ເພື່ອຍູ້ແຮງການຜັນຂະຫຍາຍບັນດາໂຄງການລົງທຶນສາທາລະນະໃຫ້ແກ່ໂຄງປະກອບພື້ນຖານໂຄງລ່າງໃນທົ່ວປະເທດ, ແຕ່ລະປີ ຫວຽດນາມ ຕ້ອງການແຫຼ່ງທຶນຕື່ມອີກແຕ່ 70 – 80 ຕື້ USD. ປັດຈຸບັນ, ນະຄອນ ໂຮ່ຈີມິນ ພວມຜັນຂະຫຍາຍ 8 ໂຄງການລົງທຶນສາທາລະນະທີ່ມີຂອບຂະໜາດໃຫຍ່ ແລະ ບັນດາວິສາຫະກິດກໍ່ຕ້ອງການທຶນທີ່ສຸດ. ມີຫຼາຍວິສາຫະກິດຢາກລະດົມແຫຼ່ງທຶນຜ່ານສູນການເງິນສາກົນ ຫວຽດນາມ ຢູ່ນະຄອນໂຮ່ຈີມິນ, ຍ້ອນວ່າ ວິສາຫະກິດສ່ວນຫຼາຍພວມລະດົມທຶນຈາກທະນາຄານ.
ຕາມທ່ານ ຫງວຽນງອກຮວ່າ, ປະທານສະມາຄົມວິສາຫະກິດ ນະຄອນໂຮ່ຈີມິນແລ້ວ, VIFC-HCMC ຕ້ອງມີຍຸດທະສາດເພື່ອຊ່ວຍໃຫ້ວິສາຫະກິດລະດົມແຫຼ່ງທຶນຈາກພາຍນອກໃຫ້ໄດ້. ໃນຂະນະນັ້ນ, ວິສາຫະກິດຂະໜາດຍ່ອຍ ແລະ ຂະໜາດນ້ອຍສາມາດເຂົ້າເຖິງແຫຼ່ງທຶນເພື່ອຜະລິດ, ດຳເນີນທຸລະກິດໄດ້ງ່າຍກວ່າ. ເພາະສະນັ້ນ, ຫຼາຍວິສາຫະກິດຢູ່ ນະຄອນໂຮ່ຈີມິນ ພວມມີຄວາມຫວັງວ່າ VIFC-HCMC ຈະກາຍເປັນຊ່ອງທາງລະດົມທຶນທີ່ດີໃຫ້ແກ່ວິສາຫະກິດ.
“ພວກເຮົາຄວນກຳນົດລະອຽດກ່ຽວກັບຂົງເຂດ, ຂະແໜງອາຊີບໃດ ຈະໄດ້ລະດົມທຶນ, ມີຂອບຂະໜາດ,ຄວາມສາມາດຄືແນວໃດ ຈະໄດ້ລະດົມທຶນ, ນີ້ແມ່ນສິດອຳນາດຂອງລັດ. ພວກເຮົາຕ້ອງມີອົງການສະເພາະຂະແໜງ ເຂົ້າຮ່ວມເພື່ອປະສານສົມທົບກັນຢ່າງກົມກຽວລະຫວ່າງ ການຄວບຄຸມຂອງລັດ, ພ້ອມທັງເປີດໂອກາດເພື່ອໃຫ້ວິສາຫະກິດລະດົມທຶນ”.
