ໜ້າສົນໃຈແມ່ນ ທ້ອງຖິ່ນຈຳນວນໜຶ່ງ ໄດ້ມີການບຸກທະລຸຢ່າງແຮງ, ຜ່ານນັ້ນ ກໍ່ໄດ້ປ່ຽນແປງອັນດັບກ່ຽວກັບການເຕີບໂຕ GRDP ພໍສົມຄວນ ເມື່ອໄລ່ລວມ 9 ເດືອນ ທຽບກັບໝາກຜົນໃນ 6 ເດືອນຕົ້ນປີ. ໝາກຜົນນີ້ໃຫ້ເຫັນວ່າ ເປົ້າໝາຍການເຕີບໂຕສູງ ໄດ້ກະທົບຕໍ່ການບໍລິຫານ, ຕິດພັນກັບຄວາມຮັບຜິດຊອບຂອງແຕ່ລະແຂວງ, ນະຄອນ ແລະ ອຳນາດການປົກຄອງແຕ່ລະຂັ້ນ ນັບມື້ນັບຈະແຈ້ງກກວ່າ.
ສະພາບການເຕີບໂຕສັງລວມໃນ 9 ເດືອນຜ່ານມາ ສະແດງໃຫ້ເຫັນການບຸກທະລຸດ້ານເສດຖະກິດຂອງບັນດາທ້ອງຖິ່ນ ພວມໄດ້ຮັບການປັບປຸງຢ່າງຈະແຈ້ງ.
ທ່າເຕີບໂຕຈາກບັນດາທ້ອງຖິ່ນ
Top 5 ແຂວງ, ນະຄອນ ທີ່ມີລະດັບການເຕີບໂຕ GRDP ສູງກວ່າໝູ່ໃນ 9 ເດືອນຂອງປີ 2026 ຍັງແມ່ນບັນດາທ້ອງຖິ່ນທີ່ມີໜ້າໃນ Top 10 ແຂວງ, ນະຄອນທີ່ມີລະດັບການເຕີບໂຕ GRDP ສູງທີ່ສຸດໃນ 6 ເດືອນຕົ້ນປີ. ຢືນອັນດັບທີ 1 ແມ່ນນະຄອນ ກວາງນິງ ດ້ວຍລະດັບການເຕີບໂຕ GRDP ໃນ 9 ເດືອນບັນລຸ 12,54%. ທ່ານນາງ ຫງວຽນຖຸ່ຍອ່ຽນ ຮອງຫົວໜ້າພະແນກວັດທະນະທຳ, ກິລາ ແລະ ການທ່ອງທ່ຽວນະຄອນ ກວາງນິງ ໃຫ້ຮູ້ວ່າ:
ທາງພະແນກໄດ້ມີບັນດາມາດຕະການຢ່າງຄົບຊຸດ ຈາກຂໍ້ມູນຂ່າວການໂຄສະນາສື່ສານ ຕະຫຼອດຮອດການສ້າງບັນດາກົນໄກນະໂຍບາຍພັດທະນາບັນດາຜະລິດຕະພັນທ່ອງທ່ຽວ, ພັດທະນາພື້ນຖານໂຄງລ່າງ ແລະ ບັນດາເນື້ອໃນອື່ນໆ ເພື່ອສາມາດພັດທະນາການທ່ອງທ່ຽວ ກວາງນິງ ໃຫ້ນັບມື້ນັບທັນສະໄໝ ແລະ ດີກວ່າ.
ຖັດຈາກນະຄອນ ກວາງນິງ ແມ່ນແຂວງ ຫ່າຕິ້ງ, ນະຄອນ ຫາຍຟ່ອງ, ນະຄອນ ບັກນິງ ແລະ ແຂວງ ນິງບິ່ງ. Top 5 ທ້ອງຖິ່ນທີ່ມີລະດັບການເຕີບໂຕ GRDP ສູງກວ່າໝູ່ໃນ 9 ເດືອນຂອງປີ 2026 ລ້ວນແຕ່ບັນລຸກ່ວາ 11%. ນີ້ແມ່ນທ່າເຕີບໂຕຢ່າງແຮງເມື່ອທຽບໃສ່ກັບເຄິ່ງຕົ້ນປີ.
ບັນດາບ່ອນອີງໃໝ່
ສິ່ງທີ່ໜ້າສົນໃຈໃນສະພາບການເຕີບໂຕ ແມ່ນແຜນທີ່ການເຕີບໂຕພວມມີບັນດາບ່ອນອີງໃໝ່ຕື່ມອີກ. ຄວາມສາມາດຜະລິດໄດ້ເພີ່ມເຕີມ, ບັນດາໂຄງການໃຫຍ່ໄດ້ເລີ່ມເສີມຂະຫຍາຍປະສິດທິຜົນ, ການບໍລິການໄດ້ຟື້ນຟູ, ການລົງທຶນພາກລັດໄດ້ຍູ້ໄວ, ບາງຂໍ້ຕິດຂັດທີ່ຖືກແກ່ຍາວ ກໍ່ໄດ້ຮັບການແກ້ໄຂເທື່ອລະກ້າວ. ຫຼາຍທ້ອງຖິ່ນໄດ້ພ້ອມກັນສ້າງກຳລັງໜູນ, ພື້ນຖານການເຕີບໂຕລວມຈະມີຄວາມໝັ້ນຄົງກວ່າ.
