ຜ່ານເວລາກວ່າ 3 ທົດສະວັດ ນັບແຕ່ເມື່ອໄດ້ໃຫ້ສັດຕະຍາບັນສົນທິສັນຍາ ສປຊ ກ່ຽວກັບສິດທິຂອງເດັກ, ຍາມໃດ ຫວຽດນາມ ກໍ່ຢັ້ງຢືນທີ່ຕັ້ງບົດບາດຂອງສະມາຊີກທີ່ມີຄວາມຮັບຜິດຊອບ. ຈາກບັນດາຄຳໝັ້ນສັນຍາບົນເວທີສາກົນ ຕະຫຼອດຮອດບັນດາການກະທຳນິຕິບັນຍັດອັນລະອຽດຢູ່ພາຍໃນປະເທດ, ຍາມໃດ ຫວຽດນາມ ກໍ່ມານະພະຍາຍາມສ້າງສະພາບແວດລ້ອມທີ່ປອດໄພ, ຍຸດຕິທຳ ແລະ ພັດທະນາຮອບດ້ານໃຫ້ແກ່ເດັກນ້ອຍຕໍ່ກັບບັນດາການຜັນແປຂອງຍຸກສະໄໝ.
ປະກອບສ່ວນສ້າງບັນດາມາດຖານທົ່ວໂລກ
ທີ່ບັນດາເວທີປາໄສຫຼາຍຝ່າຍ, ຫວຽດນາມ ໄດ້ຢັ້ງຢືນບົດບາດສຳຄັນຜ່ານບັນດາຂໍ້ລິເລີ່ມທີ່ມີລັກສະນະຍຸກສະໄໝ.
ຄຽງຂ້າງບັນດາເວທີປາໄສທົ່ວໂລກ, ຢູ່ລະດັບພາກພື້ນ, ຫວຽດນາມ ກໍ່ແມ່ນຕາໂສ້ທີ່ເປັນເຈົ້າການໃນການສ້າງນະໂຍບາຍຂອງ ອາຊຽນ. ຫວຽດນາມ ໄດ້ເຂົ້າຮ່ວມສ້າງບັນດາໂຄງການບຸລິມະສິດຂອງຄະນະກຳມະການລະຫວ່າງລັດຖະບານ ອາຊຽນ ກ່ຽວກັບສິດທິມະນຸດ (AICHR); ເປັນເຈົ້າພາບຈັດກອງປະຊຸມສຳມະນາພາກພື້ນກ່ຽວກັບການປ້ອງກັນ ຕ້ານການຄ້າແມ່ຍິງ ແລະ ເດັກນ້ອຍ (ປີ 2016) ກໍ່ຄືເພີ່ມທະວີການເຂົ້າເຖິງການສຶກສາໃຫ້ສຳລັບເດັກພິການ (ປີ 2017)….
ຫັນບັນດາຄຳໝັ້ນສັນຍາດ້ວຍການກະທຳຕົວຈິງໃຫ້ປະກົດຜົນເປັນຈິງ
ໜຶ່ງໃນບັນດາຂີດໝາຍທີ່ພົ້ນເດັ່ນທີ່ສຸດ ແມ່ນວິວັດການ 25 ປີແຫ່ງການປະຕິບັດສົນທິສັນຍາເລກທີ 182 ຂອງອົງການແຮງງານສາກົນ (ILO). ຫວຽດນາມ ໄດ້ຫລຸດອັດຕາສ່ວນເດັກນ້ອຍເຂົ້າຮ່ວມການເຄື່ອນໄຫວເສດຖະກິດຢ່າງແຮງ, ຈາກ 9.1% ໃນປີ 2018 ລົງເຫຼືອພຽງ 3.5% ໃນປີ 2023. ຜົນງານນີ້ໄດ້ຢັ້ງຢືນປັດຊະຍາການພັດທະນາຢ່າງສະເໝີຕົ້ນສະເໝີປາຍຂອງ ຫວຽດນາມ ທີ່ວ່າ: ການເຕີບໂຕເສດຖະກິດ ຕ້ອງໄປຄຽງຄູ່ກັບຄວາມຍຸດຕິທຳໃນສັງຄົມ ແລະ ປົກປ້ອງກຸ່ມເປົ້າໝາຍມີຄວາມສ່ຽງສູງກວ່າເພີ່ນ. ໂດຍໄດ້ຮັບຮູ້ບັນດາຄວາມມານະພະຍາຍາມຂອງ ຫວຽດນາມ, ທ່ານນາງ Silvia Danailov, ຫົວໜ້າຜູ້ຕາງໜ້າກອງທຶນເພື່ອເດັກ ສປຊ ປະຈຳ ຫວຽດນາມ (UNICEF) ຖືວ່າ:
ຫວຽດນາມ ບັນລຸໄດ້ບັນດາບາດກ້າວເດີນຢ່າງແຮງ. ເລື່ອງລົງທຶນເຂົ້າໃນບັນດາຂົງເຂດສາທາລະນະສຸກ, ການສຶກສາ ແລະ ການປົກປ້ອງ ໄດ້ປົວແປງອັດຕາລອດຕາຍຂອງເດັກນ້ອຍຫຼາຍພໍສົມຄວນ ພ້ອມທັງຍົກສູງຄວາມອາດສາມາດເຂົ້າເຖິງການບໍລິການຂອງພວກນ້ອງ, ນັບທັງຢູ່ບັນດາເຂດຫ່າງໄກສອກຫຼີກ. ຄຽງຂ້າງນັ້ນ, ປະເທດ ຫວຽດນາມ ກໍ່ຍັງປັບປຸງຂອບນິຕິກຳ ລວມມີບັນດາຄວາມມານະພະຍາຍາມເພື່ອແນໃສ່ປົກປ້ອງເດັກນ້ອຍໃນທາງໄຊເບີ.
