ປະຊາຊົນ ຫວຽດນາມ ພວມຢູ່ໃນຊຸມວັນສະເຫຼີມສະຫຼອງ 81 ປີແຫ່ງວັນການປະຕິວັດເດືອນສິງຫາ ປະສົບຜົນສຳເລັດ (19/8/1945 - 19/8/2026). ໄຊຊະນະຂອງການປະຕິວັດເດືອນສິງຫາ ບໍ່ພຽງແຕ່ຢຸດຕິແອກປົກຄອງຂອງພວກຫົວເມືອງຂຶ້ນ - ສັກດີນາເທົ່ານັ້ນ ຫາກຍັງແມ່ນການປະຕິວັດເພື່ອມະນຸດ - ເພື່ອສິດມີຊີວິດ, ສິດເສລີ, ສິດມີຄວາມຜາສຸກອີກດ້ວຍ. ນັບແຕ່ໄຊຊະນະອັນຍິ່ງໃຫຍ່ນັ້ນ, ຄວາມຜາສຸກຂອງປະຊາຊົນໄດ້ກາຍເປັນເປົ້າໝາຍກຳນົດໃນລັດຖະທຳມະນູນໃນທຸກໄລຍະພັດທະນາຂອງປະເທດຊາດ.
ການປະຕິວັດເດືອນສິງຫາ ບໍ່ພຽງແຕ່ມີລັກສະນະຊົນຊາດເທົ່ານັ້ນ ຫາກຍັງມີລັກສະນະມະນຸດສະທຳ, ສິດທິມະນຸດອີກດ້ວຍ.
ຄວາມເປັນເຈົ້າການໃນການປະຕິບັດບັນດາຄຸນຄ່າກ້າວໜ້າຂອງມວນມະນຸດ
ການປະຕິວັດເດືອນສິງຫາ ແມ່ນໄດ້ແກ້ໄຂສິດໄດ້ມີຊີວິດຂອງປະຊາຊົນ ຫວຽດນາມ ໂດຍພື້ນຖານ ແລະ ເຖິງຖອງ. ແຕ່ປະເທດຖືກຍູ້ໃຫ້ຕົກເຂົ້າເຫວດັບສູນຍ້ອນໄພອຶດຫິວເມື່ອປີ 1945 ໂດຍລະບອບຟາດຊິດ ຍີ່ປຸ່ນ ແລະ ຫົວເມືອງຂຶ້ນ ພ້ອມກັບໄພທຳມະຊາດ, ລະດູການເກັບກ່ຽວບໍ່ໄດ້ຮັບຜົນດີສ້າງຂຶ້ນ, ເຮັດໃຫ້ມີຄົນເສຍຊີວິດ ກວ່າ 2 ລ້ານຄົນ, ປະຊາຊົນ ຫວຽດນາມ ຍາດໄດ້ສິດເປັນເຈົ້າຂອງປະເທດ, ສິດໄດ້ມີຊີວິດ, ສິດໄດ້ດຳລົງຊີວິດໃນສັງຄົມແຫ່ງຄວາມຍຸຕິທຳຄືນມາ. ການປະຕິວັດບໍ່ພຽງແຕ່ປ່ຽນແປງຊາຕາກຳຂອງຊາດເທົ່ານັ້ນ ຫາກຍັງປ່ຽນແປງຊາຕາກຳຂອງແຕ່ລະຄົນອີກດ້ວຍ. ພາຍໃຕ້ຮູບການປົກຄອງສາທາລະນະລັດ ປະຊາທິປະໄຕທຳອິດຢູ່ອາຊີຕາເວັນອອກສ່ຽງໃຕ້, ເປັນຄັ້ງທຳອິດທີ່ປະຊາຊົນຫວຽດນາມ ໄດ້ເອີ້ນວ່າ “ພົນລະເມືອງ”, ໄດ້ຮັບສິດ ແລະ ພັນທະເທົ່າທຽມກັນຕໍ່ໜ້າກົດໝາຍ.
