ທ່ານ Elbridge Colby ຮອງລັດຖະມົນຕີກະຊວງສົງຄາມອາເມລິກາ ພວມເດີນທາງໄປປະຕິບັດງານຢູ່ປະເທດອາຊີຕາເວັນອອກສ່ຽງໃຕ້ຈຳນວນໜຶ່ງ, ລວມມີ ຟີລິບປິນ, ອິນໂດເນເຊຍ, ໄທ ແລະ ກຳປູເຈຍ, ເພື່ອແນໃສ່ປຶກສາຫາລືເພີ່ມທະວີການຮ່ວມມືດ້ານປ້ອງກັນຊາດປະກອບສ່ວນສ້າງພື້ນຖານສັນຕິພາບ, ສະຖຽນລະພາບຍາວນານໃນພາກພື້ນ.
ໃນຖະແຫຼງການທີ່ຍົກອອກມາໃນວັນທີ 11 ສິງຫາ, ທ່ານ Sjafrie Sjamsoeddin ລັດຖະມົນຕີກະຊວງປ້ອງກັນປະເທດ ອິນໂດເນເຊຍ ໃຫ້ຮູ້ວ່າ ໄດ້ເຂົ້າຮ່ວມກອງປະຊຸມກັບ ທ່ານ Elbridge Colby ຮອງລັດຖະມົນຕີກະຊວງສົງຄາມ ອາເມລິກາ ຢູ່ນະຄອນຫຼວງ ຈາກາຕາ. ກອງປະຊຸມໄດ້ປຶກສາຫາລືບັນດາບາດກ້າວລະອຽດໃນການເພີ່ມທະວີການຮ່ວມມືດ້ານປ້ອງກັນຊາດລະຫວ່າງ ອິນໂດເນເຊຍ - ອາເມລິກາ. ເຖິງຢ່າງໃດກໍຕາມ, ລາຍລະອຽດຂອງບັນດາບັນຫາທີ່ໄດ້ປຶກສາຫາລືໃນກອງປະຊຸມ ບໍ່ໄດ້ເປີດເຜີຍເທື່ອ.
ຖະແຫຼງການຂອງສະຖານທູດ ອາເມລິກາ ປະຈຳ ຈາກາຕາ ເນັ້ນໜັກວ່າ ການໄປຢ້ຽມຢາມ ອາຊີຕາເວັນອອກສ່ຽງໃຕ້ ຂອງທ່ານຮອງລັດຖະມົນຕີກະຊວງສົງຄາມ ໄດ້ເປັນການຢັ້ງຢືນຄືນຄຳໝັ້ນສັນຍາຂອງ ອາເມລິກາ ໃນການສ້າງພື້ນຖານສັນຕິພາບອັນຍາວນານຢູ່ພາກພື້ນ. ກ່າວຄຳເຫັນທີ່ ຟີລິບປິນ ໃນວັນທີ 10 ສິງຫາ, ທ່ານຮອງລັດຖະມົນຕີ Elbridge Colby ໃຫ້ຮູ້ວ່າ ອາເມລິກາ ພວມຢາກປັບປຸງຖານະຕຳແໜ່ງຢູ່ພາກພື້ນມະຫາສະໝຸດ ອິນເດຍ - ປາຊີຟິກ ແລະ ມີຄວາມຫວັງຢາກພ້ອມກັບພັນທະມິດ ແລະ ຄູ່ຮ່ວມມືເພີ່ມທະວີຄວາມຮັບຜິດຊອບຕໍ່ຄວາມໝັ້ນຄົງໃນພາກພື້ນ.
