(ພາບ: president.gov.ua)
ວັນທີ 29 ກໍລະກົດ, ທ່ານ Donald Tusk, ນາຍົກລັດຖະມົນຕີ ໂປໂລຍ ແລະ ທ່ານ Zelensky, ປະທານາທິບໍດີ ຢູແກຼນ ໄດ້ພົບປະກັນແບບເຊິ່ງໜ້າຄັ້ງທຳອິດຢູ່ນະຄອນ Lublin, ທາງທິດຕາເວັນອອກ ໂປໂລຍ, ສ້າງຂີດໝາຍສຳຄັນເພື່ອຫຼຸດຜ່ອນບັນດາຄວາມເຄັ່ງຕຶງດ້ານການທູດທີ່ແກ່ຍາວນັບແຕ່ເດືອນ ພຶດສະພາ ຜ່ານມາ.
ທີ່ການໂອ້ລົມສົນທະນາ, ການນຳ 2 ທ່ານກໍ່ປຶກສາຫາລືກ່ຽວກັບການເປີດກວ້າງການຮ່ວມມືດ້ານປ້ອງກັນຊາດ 2 ຝ່າຍ, ພິຈາລະນາໝາກຜົນການຢ້ຽມຢາມ ວໍຊິງຕັງ ຫວ່າງມໍ່ໆມານີ້ຂອງທ່ານປະທານາທິບໍດີ Zelensky ແລະ ບັນດາຄວາມມານະພະຍາຍາມດ້ານການທູດທີ່ພວມດຳເນີນໄປ ແນໃສ່ຢຸດຕິການປະທະກັນ ລັດເຊຍ - ຢູແກຼນ. ນອກນັ້ນ, 2 ຝ່າຍກໍ່ປຶກສາຫາລືກ່ຽວກັບມາດຕະການໜູນຊ່ວຍ ແລະ ຮັບປະກັນຄວາມໝັ້ນຄົງໃຫ້ຊາວ ຢູແກຼນ ນັບແສນຄົນທີ່ພວມລີ້ໄພຢູ່ ໂປໂລຍ.
ຕາມວົງການນັກສັງເກດການ, ການພົບປະຄັ້ງນີ້ບໍ່ພຽງແຕ່ແມ່ນສັນຍານຂອງການເລີ່ມເຄື່ອນໄຫວການເຈລະຈາຂັ້ນສູງ ໂປໂລຍ - ຢູແກຼນ ຄືນໃໝ່ເທົ່ານັ້ນ, ຫາກຍັງສະແດງໃຫ້ເຫັນຄວາມມານະພະຍາຍາມຂອງທັງ 2 ຝ່າຍໃນການເພີ່ມທະວີການຮ່ວມມື, ໜູນຊ່ວຍເຊິ່ງກັນແລະກັນແນໃສ່ຮັບປະກັນຄວາມໝັ້ນຄົງຢູ່ພາກພື້ນອີກດ້ວຍ.