ໃນຊຸມວັນທຳອິດຍາດທີ່ໄດ້ເອກະລາດ, ເຖິງວ່າປະເທດຊາດປະສົບກັບຄວາມຫຍຸ້ງຍາກຫຼາຍຢ່າງ, ແຕ່ລັດຖະບານຊົ່ວຄາວ ຍັງປະກາດໃຊ້ຫຼາຍນະໂຍບາຍມະນຸດສະທຳຄື: ລົບລ້າງການສ່ວຍສາອາກອນ, ຈັດການກູ້ໄພອຶດຫິວ, ປະຕິບັດວຽກງານບຳເທົາຄວາມລຳບາກຂອງປະຊາຊົນ. ນັບແຕ່ປີ 1946, ເມື່ອຫຼາຍປະເທດຍັງພວມໂຕ້ຖຽງກັນກ່ຽວກັບສິດໄດ້ໄປປ່ອນບັດເລືອກຕັ້ງຂອງແມ່ຍິງ, ໃນການເລືອກຕັ້ງທົ່ວປະເທດຄັ້ງທຳອິດຢູ່ ຫວຽດນາມ ໄດ້ຮັບຮູ້ສິດເລືອກຕັ້ງ ແລະ ອອກສະໝັກຮັກເລືອກຕັ້ງຂອງແມ່ຍິງ. ນີ້ບໍ່ພຽງແຕ່ແມ່ນບາດກ້າວປະຫວັດສາດເທົ່ານັ້ນ ຫາກຍັງແມ່ນສິ່ງພິສູດໃຫ້ເຫັນ: ຫວຽດນາມ ບໍ່ຢືນຢູ່ນອກ ຫຼື ໄປຕາມຫຼັງບັນດາຄຸນຄ່າທີ່ກ້າວໜ້າຂອງມວນມະນຸດ, ຫາກຍັງມີຄວາມເປັນເຈົ້າການປະຕິບັດບັນດາຄຸນຄ່ານັ້ນນັບແຕ່ຊຸມວັນຫາກໍ່ສະຖາປະນາປະເທດຊາດໃນທັນທີ.
ຢຶດໝັ້ນກັບເປົ້າມາຍພັດທະນາເພື່ອມະນຸດ, ເພື່ອຄວາມຜາສຸກຂອງປະຊາຊົນ
ໂດຍສືບຕໍ່ບັນດາຄຸນຄ່າທີ່ກ້າວໜ້າຂອງການປະຕິວັດເດືອນສິງຫາ, ພັກ ແລະ ລັດ ຫວຽດນາມ ຍາມໃດກໍ່ກຳນົດມະນຸດແມ່ນພື້ນຖານ, ແມ່ນເປົ້າໝາຍ, ກຳລັງໜູນຂອງພາລະກິດແຫ່ງການພັດທະນາແບບຍືນຍົງ. ກ່າວຄຳເຫັນທີ່ການພົບປະກັບບັນດາການນຳທີ່ບໍ່ໄດ້ເລືອກຕັ້ງຄືນໃນຊຸດທີ XIV (ວັນທີ 18 ສິງຫາ), ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ຢັ້ງຢືນວ່າ:
ແຕ່ລະລຸ້ນຄົນມີສະພາບການ, ໜ້າທີ່ແຕກຕ່າງກັນ, ແຕ່ລ້ວນແຕ່ມີເປົ້າໝາຍລວມແມ່ນຮັບໃຊ້ປະເທດຊາດ, ຮັບໃຊ້ປະຊາຊົນ. ປະຫວັດສາດບໍ່ຮຽກຮ້ອງຄົນລຸ້ນຫຼັງເຮັດວິທີການຂອງຄົນລຸ້ນກ່ອນຄືນອີກ, ແຕ່ຮຽກຮ້ອງໃຫ້ແຕ່ລະລຸ້ນຄົນ ຕ້ອງມີຄວາມຈົ່ງຮັກພັກດີຕໍ່ອຸດົມການ, ເປົ້າໝາຍຂອງພັກ, ຮູ້ສືບທອດ ແລະ ມີຄຸນນະທາດປ່ຽນແປງໃໝ່ຢ່າງພຽງພໍເພື່ອປະຕິບັດສຳເລັດໜ້າທີ່ໃນຍຸກສະໄໝຂອງຕົນ.
