ໃນຊຸມມື້ນີ້ ທົ່ວປະເທດພວມຈັດພິທີສະເຫຼີມສະຫຼອງວັນຊາດທີ 2 ກັນຍາ ຢ່າງຟົດຟື້ນ, ຢູ່ຫຼາຍທ້ອງຖິ່ນໃນເຂດພູສູງ ໄຕບັກ ເຕັມໄປດ້ວຍຄວາມຮຸ່ງເຮືອງເຫຼືອງເຫຼື້ອມດ້ວຍທຸງຊາດ, ດອກໄມ້, ຊຸດອາພອນປະຈຳເຜົ່າ ແລະ ຄຶກໂຄມໄປດ້ວຍບັນດາການເຄື່ອນໄຫວວັດທະນະທຳ, ກິລາ, ທ່ອງທ່ຽວ. ຈາກ ມົກເຈົາ (ເຊີນລາ) ຕະຫຼອດຮອດ ທານອຽນ (ລາຍເຈົາ), ບຸນເຕັດ ດົກເລິບ (ບຸນເຕັດເອກະລາດ) ໄດ້ກາຍເປັນໂອກາດເພື່ອໃຫ້ພໍ່ແມ່ປະຊາຊົນບັນດາເຜົ່າໄດ້ພົບປະກັນ, ເຂົ້າຮ່ວມງານບຸນ ແລະ ແນະນຳວັດທະນະທຳທີ່ເປັນເອກະລັກສະເພາະຂອງບ້ານເກີດເມືອງນອນ.
ເອື້ອຍ ຊຸ່ງທິໂຕ້ງ, ຊາວເຜົ່າ ມົ້ງ ຢູ່ຕາແສງ ງອັກຈຽນ, ແບ່ງປັນວ່າ:
“ຂ້າພະເຈົ້າອາໄສຫ່າງຈາກເຂດນີ້ກວ່າ 100 ກມ ແລະ ໄດ້ກະກຽມບັນດາຊຸດອາພອມທີ່ມີສີສັນວັດທະນະທຳຂອງຕາແສງ ງອັກຈຽນ. ຊຸດກະໂປງນີ້ຂ້າພະເຈົ້າຖັກແສ່ວເອງໃນໄລຍະເວລາກວ່າ 1 ປີ. ເປັນຄັ້ງທຳອິດ ຂ້າພະເຈົ້າໄດ້ມາ ມົກເຈົາ, ຂ້າພະເຈົ້າໄດ້ພົບປະກັບເພື່ອນມິດຫຼາຍຄົນ. ຕະຫຼາດ ມົກເຈົາ ຄຶກຄັກຫຼາຍ. ຂ້າພະເຈົ້າຮູ້ສຶກປິຕິຊົມຊື່ນທີສຸດ”.
ເນື່ອງໃນໂອກາດນີ້, ຢູ່ສະໜາມຫຼວງ 8/5, ຕາແສງ ມົກເຈົາ, ໃນຂອບເຂດສັບປະດາວັດທະນະທຳ - ທ່ອງທ່ຽວ ມົກເຈົາ ປີ 2026 ຍັງຈັດຫຼາຍກິດຈະກຳທີ່ຟົດຟື້ນມ່ວນຊື່ນ, ໃນນັ້ນມີງານລາຕີຜ້າທໍພື້ນເມືອງສາກົນ ເຊີນລາ ປີ 2026, ທີ່ຈັດຂຶ້ນໃນຕອນຄ່ຳວັນທີ 31 ສິງຫາ.
ສ່ວນຢູ່ເຂດດິນແດນ ທານອຽນ, ແຂວງ ລາຍເຈົາ. ບຸນເຕັດເອກະລາດປີນີ້ໄດ້ຈັດຂຶ້ນໃນ 5 ວັນ, ແຕ່ວັນທີ 29 ສິງຫາ ຮອດວັນທີ 02 ກັນຍາ, ດ້ວຍບັນດາກິດຈະກຳວັດທະນະທຳ, ກິລາ, ທ່ອງທ່ຽວຢ່າງຟົດຟື້ນມ່ວນຊື່ນ, ອັນໄດ້ດຶງດູດປະຊາຊົນ ແລະ ແຂກທ່ອງທ່ຽວເປັນຈຳນວນຫຼາຍເຂົ້າຮ່ວມບັນດາກິດຈະກຳ, ຄື: ງານຕະຫຼາດນັດ ຕາມຸງ, ການແຂ່ງຂັນແລ່ນ, ການຊ່ວງເຮືອ…
