ການເປັນເຈົ້າການຍຸດທະສາດ ແລະ ຍົກສູງຄວາມສາມາດການກະທຳແຫ່ງຊາດແມ່ນພື້ນຖານເພື່ອໃຫ້ ຫວຽດນາມ ພັດທະນາຢ່າງວ່ອງໄວ, ຍືນຍົງໃນສັງກາດໃໝ່.
ຄຳຊີ້ນຳຂອງທ່ານເລຂາທິການໃຫ່ຍ, ປະທານປະເທດ ບໍ່ພຽງແຕ່ແມ່ນການກຳນົດທິດພັດທະນາພາຍໃນປະເທດເທົ່ານັ້ນ, ຫາກຍັງໄດ້ສະແດງໃຫ້ເຫັນຢ່າງຈະແຈ້ງເຖິງຈິນຕະນາການການຕ່າງປະເທດຂອງ ຫວຽດນາມ, ປັບປຸງກຳລັງພາຍໃນເພື່ອເປັນເຈົ້າການເຊື່ອມໂຍງ ແລະ ຍົກສູງທີ່ຕັ້ງບົດບາດແຫ່ງຊາດອີກດ້ວຍ.
ເປັນເຈົ້າຍຸດທະສາດເລີ່ມຈາກກຳລັງພາຍໃນ
ທ່ານເອກອັກຄະລັດຖະທູດ ຫງວຽນກວາງຂາຍ, ຜູ້ຊ່ຽວຊານການຕ່າງປະເທດຜູ້ໜຶ່ງຖືວ່າ: ຈຸດໃໝ່ໃນສານຂອງ ທ່ານເລຂາທິການໃຫ່ຍ, ປະທານປະເທດ ໂຕເລິມ ທີ່ກອງປະຊຸມສູນກາງພັກກອມມູນິດ ຫວຽດນາມ ຄັ້ງທີ 3 ຊຸດທີ 14 ແມ່ນການຫັນປ່ຽນຈາກຈິນຕະນາການຮັບມື ໄປສູ່ຈິນຕະນາການສ້າງກຳລັງຄວາມສາມາດແຫ່ງຊາດ. ທ່ານເອກອັກຄະລັດຖະທູດ ຫງວຽນກວາງຂາຍ ແບ່ງປັນວ່າ:
ຂ້າພະເຈົ້າຖືວ່າສານຂອງ ທ່ານເລຂາທິການໃຫ່ຍ, ປະທານປະເທດ ໂຕເລິມ ໃນບົດກ່າວປາໄສໄຂກອງປະຊຸມສູນກາງພັກກອມມູນິດ ຫວຽດນາມ ຄັ້ງທີ 3 ແມ່ນມີຄວາມໝາຍໃຫ້ແກ່ ຫວຽດນາມ ໃນສັງກາດໃໝ່. ໃນແງ່ມູມການຕ່າງປະເທດ, ການເປັນເຈົ້າການຍຸດທະສາດ ແລະ ຍົກສູງຄວາມສາມາດການກະທຳແຫ່ງຊາດ ແມ່ນການຫັນສະພາບການ ຈາກການອົດຮັບ ໄປສູ່ການເປັນເຈົ້າການ. ປະເທດໜຶ່ງຈະສາມາດມີບົດບາດທີ່ຕັ້ງ ໄດ້ຢ່າງແທ້ຈິງກໍ່ຕໍ່ເມື່ອທັງມີກຳລັງພາຍໃນທີ່ໜັກແໜ້ນ ທັງມີຄວາມສາມາດຫັນບັນດາໂອກາດຢູ່ພາຍນອກໃຫ້ກາຍເປັນກຳລັງໜູນພັດທະນາ.
ບັນດາໝາກຜົນທີ່ບັນລຸໄດ້ໃນ 6 ເດືອນຕົນປີ 2026 ໄດ້ສ່ອງແສງສ່ວນໜຶ່ງຄວາມສາມດດັ່ງກ່າວ. ຕາໜ່າງຄູ່ຮ່ວມມືໄດ້ເປີດກ້ວາງ, ການທູດເສດຖະກິດໄດ້ນຳມາເຊິ່ງຂໍ້ຕົກລົງການຮ່ວມມືນັບຮ້ອຍສະບັບ, ໃນນັ້ນອັດຕາສ່ວນຫຼາຍແມ່ນຂຶ້ນກັບບັນດາຂົງເຂດວິທະຍາສາດ, ເຕັກໂນໂລຊີ ແລະ ນະວັດຕະກຳ. ການເຕີບໂຕ GDP ບັນລຸ 8,18%, ສູງສຸດໃນຫຼາຍປີມານີ້, ຊື່ງສະແດງໃຫ້ເຫັນວ່າ ບັນດາແຜນນະໂຍບາຍໃໝ່ ພວມຫັນເປັນໝາກຜົນພັດທະນາລະອຽດເທື່ອລະກ້າວ. ທ່ານນາງ Mariam Sherman ຜູ້ອຳນວຍການທະນາຄານໂລກປະຈຳ ຫວຽດນາມ ຖືວ່າ:
ຂີດໝາຍນີ້ ຊ່ວຍປັບປຸງຄວາມໄວ້ວາງໃຈຂອງສາກົນ ເຂົ້າໃນແງ່ຫວັງເສດຖະກິດໄລຍະຍາວນານຂອງ ຫວຽດນາມ ກ່ວາອີກ ແລະ ບົດບາດທີ່ຕັ້ງຂອງປະເທດຊາດ ຄືດັ່ງຈຸດນັດພົບການລົງທຶນ. ຫວຽດນາມ ມີຫຼາຍປັດໄຈທີ່ຈຳເປັນຄື: ກຳລັງແຮງງານໜຸ່ມ ແລະ ມີຄວາມເກັ່ງກ້າສາມາດ, ເສດຖະກິດມະຫາພາກມີຄວາມສະຖຽນລະພາບ, ທີ່ຕັ້ງຍຸດທະສາດຢູ່ໃຈກາງເຂດເຕີບໂຕຂອງ ອາຊີ ແລະ ສິ່ງສຳຄັນກ່ວາ ນັ້ນແມ່ນ ຫວຽດນາມ ມີຄວາມຄາດຫວັງຢ່າງແຮງ ແລະ ກຽມພ້ອມປະຕິຮູບ ແລະ ຮັບມື.
