ລັດເຊຍພິຈາລະນາເລື່ອງໂຕ້ຕອບບັນດາມາດຕະການລົງໂທດໃໝ່ຂອງອາເມລິກາ

ກ່າວຄຳເຫັນທີ່ການຖະແຫຼງຂ່າວ, ໂຄສົກກະຊວງການຕ່າງປະເທດລັດເຊຍ ທ່ານນາງ Maria Zakharova ຢືນຢັນວ່າ, ບໍ່ມີຫຼັກຖານໃດໆທີ່ພິສູດໃຫ້ເຫັນເລື່ອງ ມົດສະກູ ຢືນຢູ່ເບື້ອງຫຼັງເຫດວາງຢາພິດອະດີດນັກສືບລາຊະການລັບ Sergei Skripal ແລະ ລູກສາວ. ທ່ານນາງເນັ້ນໜັກວ່າ, ສາຍເຫດທີ່ອາເມລິກາ ຍົກອອກມາເພື່ອຈັດວາງການລົງໂທດຕໍ່ລັດເຊຍ ແມ່ນບໍ່ມີມູນຄວາມຈິງ.

ກ່ອນໜ້ານັ້ນໃນວັນດຽວດັນ, ສະຖານທູດລັດເຊຍ ປະຈຳອາເມລິກາ ໄດ້ອອກສຽງຕຳນິຕິຕຽນ ວໍຊິຕັນ ຈັດວາງບັນດາມາດຕະການລົງໂທດແນໃສ່ມົດສະກູ, ພ້ອມທັງຊີ້ແຈ້ງວ່າ, ມົດສະກູ ສືບຕໍ່ຮຽກຮ້ອງການສືບສວນຢ່າງເປີດເຜີຍ ແລະ ໂປ່ງໄສກ່ຽວກັບເຫດການດັ່ງກ່າວ.

ຄາດວ່າ, ບັນດາມາດຕະການລົງໂທດໃໝ່ຂອງອາເມລິກາ ຈະມີຜົນສັກສິດນັບແຕ່ວັນທີ 22 ສິງຫາ ຈະມາເຖິງ.