ວັນທີ 15 ຕຸລາ, ຢູ່ຮ່າໂນ້ຍ, ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດ ຫວຽດນາມ ໄດ້ໃຫ້ການຕ້ອນຮັບ ທ່ານນາງ Kelly Coldiron, ຮອງຜູ້ຊ່ວຍວຽກລັດຖະມົນຕີການຄ້າ ອາເມລິກາ ຮັບຜິດຊອບ ອາຊີ, ທັງເປັນຜູ້ຮັກສາການຜູ້ອຳນວຍການຝ່າຍບໍລິຫານໂຄງການ SelectUSA, ເນື່ອງໃນໂອກາດມາຢ້ຽມຢາມ ແລະ ເຮັດວຽກຢູ່ ຫວຽດນາມ.
ທ່ານນາງ ຫງວຽນມິງຮັ່ງ ຮອງລັດຖະມົນຕີການຕ່າງປະເທດ ຢັ້ງຢືນ ຫວຽດນາມ ຖື ອາເມລິກາ ແມ່ນໜຶ່ງໃນບັນດາຄູ່ຮ່ວມມືຍຸດທະສາດສຳຄັນແຖວໜ້າ, ປາດຖະໜາຢາກສືບຕໍ່ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານໃຫ້ພັດທະນາຢ່າງມີສະຖຽນລະພາບ, ແທ້ຈິງ ແລະ ມີປະສິດທິຜົນ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນ ແລະ ວິສາຫະກິດສອງປະເທດ. ທ່ານນາງ ຫງວຽນມິງຮັ່ງ ສະເໜີໃຫ້ຊຸກຍູ້ການຮ່ວມມືກ່ຽວກັບເຄິ່ງຊັກນຳໄຟຟ້າ, ປັນຍາປະດິດ, ສູນຂໍ້ມູນ ແລະ ພື້ນຖານໂຄງລ່າງດີຈີຕອນ, ຕິດພັນກັບການຫັນປ່ຽນເຕັກໂນໂລຢີ, ບຳລຸງສ້າງແຫຼ່ງຊັບພະຍາກອນມະນຸດ ແລະ ຍົກສູງຄວາມສາມາດໃນການເຂົ້າຮ່ວມລະບົບສະໜອງຂອງວິສາຫະກິດ ຫວຽດນາມ.
ສ່ວນທ່ານນາງ Kelly Coldiron ຕີລາຄາສູງວຽກງານກະກຽມຂອງ ຫວຽດນາມ ໃຫ້ແກ່ APEC 2027, ພ້ອມທັງຢັ້ງຢຶນຄວາມສາມາດບົ່ມຊ້ອນໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ. ທ່ານນາງສະແດງຄວາມຫວັງຢາກສືບຕໍ່ປະສານສົມທົບກັບກະຊວງການຕ່າງປະເທດ ແລະ ບັນດາກະຊວງ, ຂະແໜງການອື່ນໆຂອງ ຫວຽດນາມ ຊຸກຍູ້ການຮ່ວມມືດ້ານການຄ້າ, ເສດຖະກິດດີຈີຕອນ ແລະ ສ້າງຄວາມສະດວກໃຫ້ແກ່ການເຄື່ອນໄຫວຂອງວິສາຫະກິດສອງປະເທດ.