ຕໍ່ກັບບັນດາສິ່ງທ້າທາຍໃໝ່ຂອງສັງກາດດີຈີຕອນ, ຫວຽດນາມ ໄດ້ຍົກອອກບັນຫາປົກປ້ອງເດັກນ້ອຍທາງໄຊເບີ ເຂົ້າໃນບັນດາຂອບເຂດຮ່ວມມືພາກພື້ນ ແລະ ສາກົນ ໂດຍໄວ. ຫວຽດນາມ ພ້ອມກັບບັນດາປະເທດ ອາຊຽນ ຮັບຮອງເອົາຖະແຫຼງການກ່ຽວກັບການປົກປ້ອງເດັກໃຫ້ພົ້ນອອກຈາກບັນດາຮູບແບບກົດຂີ່ຂູດຮີດ ແລະ ສວຍໃຊ້ທາງໄຊເບີ ປີ 2019, ພ້ອມທັງຜັນຂະຫຍາຍຫຼາຍໂຄງການດຳເນີນງານ ເພື່ອແນໃສ່ຍົກສູງຄວາມສາມາດປົກປ້ອງເດັກທາງໄຊເບີ. ທີ່ພິທີປຸກລະດົມເດືອນກະທຳເພື່ອເດັກປີ 2026 ດ້ວຍຫົວຂໍ້ “ເດັກນ້ອຍມີຄວາມຜາສຸກ, ປອດໄພ, ກ້າວເຂົ້າສັງກາດດີຈີຕອນຢ່າງໝັ້ນຄົງ”, ທ່ານນາງ ຫວໍທິແອັງຊວັນ ຮອງປະທານປະເທດ ຫວຽດນາມ ເນັ້ນໜັກວ່າ:
ບໍ່ອາດປະໃຫ້ເດັກນ້ອຍ ຫວຽດນາມ 26 ລ້ານຄົນ ກ້າວເຂົ້າສະພາບແວດລ້ອມດີຈີຕອນ ແຕ່ຂາດການຮ່ວມເດີນທາງ, ການກຳນົດທິດ ແລະ ການປົກປ້ອງຢ່າງປອດໄພຕໍ່ບັນດາການກະທົບອັນຫຍໍ້ທໍ້. ດັ່ງນັ້ນ, ການສອນທັກສະດີຈີຕອນ, ທັກສະການດຳລົງຊີວິດທາງໄຊເບີໃຫ້ແກເດັກແມ່ນຈຳເປັນທີ່ສຸດ. ໃນໄລຍະທີ່ຈະມາເຖິງ, ຄວນສຸມໃສ່ຜັນຂະຫຍາຍບັນດາມາດຕະການປົກປ້ອງເດັກນ້ອຍໃນທາງໄຊເບີ, ຂະແໜງການສຶກສາຢ່າງຄົບຊຸດ ແລະ ບັນດາອົງການທີ່ມີໜ້າທີ່ຮັບຜິດຊອບ ຕ້ອງເພີ່ມທະວີການສຶກສາທັກສະດີຈີຕອນ, ທັກສະປົກປ້ອງດ້ວຍຕົນເອງ ແລະ ຫຼີກລ່ຽງບັນດາຄວາມສ່ຽງທາງໄຊເບີໃຫ້ແກ່ເດັກນ້ອຍ.
ໃນສະພາບການໂລກທີ່ປະເຊີນໜ້າກັບສິ່ງທ້າທາຍແບບໃໝ່ຫຼາຍຢ່າງຈາກການປ່ຽນແປງຂອງດິນຟ້າອາກາດ, ການປະທະກັນ ແລະ ການຫັນເປັນດີຈີຕອນ, ຫວຽດນາມ ສືບຕໍ່ສະແດງຄວາມສະເໝີຕົ້ນສະເໝີປາຍໃນການຮັບປະກັນໃຫ້ເດັກນ້ອຍທຸກຄົນ ລ້ວນແຕ່ໄດ້ດຳລົງຊີວິດຢ່າງປອດໄພ, ໄດ້ຮັບການປົກປ້ອງ ແລະ ມີໂອກາດພັດທະນາຢ່າງຮອບດ້ານ./.
