ວັນທີ 29 ມັງກອນ, ທ່ານ ຫງວຽນທ້ຽນເຍິນ ເລຂາຄະນະພັກນະຄອນ ໂຮ່ຈີມິນ ໄດ້ໄປຢ້ຽມຢາມ, ອວຍພອນປີໃໝ່ອົງຄະນະພັກ ແລະ ປະຊາຊົນແຂວງເຕິຍນິງ; ມອບເງິນຈໍານວນ 500 ລ້ານດົ່ງໃຫ້ຄະນະກໍາມະການແນວໂຮມປະເທດຊາດ ແຂວງ ເຕິຍນິງ ເພື່ອເບິ່ງແຍງດູແລບັນດາຄອບຄົວທຸກຍາກ, ຜູ້ປະສົບກັບຄວາມຫຍຸ້ງຍາກ ຢູ່ ແຂວງເຕິຍນິງ ໃຫ້ມີເງື່ອນໄຂຕ້ອນຮັບບຸນເຕັດປີກຸນ 2019 ດ້ວຍຄວາມເບີກບານມ່ວນຊື່ນ.

ໃນວັນດຽວກັນ, ທ່ານ ຟານດິ່ງຈາກ ຫົວໜ້າຄະນະວຽກງານການເມືອງພາຍໃນສູນກາງ ກໍໄດ້ໄປຢ້ຽມຢາມ ແລະ ອວຍພອນປີໃໝ່ແຂວງດ້ຽນບຽນ. ນະທີ່ນີ້, ທ່ານ ຟານດິ່ງຈາກ ໄດ້ມອບຂອງຂວັນ 100 ພູດ ໃຫ້ແກ່ບັນດາຄອບຄົວເປົ້າໝາຍນະໂຍບາຍ, ຜູ້ປະສົບກັບຄວາມຫຍຸ້ງຍາກ ແລະ ຖືກຜົນກະທົບຈາກໄພພິບັດທໍາມະຊາດ ຢູ່ ຕາແສງ ປອມລອດ, ເມືອງດ້ຽນບຽນ.

ທ່ານ ຟານດິ່ງຈາກ ມອບຂອງຂວັນໃຫ້ພະນັກງານ, ນາຍທະຫານ ຢູ່ ປ້ອງທະຫານປ້ອງກັນຊາຍແດນ ໄຕຈາງ (ພາບ: TTXVN)

ໃນຊຸມວັນນີ້, ທາງໂຮງໝໍປິ່ນປົວໂລກກ້ອນເບົ້າ ແລະ ໂລກມະເຮັງ ນະຄອນ ໂຮ່ຈີມິນ ກໍໄດ້ຈັດຕັ້ງການເຄື່ອນໄຫວຫຼາຍຢ່າງ ເພື່ອເບິ່ງແຍງດູແລຄົນເຈັບໃນຍາມບຸນເຕັດ, ຈັດຕ້ັງບັນດາລາຍການສະແດງສິລະປະ “ລະດູບານໃໝ່ແຫ່ງຄວາມຮັກແພງ” ແລະ ມອບຂອງຂວັນໃຫ້ເດັກນ້ອຍ ເກືອບ 200 ຄົນ ທີ່ພວມປິ່ນປົວຢູ່ໂຮງໝໍ ແລະ ອື່ນໆ.

ກໍໃນວັນທີ 29 ມັງກອນ, ຢູ່ ແຂວງເກິນເທີ ໄດ້ດໍາເນີນລາຍການ “ບຸນເຕັດ ເພື່ອຄົນທຸກຍາກ ແລະ ຜູ້ຕິດທາດພິດສີສົ້ມ - ລະດູບານໃໝ່ ປີກຸນ 2019” ໂດຍ ສະພາກາແດງນະຄອນຈັດຕັ້ງຂຶ້ນ ແລະ ມອບຂອງຂວັນ 2000 ພູດ ໃຫ້ບັນດາເປົ້າໝາຍທີ່ປະສົບກັບຄວາມຫຍຸ້ງຍາກ.

ພະແນກຄົມມະນາຄົມ ແລະ ຂົນສົ່ງ ກໍໄດ້ສົມທົບກັບ ຄະນະກໍາມະການແນວໂຮມປະເທດຊາດຫວຽດນາມ ແຂວງ ກວາງນາມ ແລະ ບັນດາວິສາຫະກິດຂົນສົ່ງ ຈັດຕັ້ງຖ້ຽວລົດເມແຫ່ງສາຍຈິດມິດໃຈ ເພື່ອສົ່ງກໍາມະກອນ, ຜູ້ອາຍຸສູງ, ນັກສຶກສາທີ່ປະສົບກັບຄວາມຫຍຸ້ງຍາກ ກັບເມືອ ຕ້ອນຮັບບຸນເຕັດພ້ອມດ້ວຍຄອບຄົວ ຢູ່ບ້ານເກີດເມືອງນອນ.