ໃນຕົວຈິງ, 81 ປີຜ່ານມາ, ໃນການສ້າງລະບົບກົດໝາຍໃຫ້ສົມບູນແບບ, ການຮັບປະກັນສິດ ແລະ ຜົນປະໂຫຍດອັນຖືກຕ້ອງກັນກົດໝາຍ, ອັນຊອບທຳຂອງປະຊາຊົນ ຍາມໃດກໍ່ແມ່ນວຽກງານຈຸດສຸມ. ກົດໝາຍວິຊາການຫຼາຍສະບັບຄື: ກົດໝາຍແພ່ງ, ກົດໝາຍອາຍາ, ກົດໝາຍວ່າດ້ວຍເດັກນ້ອຍ, ກົດໝາຍວ່າດ້ວຍຄວາມສະເໝີພາບລະຫວ່າງຍິງຊາຍ, ກົດໝາຍວ່າດ້ວຍຄົນພິການ… ໄດ້ຮັບການປະກາດໃຊ້ ເພື່ອແນໃສ່ຫັນບັນດາສິດຕາມທິດນັບມື້ນັບຮອບດ້ານ, ສອດຄ່ອງກັບສະພາບການຕົວຈິງພາຍໃນປະເທດ ແລະ ມາດຖານສາກົນ.
ໃນບັນດາການກຳນົດທິດໃຫຍ່ຂອງກອງປະຊຸມໃຫຍ່ຄັ້ງທີ XIV ຂອງພັກ, ປັດໄຈ “ມະນຸດ” ຍາມໃດກໍ່ໄດ້ຕັ້ງຢູ່ທີ່ຕັ້ງໃຈກາງ. ສິ່ງນີ້ພວມໄດ້ຮັບການປະຕິບັດໃຫ້ປະກົດຜົນເປັນຈິງໃນບັນດານະໂຍບາຍລະອຽດ. ຫວ່າງແລ້ວນີ້, ກະຊວງສາທາລະນະສຸກ ໄດ້ສະເໜີຮູບແບບເບິ່ງແຍງດູແລຜູ້ອາຍຸສູງຢູ່ຊຸມຊົນ, ເມື່ອຂະແໜງການສຶກສາມຸ່ງໄປເຖິງສະພາບແວດລ້ອມແຫ່ງການຮ່ຳຮຽນວັດທະນະທຳມະນຸດ, ເມື່ອບັນດາທ້ອງຖິ່ນ ລົງທຶນກໍ່ສ້າງສະຖານທີ່ສີຂຽວ, ລະບົບລະບຽບການວັດທະນະທຳ, ຄຸນນະພາບການດຳລົງຊີວິດຂອງປະຊາຊົນ… ທ່ານ ຫວູດ້າຍທັ້ງ, ປະທານຄະນະກຳມະການປະຊາຊົນນະຄອນ ຮ່າໂນ້ຍ ໃຫ້ຮູ້ວ່າ:
ປັດຈຸບັນ, ກຳລັງໜູນຫຼັກເພື່ອຊຸກຍູ້ການພັດທະນາຍັງແມ່ນຂະແໜງການບໍລິການ, ແຕ່ວ່າ ນັບແຕ່ປີ 2027 – 2028 ບັນດາຂະແໜງອາຊີບໃໝ່, ດ້ວຍມູນຄ່າເພີ່ມສູງ, ເຕັກໂນໂລຢີສູງ, ບັນດາຂະແໜງໄດ້ນຳມາເຊິ່ງຄວາມໝາຍກ່ຽວກັບວັດທະນະທຳສັງຄົມຄື: ການແພດ, ສັງຄົມ ຈະແມ່ນກຳລັງໜູນທີ່ຍິ່ງໃຫຍ່ທີ່ສຸດເພື່ອບັນລຸໄດ້ເປົ້າໝາຍພັດທະນາຢ່າງຮອບດ້ານ.
81 ປີຜ່ານມາ, ວິວັດການຂອງ ຫວຽດນາມ ພິສູດໃຫ້ເຫັນວ່າ: ປະເທດເຄົາລົບສິດທິມະນຸດ ແມ່ນປະເທດມານະພະຍາຍາມທີ່ສຸດເພື່ອໃຫ້ປະຊາຊົນໝົດທຸກຄົນໄດ້ດຳລົງຊີວິດໃນທ່າມກາງສັນຕິພາບ, ມີສະຫວັດດີການທີ່ໝັ້ນແກ່ນ ແລະ ມີໂອກາດພັດທະນາຢ່າງຮອບດ້ານ. ນັ້ນບໍ່ພຽງແຕ່ແມ່ນໝາກຜົນຂອງ ການປະຕິວັດເດືອນສິງຫາ ເທົ່ານັ້ນ ຫາກຍັງແມ່ນຫຼັກການໃນການຄຸ້ມຄອງບໍລິຫານແຫ່ງຊາດຂອງ ຫວຽດນາມ ໃນໂລກແຫ່ງການເຊື່ອມໂຍງອີກດ້ວຍ./.