ຕາມທັດສະນະຂອງນັກລົງທຶນ, ທ່ານ ລຶວຈ້ອງອານຮ່ວາ, ຜູ້ອຳນວຍການໃຫຍ່ Lotus Investment Group, ຜູ້ຕາງໜ້າກຸ່ມນັກລົງທຶນຮ່ວມທຸລະກິດເຂົ້າ VIFC ຖືວ່າ ເພື່ອດຶງດູດບັນດານັກລົງທຶນນຳທຶນເຂົ້າ VIFC-HCMC ນັ້ນ, ນອກຈາກການປັບປຸງພື້ນຖານໂຄງລ່າງ, ກະກຽມລະບົບນິຕິກຳໃຫ້ສົມບູນແບບແລ້ວ, VIFC ຕ້ອງມີກົນໄກຄວບຄຸມຄວາມສ່ຽງຢ່າງໂປ່ງໃສຕາມທຳນຽມສາກົນ. ດ້ວຍບັນດາໂຄງການໃຫຍ່, ນັກລົງທຶນຢາກມີການລົງທຶນຂອງລັດ ດ້ວຍອັດຕາສ່ວນທີ່ເໝາະສົມ. ທ່ານ ລຶວຈ້ອງອານຮ່ວາ ສະເໜີວ່າ:
“ຖ້າຖືພື້ນຖານເສດຖະກິດທີ່ມີວິສາຫະກິດຕ່າງປະເທດ ແລະ ວິສາຫະກິດຂະໜາດກາງ ແລະ ນ້ອຍ ຄືເປັນຕະຫຼາດທຸລະກຳຊື້ຂາຍແລ້ວ ພວກເຮົາຈະສາມາດເຫັນໄດ້ຢ່າງງ່າຍດາຍວ່າ ຫວຽດນາມ ພວກເຮົາຍັງຕ້ອງການ ແລະ ຍັງຂາດສິ່ງໃດ? ຕະຫຼາດທຸລະກຳຕ້ອງການສິນຄ້າຫຼາຍ ແລະ ມີກົນໄກປົກປ້ອງທັງຜູ້ຊື້ ແລະ ຜູ້ຂາຍ. ນັ້ນແມ່ນບັນຫາສຳຄັນເຊິ່ງພວກເຮົາຕ້ອງແກ້ໄຂເພື່ອໃຫ້ VIFC-HCMC ລະດົມທຶນຢ່າງມີປະສິດທິຜົນ”.
ທ່ານ ຮສ.ປອ ຫງວຽນຮຶວຮວນ, ຮອງປະທານອົງການບໍລິຫານ VIFC-HCMC ໃຫ້ຮູ້ວ່າ ຕໍ່ໜ້າຄວາມຕ້ອງການທຶນຫຼາຍຂອງພື້ນຖານເສດຖະກິດ, ສູນໄດ້ສ້າງແຜນຮ່າງພັດທະນາຕະຫຼາດທຶນໃນສູນ, ເພື່ອສ້າງຕັ້ງຕະຫຼາດຫຼັກຊັບ ແລະ ຫຼັງຈາກນັ້ນຈະຍົກລະດັບຂຶ້ນເປັນຕະຫຼາດຫຼັກຊັບສາກົນ. ຕະຫຼາດນີ້ຈະລະດົມທຶນໃຫ້ວິສາຫະກິດພາຍໃນປະເທດ ແລະ ພາກພື້ນ. ສູນໄດ້ລົງນາມບົດບັນທຶກການຮ່ວມມືກັບ Nasdaq (ອາເມລິກາ), ຕະຫຼາດຫຼັກຊັບໃຫຍ່ອັນດັບທີ 2 ຂອງໂລກ ເພື່ອຜັນຂະຫຍາຍການສ້າງຕັ້ງຕະຫຼາດນີ້. ຕາມ VIFC-HCMC ແລ້ວ, ປັດຈຸບັນວຽກງານກະກຽມທັງໝົດໃຫ້ແກ່ການສ້າງຕະຫຼາດຄື: ເຕັກໂນໂລຢີ, ທຶນ ແລະ ຜະລິດຕະພັນສິນຄ້າໄດ້ກຽມພ້ອມແລ້ວ ແລະ ພຽງແຕ່ລໍຖ້າໃຫ້ລັດຖະບານອະນຸມັດຜ່ານແຜນຮ່າງເທົ່ານັ້ນ. ທ່ານ ຫງວຽນຮຶວຮວນ ຮອງປະທານອົງການບໍລິຫານ VIFC-HCMC ໃຫ້ຮູ້ວ່າ:
“ໃນໄລຍະຈະມາເຖິງ, ພວກເຮົາຈະສ້າງຕະຫຼາດ Crowdfunding (ລະດົມທຶນຈາກຊຸມຊົນ) ຕະຫຼາດລະດົມທຶນຈາກຊຸມຊົນ ເພື່ອລະດົມທຶນໃຫ້ແກ່ບັນດາວິສາຫະກິດຂະໜາດກາງ ແລະ ນ້ອຍ, ບໍລິສັດ Start-up. ຕະຫຼາດ Crowdfunding ນ້ອຍກວ່າຕະຫຼາດຫຼັກຊັບສາກົນ ກ່ຽວກັບຂອບຂະໜາດ, ແຕ່ມີຈຳນວນວິສາຫະກິດຂະໜາດກາງ ແລະ ນ້ອຍຫຼາຍກວ່າ. ມະຕິເລກທີ 323 ຂອງລັດຖະບານ ວ່າດ້ວຍນະໂຍບາຍການເງິນໃນສູນການເງິນສາກົນ ຢູ່ ຫວຽດນາມ ກໍ່ອະນຸຍາດໃຫ້ວິສາຫະກິດຂະໜາດຍ່ອຍ, ນ້ອຍ ແລະ ບໍລິສັດ Start-up ລະດົມທຶນປະມານ 700.000 USD/ປີ (ເທົ່າກັບເກືອບ 20 ຕື້ ດົ່ງ)”.
