ້ນເຂົ້າໃນບັນດາກິດຈະກຳ, ໂຄງການທີ່ມີຄວາມສາມາດສ້າງປະສິດທິຜົນດ້ານເສດຖະກິດຢ່າງແທ້ຈິງ. ທ່ານ ເຈິ່ນກວາງເລິມ, ຫົວໜ້າພະແນກກໍ່ສ້າງນະຄອນ ໂຮ່ຈີມິນ ໃຫ້ຮູ້ວ່າ:
ນັບແຕ່ວັນທີ 1 ຕຸລາ, ພວກເຮົາມີກົດໝາຍວ່າດ້ວຍການພັດທະນາຕົວເມືອງ ແລະ ບັນດາສິ່ງທີ່ຍັງຄົງຄ້າງຈະນຳໃຊ້ກົດໝາຍນີ້ເພື່ອແກ້ໄຂ. ບັນດາມາດຕະການນີ້, ໃນວິວັດແຫ່ງການປະຕິບັດຕາມຈິດໃຈຂອງບັນດາການນຳນະຄອນ, ແມ່ນການລົງທຶນສາທາລະນະແຕ່ຕ້ອງຄຸ້ມຄອງບໍລິຫານແບບເອກະຊົນ. ແລະ ພວກເຮົາຈະຕັດສິນໃຈປະຕິບັດວຽກງານນີ້.
ພ້ອມກັບການແກ້ໄຂຂໍ້ຕິດຂັດກ່ຽວກັບກົນໄກ, ທາງນະຄອນຍັງວາງເປົ້າໝາຍແກ້ໄຂບັນດາໂຄງການທີ່ຍັງຄົງຄ້າງ, ຫັນປ່ຽນແຫຼ່ງກຳລັງທີ່ຍັງຄົງຄ້າງໃຫ້ກາຍເປັນກຳລັງຄວາມສາມາດໃນການຜະລິດ, ດຳເນີນທຸລະກິດເທື່ອລະກ້າວ. ຢູ່ກອງປະຊຸມສະຫຼຸບວຽກງານ 9 ເດືອນຕິດພັນກັບການຊຸກຍູ້ການເຕີບໂຕເສດຖະກິດໃຫ້ບັນລຸສອງຕົວເລກ, ທ່ານ ຫງວຽນວັນເດືອກ ປະທານຄະນະກຳມະການປະຊາຊົນນະຄອນ ໂຮ່ຈີມິນ ເນັ້ນຫນັກຄຳຮຽກຮ້ອງຕ້ອງມີການຫັນປ່ຽນຢ່າງແທ້ຈິງ, ນຳໂຄງການເຂົ້າໃນການຂຸດຄົ້ນ ແລະ ມີຜະລິດຕະພັນອອກສູ່ຕະຫຼາດ.
ນັບແຕ່ນີ້ຮອດທ້າຍປີ, ວຽກງານທີ່ວາງອອກແມ່ນຕ້ອງແກ້ໄຂ 100% ໂຄງການ, ໝາຍຄວາມວ່າມີໂຄງການ ປະຕິບັດສຳເລັດ ແລະ ມີໂຄງການທີ່ໄດ້ກຳນົດທິດທາງແກ້ໄຂ, ໃນນັ້ນກວ່າ 50% ຕ້ອງກ້າວເຂົ້າສູ່ການເຄື່ອນໄຫວຢ່າງແທ້ຈິງ. ໝາຍຄວາມວ່າ ໂຄງການເຄື່ອນໄຫວ ແລະ ຂຸດຄົ້ນໄດ້, ນຳທີ່ດິນເຂົ້າໃຊ້ ແລະ ນຳຜະລິດຕະພັນອອກສູ່ຕະຫຼາດ.