ເປັນເຈົ້າຕົນເອງເພື່ອເຊື່ອມໂຍງຢ່າງເລິກເຊິ່ງກ້ວາງຂວາງກ່ວາ
ສານຂອງທ່ານເລຂາທິການໃຫ່ຍ, ປະທານປະເທດ ໂຕເລິມ ທີ່ກອງປະຊຸມສູນກາງພັກກອມມູນິດ ຫວຽດນາມ ຄັ້ງທີ 3 ກໍ່ແມ່ນຄຳຢັ້ງຢືນທັດສະນະສະເໝີຕົ້ນສະເໝີປາຍຂອງ ຫວຽດນາມ ທີ່ວ່າ ປະເທດໜຶ່ງຍິ່ງມີກຳລັງພາຍໃນ, ກຳລັງຄວາມສາມາດກະທຳ ກໍ່ຍິ່ງຈະມີຄວາມສາມາດເປີດກ້ວາງການຮ່ວມມືຢ່າງມີຄວາມຍຸດຕິທຳ, ບັນລຸປະສິດທິຜົນ ແລະ ຍືນຍົງ. ທັດສະນະນີ້ ກໍ່ກົມກຽວກັບຈິນຕະນາການການຕ່າງປະເທດ ຊື່ງທ່ານເລາຂາທິການໃຫ່ຍ, ປະທານປະເທດ ໂຕເລິມ ໄດ້ເນັ້ນໜັກເປັນຫຼາຍເທື່ອກ່ອນນັ້ນທີ່ວ່າ:
ຫວຽດນາມ ກຳນົດວ່າການເຊື່ອມໂຍງເຂົ້າກັບສາກົນແມ່ນກຳລັງໜູນສຳຄັນ ເພື່ອພັດທະນາປະເທດຊາດ. ຢາກມີສັນຕິພາບ, ຢາກມີການພັດທະນາ ຕ້ອງເປີດປະຕູກັບພາຍນອກ. ໃນຕົວຈິງແລ້ວ ພື້ນຖານເສດຖະກິດ ຫວຽດນາມ ມີລະດັບເປີດສູງທີ່ສຸດ. ກ່ຽວກັບດ້ານຄວາມໝັ້ນຄົງ, ຫວຽດນາມ ໄດ້ຕິດພັນຢ່າງສະໜິດແໜ້ນກັບຄວາມໝັ້ນຄົງຂອງພາກພື້ນ ແລະ ໂລກ. ພວກຂ້າພະເຈົ້າຖືວ່າ ຕ້ອງຖືເປັນສຳຄັນ ແລະ ຍົກລະດັບການເຊື່ອມໂຍງເຂົ້າກັບສາກົນ, ຖືວ່າ ການເຊື່ອມໂຍງເຂົ້າກັບສາກົນບໍ່ພຽງແຕ່ແມ່ນກຳລັງໜູນໃຫ້ແກ່ການພັດທະນາເທົ່ານັ້ນ, ຫາກຍັງແມ່ນວິທີການແຖວໜ້າ ເພື່ອປະຕິບັດບັນດາເປົ້າໝາຍຍຸດທະສາດຂອງປະເທດຊາດອີກດ້ວຍ.
ດ້ວຍພື້ນຖານເປັນເຈົ້າຍຸດທະສາດ ແລະ ຄວາມສາມາດກະທຳທີ່ນັບມື້ນັບໄດ້ຮັບການປັບປຸງ, ຫວຽດນາມ ພວມຢັ້ງຢືນບໍ່ພຽງແຕ່ວິໄສທັດພັດທະນາທີ່ຖືກຕ້ອງເທົ່ານັ້ນ, ຫາກຍັງມີຄວາມສາມາດຫັນວິໄສທັດນັ້ນໃຫ້ປະກົດຜົນເປັນຈິງອີກດ້ວຍ. ຄວາມສາມາດກະທຳຈະສືບຕໍ່ເພີ່ມພູນຄູນສ້າງຄວາມໄວ້ວາງໃຈຂອງປະຊາຄົມໂລກ, ສ້າງກຳລັງໜູນເພື່ອໃຫ້ ຫວຽດນາມ ເຊື່ອມໂຍງຢ່າງເລິກເຊິ່ງກ້ວາງຂວາງ, ຮ່ວມມືຢ່າງມີປະສິດທິຜົນ ແລະ ພັດທະນາແບບຍືນຍົງ./.
