ວັນທີ 10 ກັນຍາ (ຕາມເວລາທ້ອງຖິ່ນ), ຢູ່ນະຄອນຫຼວງ ປາຣີ, ປະເທດ ຝລັ່ງ, ທ່ານພົນເອກ ຟານວັນຢາງ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ ຫວຽດນາມ ແລະ ທ່ານນາງ Catherine Vautrin, ລັດຖະມົນຕີກະຊວງກອງທັບ ແລະ ນັກຮົບເກົ່າ ຝລັ່ງ, ໄດ້ລົງນາມໃນຂໍ້ຕົກລົງການຮ່ວມມືໃນຂົງເຂດຮັກສາສັນຕິພາບ ສະຫະປະຊາຊາດ.
ຕາມນັ້ນແລ້ວ, ຝລັ່ງ ຈະໜູນຊ່ວຍ ຫວຽດນາມ ໃນການຍົກສູງກຳລັງຄວາມສາມາດຂອງຕົນໃຫ້ແກ່ກຳລັງເຂົ້າຮ່ວມການ ຮັກສາສັນຕິພາບ ສະຫະປະຊາຊາດ ຜ່ານຊຸດຝຶກອົບຮົມ, ຈັດສົ່ງນັກຊ່ຽວຊານມາເຮັດວຽກຢູ່ກົມຮັກສາສັນຕິພາບ ຫວຽດນາມ ເປັນປະຈຳ ແລະ ໜູນຊ່ວຍການຜັນຂະຫຍາຍນາຍທະຫານ ຫວຽດນາມ ຢູ່ຄະນະປະຕິບັດງານຝຶກອົບຮົມຂອງ ສະຫະພາບ ເອີລົບ (ອີຢູ) ຢູ່ ສ.ອາຟະລິກາກາງ.
ທີ່ການເຈລະຈາກ່ອນນັ້ນ, 2 ຝ່າຍໄດ້ເຫັນດີສືບຕໍ່ເພີ່ມທະວີການຮ່ວມມື ດ້ານປ້ອງກັນຊາດ 2 ຝ່າຍໃນໄລຍະທີ່ຈະມາເຖິງ. ກະຊວງປ້ອງກັນປະເທດ ຫວຽດນາມ ຊົມເຊີຍຄະນະການນຳກະຊວງກອງທັບ ແລະ ນັກຮົບເກົ່າ ຝລັ່ງ ເຂົ້າຮ່ວມ ງານວາງສະແດງປ້ອງກັນຊາດສາກົນ ຫວຽດນາມ ຄັ້ງທີ 3 ທີ່ຈະຈັດຂຶ້ນຢູ່ ຮ່າໂນ້ຍ ໃນເດືອນ ທັນວາ ນີ້.
ເນື່ອງໃນໂອກາດນີ້, ທ່ານພົນເອກ ຟານວັນຢາງ ໄດ້ສະເໜີໃຫ້ຝ່າຍ ຝລັ່ງ ຊຸກຍູ້ການລົງນາມໃນບົດບັນທຶກຄວາມເຂົ້າໃຈກ່ຽວກັບການຊອກຫາທະຫານ ຫວຽດນາມ ແລະ ຝລັ່ງ ທີ່ຫາຍສາບສູນ ແລະ ການແລກປ່ຽນວັດຖຸທີ່ລະນຶກໃນສົງຄາມ, ສ້າງຂອບການຮ່ວມມືເພື່ອຊຸກຍູ້ການຮ່ວມມືໃນຂົງເຂດທີ່ມີຄວາມໝາຍ ດ້ານວັດທະນະທຳມະນຸດສະທຳນີ້.
