ຕອນບ່າຍວັນທີ 8 ກໍລະກົດ, ຢູ່ຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ໄດ້ເປັນປະທານການເຮັດວຽກກັບຄະນະພັກນະຄອນ ຮ່າໂນ້ຍ ກ່ຽວກັບສະພາບການປະຕິບັດໜ້າທີ່ 6 ເດືອນຕົ້ນປີ; ບັນດາໜ້າທີ່, ມາດຕະການຮັບປະກັນປະຕິບັດໜ້າທີ່ປີ 2026; ຜັນຂະຫຍາຍປະຕິບັດມະຕິຂອງກົມການເມືອງວ່າດ້ວຍການກໍ່ສ້າງ ແລະ ພັດທະນານະຄອນຫຼວງ ຮ່າໂນ້ຍ ໃນສັງກາດໃໝ່.
ໃນການເຮັດວຽກ, ທ່ານເລຂາທິການໃຫຍ່, ປະທານປະເທດ ຮັບຮູ້ຮ່າໂນ້ຍ ໄດ້ເປັນເຈົ້າການ, ມີຄວາມຂ້ຽວຂາດໃນການປັບປຸງລະບອບລະບຽບການ, ວາງແຜນຜັງ, ປະຕິຮູບການບໍລິຫານໃຫ້ສົມບູນແບບ ແລະ ຜັນຂະຫຍາຍມະຕິຂອງກົມການເມືອງ, ສ້າງພື້ນຖານໃຫ້ແກ່ໄລຍະພັດທະນາໃໝ່. ເຖິງຢ່າງໃດກໍຕາມ, ນະຄອນ ຮ່າໂນ້ຍ ຕ້ອງສຸມໃສ່ປະຕິບັດບັນດາໜ້າທີ່ຈຸດສຸມໃນ 6 ເດືອນທ້າຍປີ, ໃນນັ້ນ, ສູ້ຊົນບັນລຸການເຕີບໂຕ 2 ຕົວເລກ ແຕ່ບໍ່ແລກປ່ຽນດ້ວຍສິ່ງແວດລ້ອມ, ການໜູນຊ່ວຍທາງສັງຄົມ ແລະ ຄຸນນະພາບການດຳລົງຊີວິດ. ທ່ານກໍເນັ້ນໜັກວ່າ ຮ່າໂນ້ຍ ຕ້ອງເພີ່ມທະວີມີການເຕີບໂຕໄວກວ່າ ແຕ່ມີຄຸນນະພາບກວ່າ; ທັນສະໄໝກວ່າ ແຕ່ຍັງຮັກສາໄດ້ສີສັນວັດທະນະທຳ; ຮັ່ງມີເຂັ້ມແຂງກວ່າ ແຕ່ປະຊາຊົນທຸກຄົນລ້ວນແຕ່ໄດ້ຊົມໃຊ້ຜົນປະໂຫຍດຂອງການພັດທະນາ, ພ້ອມທັງນຳໜ້າໃນການສ້າງບັນດາຮູບແບບ, ກຳລັງໜູນໃໝ່ທີ່ມີກຳລັງແຜ່ກະຈາຍໃນທົ່ວປະເທດ.