ທີ່ການເຮັດວຽກກັບບັນດາກະຊວງ, ຂະແໜງການພ້ອມກັບການນຳ ນະຄອນໂຮ່ຈີມິນ ແລະ ນະຄອນດ່ານັ້ງ ຫວ່າງແລ້ວນີ້ ກ່ຽວກັບການຜັນຂະຫຍາຍວຽກງານກໍ່ສ້າງ, ເຄື່ອນໄຫວ ແລະ ພັດທະນາສູນການເງິນສາກົນ ຢູ່ ຫວຽດນາມ, ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ຮຽກຮ້ອງໃຫ້ກະຊວງການເງິນ ແລະ ທະນາຄານແຫ່ງລັດ ປະຕິບັດສຳເລັດຂໍ້ກຳນົດກົດລະບຽບການເຄື່ອນໄຫວຂອງ VIFC ຢູ່ ນະຄອນໂຮ່ຈີມິນ ແລະ ດ່ານັ້ງ ໃນເດືອນມິຖຸນານີ້. ທ່ານນາຍົກລັດຖະມົນຕີ ເລມິງຮຶງ ເນັ້ນໜັກວ່າ:
“ກ່ອນອື່ນໝົດ, ຄວາມຕ້ອງການລະດົມທຶນຂອງສອງນະຄອນຄືແນວໃດ, ຕ້ອງສະເໜີຢ່າງຈະແຈ້ງກັບກະຊວງການເງິນ ແລະ ທະນາຄານແຫ່ງລັດ ກ່ຽວກັບຜະລິດຕະພັນການເງິນ, ຜະລິດຕະພັນຕິດພັນກັບການເຄື່ອນໄຫວການຄ້າ, ການລົງທຶນ, ຍົກຕົວຢ່າງຄືເຄື່ອງມືການເງິນເພື່ອລະດົມທຶນໄລຍະກາງ ແລະ ໄລຍະຍາວຄື ພັນທະບັດລັດຖະບານ, ພັນທະບັດກິດຈະກຳ, ພັນທະບັດລັດຖະບານຕິດພັນກັບບາງກິດຈະກຳລະອຽດ. ປັດຈຸບັນ, ສອງນະຄອນລ້ວນແຕ່ມີຫຼາຍໂຄງການຈຸດສຸມ ກ່ຽວກັບພື້ນຖານໂຄງລ່າງຄົມມະນາຄົມ, ທ່າກຳປັ່ນທະເລ, ສະໜາມບິນ, ພະລັງງານ”.
ປັດຈຸບັນ, ມີຫຼາຍນັກລົງທຶນຕ່າງປະເທດເຫັນໄດ້ຈຸດພົ້ນເດັ່ນ ແລະ ຄວາມສາມາດບົ່ມຊ້ອນຂອງເສດຖະກິດ ຫວຽດນາມ. ນັ້ນແມ່ນປະຊາກອນໜຸ່ມ, ມີຄວາມຂະຫຍັນຂັນເຄື່ອນ, ເສດຖະກິດພັດທະນາຢ່າງແຮງ, ດັ່ງນັ້ນ ມີຫຼາຍນັກລົງທຶນຢາກລົງທຶນເຂົ້າ VIFC. ເພື່ອໃຫ້ VIFC-HCMC ກາຍເປັນຊ່ອງທາງນຳທຶນເຂົ້າ ຫວຽດນາມ ຢ່າງມີປະສິດທິຜົນ, ບັນດານັກລົງທຶນປາດຖະໜາວ່າ ຈະມີຫຼາຍຂໍ້ກຳນົດທີ່ເໝາະສົມ, ໃນນັ້ນມີກົນໄກຢ່າງໂປ່ງໃສເພື່ອຄວບຄຸມຄວາມສ່ຽງໃຫ້ແກ່ນັກລົງທຶນຕາມທຳນຽມສາກົນ.
