 ທ່ານນາງ ໂຄສົກກະຊວງການຕ່າງປະເທດ ລັດເຊຍ Maria Zakharova (ພາບ: TASS) |
ວັນທີ 5 ກັນຍາ, ລັດເຊຍ ໄດ້ປະຕິເສດຂໍ້ມູນຂ່າວທີ່ວ່າ ປະເທດນີ້ ໄດ້ດຳເນີນການປຶກສາຫາລືກ່ຽວກັບການເຂົ້າຮ່ວມກອງປະຊຸມຂັ້ນລັດຖະມົນຕີກັບກຸ່ມບັນດາປະເທດອຸດສາຫະກຳພັດທະນາແຖວໜ້າໂລກ (G7) ເຊິ່ງຈະຈັດຂຶ້ນໃນໄລຍະຈະມາເຖິງຕາມແບບທາງໄກເພື່ອປຶກສາຫາລືກ່ຽວກັບສະພາບການຢູ່ ອາບການິດສະຖານ. ທ່ານນາງ ໂຄສົກກະຊວງການຕ່າງປະເທດ ລັດເຊຍ Maria Zakharova ໃຫ້ຮູ້ວ່າ ກ່ອນນີ້ 2 ວັນ, ລັດເຊຍ ໄດ້ຮັບ “ສັນຍານ” ຈາກ ຝລັ່ງ ແລະ ເຢຍລະມັນ ກ່ຽວກັບກອງປະຊຸມຈຳນວນໜຶ່ງ ແຕ່ບໍ່ກ່ຽວຂ້ອງເຖິງ G7.
ກ່ອນໜ້ານັ້ນ, ບັນດາປະເທດ G7 ໄດ້ເຫັນດີເປັນເອກະພາບ ຈະຮຽກຮ້ອງໃຫ້ ຕາລີບານ ຮັບປະກັນຄວາມປອດໄພໃຫ້ແກ່ການຍົກຍ້າຍພົນລະເມືອງ ຜູ້ທີ່ມີຄວາມປາດຖະໜາຢາກອອກຈາກ ອາບການິດສະຖານ ແລະ ຕັດການພົວພັນກັບບັນດາອົງການກໍ່ການຮ້າຍ ແລະ ເຄົາລົບສິດທິຂອງແມ່ຍິງ.