ຖ້າການລົງທຶນສາທາລະນະສ້າງກຳລັງໜູນໃຫ້ການພັດທະນາພື້ນຖານໂຄງລ່າງ ແລະ ປົດລັອກຊັບພະຍາກອນແລ້ວ, ການບໍລິໂພກພາຍໃນ ແລະ ການສົ່ງອອກຈະສວມບົດບາດຊຸກຍູ້ການຜະລິດ, ເປີດກ້ວາງຕະຫຼາດ. ໃນໄຕມາດທີ IV, ນະຄອນໂຮ່ຈີມິນ ສືບຕໍ່ຍູ້ແຮງບັນດາໂຄງການກະຕຸ້ນຄວາມຕ້ອງການ, ສູ້ຊົນເພື່ອໃຫ້ລາຍຮັບຈາກການຄ້າຂາຍເພີ່ມຂຶ້ນ 17%, ພ້ອມທັງໜູນຊ່ວຍວິສາຫະກິດແກ້ໄຂຄວາມຫຍຸ້ງຍາກ, ຍູ້ແຮງຄວາມຄືບໜ້າຂອງບັນດາໂຄງການເພື່ອນຳເຂົ້າເຄື່ອນໄຫວໂດຍໄວ. ຍັງມີສັນຍານຕັ້ງໜ້າໜຶ່ງອີກນັ້ນແມ່ນ ປະລິມານໄຟຟ້າຮັບໃຊ້ການຜະລິດໃນ 9 ເດືອນເພີ່ມຂຶ້ນ 7,9%, ລະດັບສູງສຸດໃນ 5 ປີຜ່ານມາ, ສິ່ງດັ່ງກ່າວສະແດງໃຫ້ເຫັນວ່າການເຄື່ອນໄຫວຜະລິດມີສັນຍານດີຂຶ້ນ. ທ່ານ ຫງວຽນວັນເດືອກ ປະທານຄະນະກຳມະການປະຊາຊົນ ນະຄອນໂຮ່ຈີມິນ ເນັ້ນໜັກວ່າ:
ຈາກກຳລັງກົດດັນຂອງໄຕມາດ IV, ທາງນະຄອນຕ້ອງບັນລຸລະດັບການເຕີບໂຕສູງທີສຸດແມ່ນ 13,23% ຈຶ່ງສາມາດບັນລຸໄດ້ລະດັບການເຕີບໂຕຄືແຜນການໄດ້ວາງອອກ. ເພື່ອສຳເລັດໜ້າທີ່ນີ້, ເສັ້ນທາງຢູ່ຂ້າງໜ້າຍັງທຸລະກັນດານຫຼາຍ, ແຕ່ດ້ວຍມູນເຊື້ອຂອງນະຄອນ ເຖິງວ່າຈະຫຍຸ້ງຍາກແນວໃດ, ກໍ່ຕັດສິນໃຈປະຕິບັດໃຫ້ໄດ້.
ດ້ວຍບົດບາດນຳໜ້າເສດຖະກິດ, ທາງນະຄອນໂຮ່ຈີມິນ ພວມສຸມໃສ່ເສີມຂະຫຍາຍບັນດາແຮງຂັບເຄື່ອນການເຕີບໂຕ, ນັບແຕ່ການລົງທຶນ, ການຊົມໃຊ້ຕະຫຼອດຮອດການຜະລິດ ແລະ ສົ່ງອອກ. ການຜັນຂະຫຍາຍບັນດາມາດຕະການຢ່າງມີປະສິດທິຜົນໃນຊຸມເດືອນທ້າຍປີ ບໍ່ພຽງແຕ່ຕັດສິນຄວາມສາມາດປະຕິບັດສຳເລັດເປົ້າໝາຍປີ 2026 ເທົ່ານັ້ນ ຫາກຍັງປະກອບສ່ວນຍົກສູງຄວາມສາມາດແກ້ງແຍ້ງ, ເປີດກວ້າງພື້ນທີ່ພັດທະນາ ແລະ ສ້າງກຳລັງແຜ່ກະຈາຍໃນທົ່ວເຂດເສດຖະກິດທາງພາກໃຕ້ກໍ່ຄືພື້ນຖານເສດຖະກິດທົ່ວປະເທດ.
