ວັນທີ 02 ສິງຫາ, ທ່ານ Donald Trump, ປະທານາທິບໍດີ ອາເມລິກາ ໃຫ້ຮູ້ວ່າ ບັນດາການເຈລະຈາລະຫວ່າງ ວໍໍຊິງຕັນ ແລະ ເຕເຮຣານ ເລີ່ມຈັດຂຶ້ນໃນຕອນບ່າຍວັນທີ 03 ສິງຫາ (ຕາມເວລາທ້ອງຖິ່ນ), ໃນສະພາບທີ່ທັງ 2 ຝ່າຍພວມຊອກຫາຂໍ້ຕົກລົງເພື່ອຫຼຸດຜ່ອນຄວາມເຄັ່ງຕຶງຢູ່ຕາເວັນອອກກາງ.
ການນຳ ອາເມລິກາ ໃຫ້ຮູ້ວ່າ ຊະອຸດີ ອາຣັບບີ, ບັນດາປະເທດສະຫະລັດ ອາຣັບ ເອັມມີເຣດ (UAE) ແລະ ອີຣານ ລ້ວນແຕ່ສະເໜີໃຫ້ ອາເມລິກາ ສະຫງວນເວລາຕື່ມອີກໃຫ້ແກ່ການທູດ ຍ້ອນເຊື່ອໝັ້ນວ່າຍັງສາມາດບັນລຸໄດ້ຂໍ້ຕົກລົງ. ຕາມທ່ານແລ້ວ, ປະຈຸບັນ ວໍຊິງຕັນ ຍັງພວມດຳເນີນການໂອ້ລົມສົນທະນາກັບ ເຕເຮຣານ, ແຕ່ກໍ່ໃສ່ໃຈວ່າ ອີຣານ ໄດ້ສະແດງຄວາມປາດຖະໜາຢາກບັນລຸໄດ້ຂໍ້ຕົກລົງເປັນຫຼາຍຄັ້ງ ແຕ່ບໍ່ແມ່ນຍາມໃດກໍ່ປະຕິບັດຖືກຕາມສິ່ງທີ່ໄດ້ໃຫ້ຄຳໝັ້ນສັນຍາ.
ສ່ວນຝ່າຍ ເຕເຮຣານ, ໃນວັນດຽວກັນ, ທ່ານ Masoud Pezeshkian, ປະທານາທິບໍດີ ອີຣານ ໄດ້ຮຽກຮ້ອງໃຫ້ ອາເມລິກາ ປະຕິບັດຕາມບົດບັນທຶກຊ່ວຍຈຳທີ່ໄດ້ລົງນາມລະຫວ່າງ 2 ປະເທດ, ພ້ອມກັນນັ້ນ ກໍ່ຢືນຢັນວ່າ ເອກະສານນີ້ຈະແມ່ນພື້ນຖານໃຫ້ນະໂຍບາຍການຕ່າງປະເທດຂອງ ອີຣານ ໃນອະນາຄົດ.
