ໃນປີກາຍ, ການສົ່ງອອກເຂົ້າສານຂອງ ຫວຽດນາມ ບັນລຸ 8,13 ລ້ານໂຕນ ດ້ວຍມູນຄ່າ 4,7 ຕື້ USD, ເຊິ່ງເປັນລະດັບສູງສະຖິຕິຂອງຂະແໜງເຂົ້າສານ ຫວຽດນາມ. ນີ້ແມ່ນຕົວເລກສະຖິຕິຫຼ້າສຸດຂອງກົມໃຫຍ່ພາສີ ໄດ້ປະກາດໃນວັນທີ 12 ມັງກອນ. ເມື່ອທຽບໃສ່ປີ 2022, ການສົ່ງອອກເຂົ້າສານຂອງ ຫວຽດນາມ ເພີ່ມຂຶ້ນ 14,4% ກ່ຽວກັບປະລິມານ ແລະ 35,3% ກ່ຽວກັບຄຸນຄ່າ ເມື່ອທຽບໃສ່ໄລຍະດຽວກັນຂອງປີກາຍ. ຟີລິບປິນ ແມ່ນຕະຫຼາດນຳເຂົ້າເຂົ້າສານຫຼາຍທີ່ສຸດຈາກ ຫວຽດນາມ ໃນປີ 2023 ດ້ວຍປະລິມານກວ່າ 3,1 ລ້ານໂຕນ; ຖັດຈາກນັ້ນແມ່ນ ອິນໂດເນເຊຍ, ຈີນ ແລະ ການາ.
ຫວຽດນາມ ແມ່ນປະເທດຜະລິດເຂົ້າສານໃຫຍ່ອັນດັບທີ 5 ໃນໂລກ ແລະ ແມ່ນແຫຼ່ງສົ່ງອອກເຂົ້າໃຫຍ່ອັນດັບທີ 3 ໃນໂລກ (ໄລ່ຕາມປະລິມານ). ເຖິງວ່າຖືກຜົນກະທົບຈາກປະກົດການ El Nino ກໍຕາມ ແຕ່ປະລິມານເຂົ້າສົ່ງອອກຂອງ ຫວຽດນາມ ຍັງເພີ່ມຂຶ້ນຢ່າງກະໂດດຂັ້ນ. ຕາມບັນດາວິສາຫະກິດແລ້ວ, ການສົ່ງອອກເຂົ້າສານຂອງ ຫວຽດນາມ ເພີ່ມຂຶ້ນຢ່າງແຮງ ນັບແຕ່ເມື່ອລັດຖະບານ ອິນເດຍ ໄດ້ປະກາດໃຊ້ຄຳສັ່ງຫ້າມສົ່ງອອກເຂົ້າສານ non – basmati ໃນເດືອນກໍລະກົດປີ 2023. ໄລ່ມາຮອດປັດຈຸບັນ, ຄຳສັ່ງຫ້າມດັ່ງກ່າວ ຍັງບໍ່ທັນໄດ້ຍົກເລີກເທື່ອ ສະນັ້ນ ການສົ່ງອອກເຂົ້າສານຂອງ ຫວຽດນາມ ໃນປີ 2024 ນີ້ ຈະມີສັນຍານຕັ້ງໜ້າຫຼາຍຢ່າງ.