ໝາກຜົນນີ້ຍິ່ງມີຄວາມໝາຍກວ່າອີກ ຂະນະທີ່ ຫວຽດນາມ ວາງເປົ້າໝາຍການເຕີບໂຕ GDP ປີ 2026 ນີ້ ຕ້ອງບັນລຸແຕ່ 10% ຂຶ້ນໄປ. ບັນດາສູນເສດຖະກິດເຖິງວ່າມີຂອບຂະໜາດໃຫຍ່ ແລະ ກຳລັງດຶງດູດແຮງແນວໃດກໍ່ຍາກທີ່ຈະສາມາດແບກຫາບການເຕີບໂຕທີ່ຈຳເປັນທັງໝົດໄດ້. ຍ້ອນເຫດນັ້ນ, ເລື່ອງແຕ່ລະແຂວງ, ນະຄອນ ໄດ້ປະກອບສ່ວນດ້ວຍຄວາມສາມາດບົ່ມຊ້ອນ, ທ່າໄດ້ປຽບ ແລະ ແຫຼ່ງກຳລັງທີ່ມີພວມມີຢູ່ແລ້ວນັ້ນ ແມ່ນສິ່ງສຳຄັນຢ່າງແທ້ຈິງ.
ໃນສະພາບການລວມນັ້ນ, ກົດໝາຍວ່າດ້ວຍການພັດທະນາຕົວເມືອງ ມີຜົນສັກສິດນັບແຕ່ວັນທີ 1 ຕຸລາ ປີ 2026 ໄດ້ປະກອບສ່ວນສ້າງແລວນິຕິກຳ ເພື່ອລຸລ່ວງແຫຼ່ງກຳລັງ, ສ້າງທ່ວງທ່າບຸກທະລຸພັດທະນາ. ໃນວາລະປະຊຸມຂອງຄະນະປະຈຳສະພາແຫ່ງຊາດ ຫວຽດນາມ ທີ່ຈັດຂຶ້ນເມື່ອເດືອນກໍລະກົດ ປີ 2026, ໂດຍຕີລາຄາກ່ຽວກັບກົດໝາຍສະບັບນີ້, ທ່ານ ຫງວຽນຄັກດິ້ງ ຮອງປະທານສະພາແຫ່ງຊາດ ຫວຽດນາມ ຖືວ່າ:
ຮູບແບບຈັດແບ່ງສິດໃນຮ່າງກົດໝາຍ ຕາມຫຼັກການຈັດແບ່ງສິດທີ່ແຮງກວ່າ, ເຖິງຖອງກວ່າ ເພື່ອໃຫ້ທ້ອງຖິ່ນໄປຕາມຫຼັກການທ້ອງຖິ່ນເຮັດ, ທ້ອງຖິ່ນຮັບຜິດຊອບ. ແຕ່ຕ້ອງຮັບປະກັນລັກສະນະເອກະພາບຂອງພື້ນຖານບໍລິຫານແຫ່ງຊາດ ແລະ ຫຼັກການປະຕິບັດສິດອຳນາດຂອງລັດທີ່ໄດ້ລະບຸໄວ້ໃນລັດຖະທຳມະນູນ. ບັນດາຂໍ້ກຳນົດກ່ຽວກັບກົນໄກນະໂຍບາຍຊຸກຍູ້ການພັດທະນາຕົວເມືອງພິເສດ ໄດ້ຮັບການປັບປຸງເພື່ອຮັບປະກັນໃຫ້ມີຈຸດພິເສດສະເພາະ, ລື່ນກາຍຢ່າງແທ້ຈິງ.
ສະພາບການເຕີບໂຕລວມໃນ 9 ເດືອນຂອງປີ 2026 ສະແດງໃຫ້ເຫັນກຳລັງບຸກທະລຸເສດຖະກິດຂອງບັນດາທ້ອງຖິ່ນ ພວມໄດ້ຮັບການປັບປຸງຢ່າງຈະແຈ້ງ. ໃນຊຸມເດືອນທ້າຍປຈະແມ່ນຈຸດເວລາຕັດສິນ, ຮຽກຮ້ອງໃຫ້ບັນດາທ້ອງຖິ່ນ ສືບຕໍ່ເສີມຂະຫຍາຍບັນດາກຳລັງໝນູນທີ່ພວມມີ, ນຳໃຊ້ບັນດາບ່ອນອີງໃໝ່ ເພື່ອຍູ້ໄວການລົງທຶນ, ເປີດກ້ວາງການຜະລິດ ແລະ ກະຕຸກຊຸກຍູ້ບັນດາຂົງເຂດທີ່ຍັງມີຄວາມສາມາດບົ່ມຊ້ອນເຕີບໂຕ./.
