(ພາບ: VOV)
ໂດຍໄດ້ຮັບຄຳເຊື້ອເຊີນຂອງ ກະສັດ ແດນມາກ Frederik X ແລະ ພະມະຫາເຫສີ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ ຫວຽດນາມ ພ້ອມກັບພັນລະຍາ ແລະ ຄະນະຜູ້ແທນຂັ້ນສູງ ຫວຽດນາມ ຈະເດີນທາງໄປຢ້ຽມຢາມທາງລັດຖະກິດຢູ່ ລາຊະອານາຈັກ ແດນມາກ ແຕ່ວັນທີ 19 – 21 ຕຸລາ 2026. ທ່ານ ນາງ ຫງວຽນເລແທັງ ເອກອັກຄະລັດຖະທູດ ຜູ້ມີອຳນາດເຕັມແຫ່ງ ສສ.ຫວຽດນາມ ປະຈຳ ແດນມາກ ເນັ້ນໜັກວ່າ ນີ້ແມ່ນການຢ້ຽມຢາມ ທາງລັດຖະກິດແດນມາກ ຄັ້ງທຳອິດຂອງເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ. ການຢ້ຽມຢາມໄດ້ດຳເນີນກົງກັບຈຸດເວລາ ສອງປະເທດສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ.
ການຢ້ຽມຢາມແມ່ນຂີດໝາຍປະຫວັດສາດສຳຄັນໃນການພົວພັນສອງປະເທດ, ສະແດງໃຫ້ເຫັນວິໄສທັດຍຸດທະສາດ, ຄວາມຕັດສິນໃຈດ້ານການເມືອງ ແລະ ຄວາມໄວ້ເນື້ອເຊື່ອໃຈລະຫວ່າງການນຳສອງປະເທດ, ພ້ອມທັງສ້າງກຳລັງໜູນໃໝ່, ນຳການພົວພັນ ຫວຽດນາມ ແລະ ແດນມາກ ຂຶ້ນສູ່ລະດັບສູງໃໝ່. ນີ້ແມ່ນໂອກາດເພື່ອໃຫ້ການນຳສອງປະເທດແລກປ່ຽນກ່ຽວກັບບັນດາການກຳນົດທິດໃຫຍ່, ມີລັກສະນະຍຸດທະສາດ ເພື່ອແນໃສ່ເປີດກວ້າງ ແລະ ເຮັດໃຫ້ການຮ່ວມມືໃນບັນດາຂົງເຂດສຳຄັນເລິກເຊິ່ງກວ່າອີກ, ເຕັມໄປດ້ວຍຄວາມສາມາດບົ່ມຊ້ອນ, ຈາກເສດຖະກິດການຄ້າການລົງທຶນ, ພະລັງງານ, ການບຳລຸງສ້າງແຫຼ່ງຊັບພະຍາກອນມະນຸດ ໄປສູ່ວິທະຍາສາດເຕັກໂນໂລຢີ, ນະວັດຕະກຳ, ການຫັນເປັນດີຈີຕອນ ແລະ ການເຕີບໂຕສີຂຽວ.
(ພາບ: VGP)
ເນື່ອງໃນໂອກາດນີ້, ທ່ານນາງ ເລທິທູຮັ່ງ, ຮອງລັດຖະມົນຕີກະຊວງການຕ່າງ ປະເທດ ໄດ້ເນັ້ນໜັກວ່າ ການຢ້ຽມຢາມຄັ້ງນີ້ ໄດ້ສົ່ງສານທີ່ເຂັ້ມແຂງກ່ຽວກັບແນວທາງການຕ່າງປະເທດຂອງ ຫວຽດນາມ ໃນໄລຍະພັດທະນາໃໝ່ຂອງຊາດ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ກໍຄືເປີດກວ້າງຂອບເຂດການຮ່ວມມືດ້ານການຄ້າ, ການລົງທຶນ, ວິທະຍາສາດ ແລະ ເຕັກໂນໂລຢີ, ນະວັດຕະກໍາ, ການເຕີບໂຕສີຂຽວ ແລະ ການພັດທະນາແບບຍືນຍົງ, ຮັບໃຊ້ໃຫ້ແກ່ພາລະກິດແຫ່ງການກໍ່ສ້າງ, ພັດທະນາປະເທດຊາດ. ການຢ້ຽມຢາມຄັ້ງນີ້ ຍັງເປັນໂອກາດເພື່ອໃຫ້ ຫວຽດນາມ, ເດນມາກ, ສະຫະພາບ ເອີລົບ ແລະ ແບນຊິກ ຍົກລະດັບການພົວພັນ, ສ້າງບາດລ້ຽວໃນການຮ່ວມມືຕາມທິດແທດຈິງກວ່າ, ມີປະສິດທິຜົນກວ່າ ບົນພື້ນຖານຄວາມຕັດສິນໃຈທາງດ້ານການເມືອງຢ່າງສູງ, ມີຈຸດທີ່ຄ້າຍຄືກັນກ່ຽວກັບການກຳນົດທິດຍຸດທະສາດ.
